Hu labaih 1ha taneh padai daok di labik taneh dhaong dalam ấp 1, xã Hòa An, huyện Phụng Hiệp, dom thun jaik di ini ong Vũ Thái Hòa tok ngak hu sa vụ padai Đông xuân, klaak vụ padai Hè thu saong Thu đông piah pala caraih pambuak haong raong ikan. Tui ong Hòa, vụ Thu đông bhian gaok khat lahik kayua langik tasik, abih di nyu lac tuk padai njauk aia dauk  ye ngak oh jeng, oh hu laba, dalam tuk pala caraih patrun hu dom kadha oh siam ini, jien mek tame jeng glaong jang 2 tal 3 mbang dut haong ngak padai Thu đông. “Caraih ngak hu jien jang, kadua nan lac nyu oh pagam pambak tame mac moc atau manuac urang ngak. Ta-eng drei pala, ta-eng drei paik. Padai  thu đông ye thun hu, thun khat kayua gaok hajan angin, yaom pah manuac ngak jeng glaong, blaoh khak drak vật tư nyu tagok biak glaong nan ye ngak padai gaok tuk mai oh hu mbang. Caraih pala oh tuk halei khat, yaok sa ký caraih ye blei hu sa ký meteh padai, daok vụ Đông xuân ye sa ký caraih meda blei hu 6 ký padai.”

Langiu di bruk pala caraih ye dom thun jaik di ini urang nong di huyện Phụng Hiệp jeng hu patagok bruk raong ikan tui jalan quản canh dalam bilan aia ndik. Kayua lac, langiu di bruk kinh tế, raong ikan dalam hamu  daok hu daong ngak brei hacih mblang hamu, pasiam taneh, patrun phun jien buh tame ngak dalam vụ Đông xuân. Tui yaok pataom dalam jaik 3 thun mai ini, kuhria rah tapa yaok thun huyện Phụng Hiệp hu labaih 3.000 ha taneh hu mikva klaak ngak padai vụ Thu đông piah salih tapa raong ikan dalam hamu, ngan haong dom janih ikan yau: chép, mè, kuak phi, ikan kan…. Ong Nguyễn Văn Thành xã Hòa Mỹ, huyện Phụng Hiệp, khan lac:“ Pak ini taneh dhaong ngak padai vụ 3 oh hu mbang. Palao ikan ye hu  laba jang. Ikan drei tok caga halam, drei tok mong iek halam nan min. Palao sa vụ ikan jeng duah hu pluh dom, dua pluh triệu bingi jang ngak padai.”

Meng taneh padai jaik 20 ribau ha, bilan aia ndik thun ini, urang nong huyện Phụng Hiệp tok trun pajaih jaik 7.000 ha padai Thu đông di dom labik hu ar pacang, taneh takik dhaong takik aia dauk, daok jaik 4.000 ha hu salih tapa raong ikan dalam hamu, jaik 2.000 ha hu salih tapa pala caraih, dom janih phun pala karei saong jaik 7.000 ha urang nong oh pala drak boh caik nan pablei ka urang raong ada nduac mbang dalam mblang hamu. Tal puac bilan 10 saka aia bulan, hadei di tuk paik mek dom janih phun pala, athur raong dalam bilan aia ndik, mikva meda bơm njuk aia tabiak, ngak taneh piah pala drak padai bilan Đông xuân. Ong Trần Văn Tuấn-Akaok Jabat ngak nong saong patagok palei pala huyện Phụng Hiệp, brei thau: “Dom labik oh ngak padai Thu đông hu, huyện pachreih mikva salih tapa phun pala karei, dalam nan hu mblang taneh bo mikva pandar piah raong ikan aia taba atau pala dom janih phun tamuh hu dalam ia, pagap yau pala njam bông súng, pala caraih, pala ấu…meng mblang taneh salih tapa pala janih karei yau nan, mikva jeng hu  laba glaong, dut haong ngak padai Thu đông ye jeng hu laba jang  2-3 mbang. Abih di nyu lac bruk raong ikan dalam laok hamu salih ka mblang taneh ngak padai Thu đông ye ini lac bruk ngak biak karei di huyện Phụng Hiệp, ngan haong jalan ngak ini, mikva jeng hu laba rilo.”  

Pala, ngak tui jalan patui hatai po langik lac bruk daok hu pambak prong di bhum taneran kraong CL. Urak ini, rilo puk palei dalam bhum hu ba jalan ka urang nong palih ruah bruk ngak mbang pala drak ka nyu laghaih haong langik tasik taneh riya piah hu jien mek tame tani tanat, salih ka bruk ndam gam haong phun padai ba tal khat lahik, abih di nyu lac dalam bilan ia ndik./.  

Urang lang: Jasi