Dom harei ini, rahra dalam xã Tiến Lợi daok trun pajaih ka dom janih bingu. Hu labaih 10 thun dalam bruk pala bingu, ong Võ Văn Hồng (daok di palei Tiến Thạnh) lac sa dalam dom urang ngak po hu bein bingu praong dalam bhum haong rilo janih bingu yau vạn thọ, mào gà đỏ, long phụng… Harei harei, 2 diuk pasang ong jar var iek glang bein piah hu dom chậu bingu siam pablei ka urang blei salih mai duah blei.

Ong Hồng brei thau, urak ini bahrau trun pajaih trường sanh Japon. Thun dahlau, ong pala janih ini 50 chậu jeng tamuh siam, thun ini ong pabam pajaih 700 chậu min phun anek metai rilo, njauk kuac pasaoh veik taneh, pabam veik phun anek karei. Makna ngak brei phun mbuan metai lac kayua langik thun ini tuk pandiak tuk hajan, bo daok pandiak thu.

Jeng tui ong Hồng, thun ini tết mai aval nan ye dom janih bingu me-in tết pala katut panak harei ye akaok bilan 11 brei pabam pajaih. Ong pala dom janih bingu yau vạn thọ, mào gà… takik phun jien, pablei yaom meng 20.000 - 30.000 đồng. Bhian di nyu, dom urang blei salih mai tal sang blei, atau menuac krein randap kakei blei dahlau. Daok labaih hadom meng ba tabiak darak pasar pablei ka urang ba mai sang chưng tết.

Bhum bingu Tiến Lợi hu rahra pala luac thun haong rilo janih piah pabak bruk blei me-in di menuac sia Phan Thiết. Urak ini dalam xã hu jaik 50 sang daok tui bruk pala bingu tết. Dalam nan hu jaik 35 sang pala bingu tết saong 15 sang pala bingu luac thun. Dom janih bingu hu mikva pala rilo lac bingu trường sanh kanyik katam, bhong meriah, bingu vạn thọ… Yaok thun, Kapul urang ngak nong xã Tiến Lợi bhian tui iek, pachreih ba mikva urang ngak nong pataom tame trun pajaih njauk tukvak, iek tui lịch tết piah pala njauk harei piah pablei. Meng harei 20 tal harei 25 bilan mat, lac dahlau Tết Nguyên đán sa adit, lac tuk ba bingu tabiak pablei.

Ong Nguyễn Thanh Quang – akaok kapul urang ngak nong xã Tiến Lợi, ban Phan Thiết, tỉnh Bình Thuận brei thau: Kayua jit Covid-19, dua thun jaik di ini, urang pala bingu daok sahneng kuhria tuk buh jien pala bingu tết, min thun ini dom bruk pala bingu caga tết hu chreih chrai gilac veik, mikva dalam xã khang hatai buh jien tame ngak rilo jang. Xã jeng hu pachreih mikva pala bingu pablei Tết Nguyên đán. Bruk pala bingu tết di xã hu ba jien tame glaong jang rilo duk haong dom janih njam patam baoh kraoh karei. Ong Quang caong lac meng ini tal puac thun, langik siam lagaih jang ka dom janih bingu tamuh siam, piah ka dom po bein hu mbang tết dalam bui sambai, trei sir./.