HTX Nho Evergreen sangka ngak nho salamat, kham merat ba nho hacih tal tangin urang blei

Ravang iek bein nho pajaih bahrau NH 01-152 praong labaih 3.000m2 di sang sa-ai Trương Thị Ngọc Loan haong sa-ai Trảo Văn Cát daok di xã Thành Hải, ban sit Phan Rang - Tháp Chàm, tỉnh Ninh Thuận; thei jeng mboh pachreih hatai meng dom chùm nho praong trak baoh, sambo màu biak mekre. Sa-ai Ngọc Loan brei thau, ini lac pajaih nho NH 01-152. Yaom lac gaok kan kandah kayua jit ruak Covid-19, dom janih baoh kayau, jeng yau baoh nho Ninh Thuận yaom trun biak rilo min pajaih nho NH01-152 jeng daok pablei hu, yaom kaom tani tanat, yaom blei di bein meng 110-120 rabau đồng sa kg nan ye daok hu laba. Sa-ai Trương Thị Ngọc Loan khan lac:“Drei ngak nho hu 7 thun paje. Drei ngak 1 sào hu 2 tấn, yaom labaih 100 rabau đồng sa kg. Bilan Covid 19 camereip jeng yau nan, nho halei oh pablei hu ye nho sang dahlak oh ginup pablei.”

Piah takik hu ruak kik halak halin palai kaik, diuk pasang sa-ai Loan brei pacang halam abih mejam nho, meng nan, bruk pandar jru halak jeng daok takik. Urak ini, sang sa-ai Loan hu peih praong taneh pala pajaih nho bahrau tagok labaih 6.000m2 .

Tapa taong yaom, pajaih nho NH 01-152 lagaih haong langik pandiak thu di tỉnh, meda pacang hu siam dom halak halin, meda raak bingu saong ndam baoh dalam langik tasik kan kandah. Meyah pala ngak siam meda mek hu 3 tấn baoh dalam sa sào, yaok thun pala hu 2 mbang. Meng mboh pala ngak hu siam, Sở Khoa học - Công nghệ Ninh Thuận hu pambuak bruk haong Viện roh duah kapah saong Cakrok bruk ngak nong Nha Hố daok brei pambak praong bruk “Roh duah, padang ngak saong ba brei ilamu pala pajaih nho bahrau NH 01-152 tui jalan VietGap” ka urang pala nho di dom puk palei dalam tỉnh. 

Tui jalan ngak lac “Kaya pandap hijao, brei alam hijao, kayua 1 HTX hijao”, HTX Nho Evergreen sangka ngak nho salamat, kham merat ba nho hacih tal tangin urang blei, dak harei dak brei mboh labik dang angaok darak pasar. Piah peih praong darak pasar, langiu di ngak nho that, HTX sangka brei ngak dom janih pandap meng nho yau ye: ia nho tagok men, nho thu ... Taong abih dom janih pandap ini jeng hu Cục Sở hữu trí tuệ brei harak Chứng nhận nhãn hiệu di HTX haong Chỉ dẫn địa lý “Nho Ninh Thuận”. HTX jeng brei tauk tem duah thau asal labik ngak angaok pandap, padang hu hatai jia di urang blei.

Meng ngak catang tui jalan VietGAP, nho di HTX yam tapa hu dom caong khin biak catang, rilo labik mbaoh tangin pambuak bruk ba nho tame pablei di dom đại lý, siêu thị dalam saong langiu tỉnh, yaok bilan jaik 5 tấn, tapa nan ngak jeng jalan ngak mbang duah jien khang kajap daong ka dom urang dalam HTX sahanang hatai pala ngak, paglaong raidiuk. Sa-ai Nguyễn Đoàn Thiện Phú – iek gah pablei salih di HTX Nho Evegreen brei thau: “Urak ini HTX hu dom janih pandap lac: nho thu, ia nho tagok men, giấm nho,..hu ngak tui jalan khép kín, khik hu salamat pandap mbang meyum. Pambuak bruk haong dom sang urang pala nho chuẩn Viet gap, papaok baoh tui jalan khik kajap salamat ka urang blei mbang.“

HTX Nho Thái An, xã Vĩnh Hải, huyện Ninh Hải, tỉnh Ninh Thuận hu 200 ha taneh pala nho. Kayua jit ruak Covid-19 nan ye tuai mai ravang iek, blei nho di bein trun khang. Min tapa dom jalan pablei pandap angaok dom blah web, urang pala nho duah hu labik pablei haong yaom tani tanat.

Tiến sỹ Mai Văn Hào – Akaok Viện roh duah kapah haong cakrok bruk ngak nong Nha Hố brei thau ka dom jalan ngak dalam roh duah saong ba brei ilamu công nghệ dalam pala ngak dom pajaih nho bahrau:“Meng jalan ngak nho salamat, siam mekre meda pala ngak praong. Anak tal, Viện daok roh duah rilo pajaih nho bahrau hu chất lượng glaong, hu prein pacang ruak kik halan halin siam. Roh duah gah ilamu pala ngak, pandar ilamu kỹ thuật glaong saong pandar khak hữu cơ pandap salamat piah pala ngak hu siam jang, dom trang trại doanh nghiệp meda buh jien tame ngak praong jang, pandar jamriak, takik prein menuac iek glang, paglaong kein laba, pala ngak praong meng ngak tabiak nho Ninh Thuận siam, bingi.”

Ninh Thuận hu taneh pala nho praong abih dalam taneh ia, labaih 1.300 ha. Phun nho lagaih haong labik langik pandiak luac thun. Anak tal, gah Ngak nong haong dom puk palei dalam tỉnh brei ramik veik, peih praong taneh pala nho, parilo dom pajaih nho piah paglaong chất lượng, ba jien tame dak harei dak glaong ka urang pala nho./. 

Urang lang: Thu Thao – 02/02