Pandar jamriak par  oh hu manuac peih pruh jru pametai halak halin ka labaih 4ha padai, ong Nguyễn Quốc Dũng, xã Tân Kiều, huyện Tháp Mười, tỉnh Đồng Tháp brei thau, ini lac mbang ka 2 sang ong pah jamraik par oh hu manuac peih piah pruh jru. Tapa dua mbang pah pruh jru hu mboh cambaih kein laba meng jamriak par oh hu manuac peih ini hu daong patak pataom meng 20 tal 30% yaom jien jru khik caga phun pala, gam patak pataom jien gam khik siam prein yava ka rup drei: “Urak ini pruh jru meng jamriak par lac trun phun jien, hu laba glaong, siam lagaih. Dahlau deih, khak drak, xang menyek jeng lap, urak ini nyu tagok yaom lo, manuac ngak jeng tagok yaom, pandar ilamo công nghệ 4.0 lac biak bingi sahnang. Urang nong urak ini jeng daok roh duah, bac magru 4.0 piah drei ngak ka nyu abih takik phun jien buh tame ngak.”

Sang ong Nguyễn Hoàng Thái daok di xã Mỹ Đông, huyện Tháp Mười lac urang dalam hợp tác xã Thắng Lợi, ngak padai tui tanut chuan SRP (lac ngak padai khang kajap). Ong brei thau, ini lac mbang ka 6 ong pandar công nghệ 4.0 dalam bruk pala drak, yau ye khik pacang halak halin meng gom thông minh, pruh jru meng jamriak par oh hu manuac peih piah takik abih jru, khik ramik thiên địch, padai jeng khik hu chất lượng. Tui ong Thái, oh ka mboh tuk halei urang ngak hamu hu bingi sahnang yau urak ini, pandar jamraik meng akaok vụ tal tuk yuak, saong praong jang lac oh kuhria bruk pablei padai tuk yuak, jien pablei padai jeng hu doanh nghiệp payua tame tài khoản: “Camriep dahlak jeng ngak iek di mangaok 1,2 ha bo oh pruh abih taneh, blaoh dahlak mboh siam lagaih meng pruh abih taneh, jamraik bahrau ye urang nong takik glaih jang, dahlak ngak ka Cty phun pala gah maraong pambuak gauk jeng tani tanat, tukvak yuak urang khan brei drei thau, jien padai ye payua tame tài khoản ka drei.”

Kein lagaih di bruk pruh jru meng jamraik par oh hu manuac peih hu daong trun jru meng 20 tal 30% dut saong pruh meng tangin, trun manuac ngak, patak pataom hu tukvak, tui kuhria yaok harei mac meda pruh hu meng 30 tal 40 ha, samu labaih 20 urang ngak, daong patak pataom hu meng 2 tal 3 triệu đồng/ha. Langiu di nan, urang nong oh gaok tapak haong jru pruh, langyah hu bruk kurang manuac ngak, daong khik caga prein yava saong alam môi trường.

Saai Trương Tấn Tài, daok di ban sit Mỹ An, huyện Tháp Mười, tỉnh Đồng Tháp khang hatai blei jamraik par oh hu manuac peih mai pandar saong nao pruh pah ka dom baoh sang. Tapa labaih 1 thun, saai Tài mboh hu dom kein lagaih tuk pandar jamraik par oh hu manuac peih dalam bruk ngak nong nan ye buh jien blei 3 jamraik tra piah duh ka urang nong dalam saong langiu huyện. Saai Trương Tấn Tài khan lac: “Tuk camriep blei jamriak mai jeng gaok kan kandah lo kayua urang nong bhian randap haong pruh jru meng tangin, jeng hu dom urang mboh kein laba bo meng saneng karei ka jamraik pruh jru oh hu manuac peih, ka sa lac abih takik tukvak, dahlau daih pruh jeng takik, urak ini pruh hu rilo labik, tapa nan brei thau lac mikva mboh hu kein lagaih di jamraik par ngak nong ini.”

Dom salih bahrau di Đồng Tháp brei mboh cambaih abih lac jien mek tame di bhap bini hu glaong jang, salih jalan sahneng meng “ngak tabiak kaya nong” tapa “duah jien meng bruk ngak nong” saong abih di nyu nan lac mikva paglaong bruk pambuak gauk padang bhum ngak nong praong, ngak tabiak pandap panda siam mekre, salamat, hu chất lượng glaong, pabak hu hatai caong di darak pasa pablei tabiak negar langiu.

Công nghệ 4.0 urak ini hu tame tal yaok mblang bein, laok hamu, hu daong patagok yaom glaong di kaya nong Việt Nam saong praong jang lac hu ba kaya nong Viet Nam hu mbaok tame chuỗi pabak di dunya. Dom mblang hamu hu pandar jamriak meng mbaok taneh, tal bruk pruh jru, khik pacang jit ruak meng mangaok langik hu ba mai mbaok meta bahrau ka gah ngak nong. Daong patagok kein laba ka bruk ngak, daong ka urang nong oh daok dang di pandiak riak di hajan saong abih di nyu nan lac khik caga prein yava ka urang ngak saong urang blei pandar./.

Urang lang: Thu Thảo – 02/11