Dom thun jaik di ini, yaok thun palei bingu Sa Đéc hu taduan raok yaok ratuh rabau tuai meng grauk labik mai tal. Piah patagok prein dui pachreih saong ngak brei hu rilo jang pandap du lịch duh ka tuai mai ravang iek, dom urang ngak nong khang hatai salih jalan pala saong pabak bingu kiểng lagaih haong hatai takre di urang me-in bingu. Dalam nan, bruk pamaong tal pala tabiak dom janih bingu kiểng sit sot ngak pandap alin hadiah daok jeng sa dalam dom jalan nao bahrau daong ka urang nong tagok jien mek tame.

Jaik 2 thun ini mai, sa-ai Đặng Võ Trần Khang (umo 20 thun) daok di khóm Sa Nhiên, phường Tân Quy Đông, ban sit Sa Đéc khang hatai salih meng bruk pala dom janih phun praong ngak công trình tapa pala dom janih phun kiểng mini. Meng jaik 1.000 pandap di yaok ratuh janih bingu karei di gauk, oh cang hu rilo menuac ngak, sa drei sa-ai Khan meda iek hu abih labik bein ini, meng bruk pala, iek glang tal pablei pandap. Jien mek tame di gian hàng sit ini jeng tagok jang dom mbang duk haong bein bingu dahlau daih, bruk pablei salih jeng rah tabiak luac thun, oh daok pagam pambak tame bilan pala yau dahlau daih.

Labik bein di sa-ai Hồ Thị Cẩm Tuyên daok di jalan bingu Sa Đéc dalam phường Tân Quy Đông, praong dom pluh mét vuông min hu tal yaok ratuh janih phun kiểng karei di gauk, meng sen đá tal phun daruai, kiểng hala... hu phun praong nde anek tangin. Yaom pablei jeng hu biak rilo, hu tuk urang me-in tok buh tabiak 5.000 đồng lac meda blei hu 1 phun daruai atau sen đá. Tui janih, tui thaik thaok di nyu bo yaom pablei karei di gauk, hu phun yaom tal sa triệu đồng.

Meng hu rilo janih, mekre meta saong mbuan lagaih dalam pilih ruah piah blei bo jien mek tame meng pablei salih dom janih phun bingu biak sit ini hu daong ka sang sa-ai Tuyên hu jien mek tame rilo. Sa-ai Tuyên khan lac: Pala dom janih phun sit sot ini abih takik taneh, abih takik prein iek glang. Dom janih pandap ini hu biak rilo janih, yaom kaom jeng hu rilo yaom karei di gauk, mbuan ka urang blei, nan ye pablei biak laik.

Urak ini, jaik abih dom janih bingu kiểng mini jeng hu urang ngak nong pablei bingu Sa Đéc pabam pajaih, pala saong pablei ka tuai. Dom janih bahrau jeng hu blei mai piah pabak parilo janih pandap jang. Dom phun kiểng mini di pak ini hu pablei tui 2 janih lac phun hu chậu atau phun anek oh hu chậu. Dom baoh chậu sit, mekre haong rilo sambo màu, thaik thaok jeng karei di gauk nyu ngak brei phun mekre jang.

Amuk Nguyễn Thị Ngọc – akaok jabat Kinh tế ban sit Sa Đéc brei thau: “Piah patagok gah pandap bingu kiểng, dak harei dak hu rilo jang dom janih bahrau, pablei ka tuai mai ravang iek, kol dahlak ba tabiak jalan ka urang nong lac, gam pala phun pabak ka dom công trình, gam pala dom janih phun sit sot piah pablei ka tuai du lịch. Daong ka urang nong hu jien mek tame rilo jang, gam ngak bahrau mbaok meta palei bingu Sa Đéc, ini jeng lac jalan piah yaih khan thaot binguk bingu kiểng di ban sit tal tuai damuai atah jaik”.

Meda mboh lac, meng bruk salih bahrau saong sami samar di urang ngak nong, urak ini, bingu kiểng di urang ngak nong Sa Đéc oh lac daong ngak brei mekre jalan phố, đô thị bo daok jeng dom janih pandap alin hadiah dalam kadung pandap di tuai tuk mai tal palei bingu sa rituh thun./.

Urang lang: M.Phuong – 30/7/2022