Di huyện tapen negar Bù Gia Mập, labik hu taneh pala phun pa-ok blait praong di tỉnh Bình Phước daok chreih chrai duan mek asar pa-ok blait di rilo bein. Dom menuac pataom mek pa-ok blait ndom klao bui sambai brei moh bruk chreih chrai ngak bruk di tuk akaok thun.

Sang sa-ai Điểu Thân daok di xã Phú Nghĩa daok tame bein pataom mek asar pa-ok blait meng harei 4 bingun Tết (lac harei 13/2). Sa-ai Điểu Thân khan lac: "Bein pa-ok blait sang dahlak hu meteh ha, min thun ini hu baoh jruh aval tuk Tết nan ye abih gauk dalam sang tame bein duan mek patuah jamo akaok thun. Hadei di tuk duan mek abih bein sang di drei, sang dahlak nao duan mek pa-ok blait mbang pah ka dom sang hu taneh pala pa-ok blait praong piah duah jien".

Jeng tui panuac khan di sa-ai Điểu Thân, yaok thun tuk tal bilan paik mek pa-ok blait, sang sa-ai langiu di duan mek pa-ok blait di bein sang, daok hu nao duan mek mbang pah piah duah jien. Abih bilan pa-ok blait, diuk pasang sa-ai nao mbang pah kuah katak cao su.

Daok sang sa-ai Hùng Lộc daok di xã Đức Hạnh jeng tame bein meng harei 6 bingun Tết (lac harei 15/2) piah paik mek dom baoh akaok bilan. Meng taneh pala labaih 4ha phun pa-ok blait praong meng 15-25 thun daok tabiak baoh jaik tasak, daok 1ha phun pa-ok blait pagam dhar praong labaih 5 thun daok paik baoh hu dom pluh kg. Sa-ai Hùng Lộc khan lac: "Bilan pa-ok blait thun ini paik njauk di tuk hadei Tết nan ye biak lagaih ka sang di tuk akaok thun. Ini lac pa-ok blait akaok bilan nan ye baoh takik. Tui kuhria mboh dahlau, meyah langik lagaih, akaok bilan 3 pa-ok blait tasak rilo saong jruh rilo".

Dalam bui sambai chreih chrai paik mek akaok bilan pa-ok blait, hu oh takik sang jeng daok duh hatai ka yaom kaom tuk akaok bilan yaom biar jang dom thun dahlau. Tui panuac khan di ong Điểu Hồng Khanh daok di xã Đức Hạnh, sang ong paik mek asar that hu labaih 200kg min tok pablei hu yaom 24.500 đồng sa kg, lap jang duk haong yaom labaih 26.000 đồng sa kg tuk akaok bilan thun blaoh. Sang ong Điểu Hồng Khanh jeng yau rahra pala pa-ok blait caong khin lac anak tal yaom blei glaong jang piah hu jien mek tame saong hu phun jien piah pala veik dalam dom thun anak tal. Urak ini, bilan paik pa-ok blait bahrau tame mbang camereip. Meng bruk chreih chrai paik mek pa-ok blait akaok thun di rilo labik dalam bhum pasak pa-ok blait Bình Phước, caong lac meda mek hu rilo jayah bahrau.

Akaok kapul urang ngak nong xã Đức Hạnh, huyện Bù Gia Mập brei thau, tukvak tapa, gah ngak nong palei bhian kakei mikva iek glang bein, nan ye jaik abih bein, phun tamuh siam, takik hu halak halin palai kaik. Bhap bini tame bilan akaok thun dalam chreih chrai tame ravang bein saong paik mek mbang camereip.

Urak ini, tỉnh Bình Phước hu taneh pala pa-ok blait labaih 152.000ha, samu meteh dom taneh pala pa-ok blait di taneh ia, haong labaih 1.400 labik ngak asar pa-ok blait, ba bruk ngak gam gam brei ka labaih 50.000 urang ngak dalam palei saong langiu tỉnh. Taneh pala phun pa-ok blait mboh rilo di dom huyện Bù Đăng, Bù Gia Mập, Phú Riềng saong Đồng Phú.