Hu rilo puk palei mek hu tanut palei pala bahrau

Ong Nguyễn Văn Khôn daok di xã Hưng Thịnh, huyện Trảng Bom lac sa dalam dom urang nong naih gheih hu Kapul urang nong pakat negar alin brei harak meyaom, pok angan lac urang nong ngak mbang, pablei salih joi pakat negar tuk vak 2017-2022. Ong jeng lac kreh camin ka urang nong padang mbang ngui tuk padang Cty CP Đầu tư dược liệu ETZ song bein phun jru “xáo tam phân” prong abih dalam taneh ia. Tea kadung halang “xáo tam phân” kayua công ty ngak tabiak lac pandap  OCOP di  tỉnh; pablei hu rilo di dom siêu thị, nhà thuốc, labik du lịch…

Gam song nan, dok hu rilo urang nong naih gheih yau ye: muk  Nguyễn Thị Bích Lệ, Yam ndok HTX Dịch vụ ngak nong Trường Phát, huyện Nhơn Trạch padang hu bhum nguyên liệu prong labaih 70ha pala cariak, hu 13 pandap OCOP meng cariak mek hu  3, 4 patuk. Ong Lý Minh Hùng, Yam ndok HTX Thanh Bình, huyện Trảng Bom padang hu bruk ngak kinh tế tuần hoàn, oh lac pablei tabiak negar langiu boh patei that, pandap ngak meng patei, bo dok pandar hu phun patei ngak bẹ patei bluh thu piah ngak tabiak dom pandap thủ công mỹ nghệ song pandap pandar dalam sang siam ka alam môi trường …

Gam song dom rik dong gah kinh tế, dalam tuk vak 2017-2022, urang nong di Đồng Nai hu rilo rik dong gah pandap panda, harei ngak dalam bruk padang ngak palei pala bahrau. Abih tih pok jien urang nong rik dong jiak 178 tỷ đồng song jiak 73.000 harei ngak piah pasiam labaih 1.468km jalan palei; padang ngak khang kajap 690km krong ribong, ngak labaih 1.000 danak dak điện piah pandar, piah sản xuất… Abih di nyu nan lac, urang nong hu brei labaih 215 ribau m2 taneh piah padang ngak dom danak dak duh ka bhap bini.

Piah ka dom bruk ngak di urang nong hu tame dalam jang, pambak prong grauk labik dalam bhap bini, Kapul urang nong tỉnh hu tacei pato Kapul  urang nong dom pakat kham merat pathau khan, peih ngak dom sarak di Kapul pakat angaok ka bruk urang nong pakacah gauk ngak mbang, pablei salih naih joi gam song danak dak padang ngak palei pala bahrau, meng nan patagok pren khang di bhap bini. Dom bruk dui pachreih hu rilo urang jakar,  urang hội, urang nong hu mbaok tame, jeng bruk ngak gam gam, rik dong prong tame bruk patagok  kinh tế - xã hội di puk palei.

Kapul jeng hu patagok bruk pathau khan dong paglong ilamu ka urang nong pandar công nghệ tame bruk ngak, thau cambaih dom sarakdi Đảng song hukum di karja ka bruk ngak nong, urang nong, palei pala. Peih bruk salih bahrau jalan pan akaok, ba jalan, tacei pato bruk ngak, salih pakhang tapa bruk langyah, dong urang nong ilamu kỹ thuật song pandar công nghệ bahrau, pato bruk ngak… piah dong palagaih ka dom boh sang urang nong patagok bruk ngak mbang yam tagok ngak kaya meda khang kajap.

Ong Trương Đình Bá, Akaok kapul urang nong  xã Lâm San, huyện Cẩm Mỹ lac sa dalam dom urang nong ngak tabiak amriak kalu hữu cơ. Urak ni, labaih  2ha amriak kalu di sang ong hu pok brei angan amriak kalu hữu cơ. Ong Bá jeng lac urang kham merat jak ba urang nong padang Kapul pambuak bruk ngak amriak kalu hữu cơ hu  56 urang hu mbaok tame  ngan song taneh prong labaih 64ha.

Ong Nguyễn Văn Phong, akaok dhar kapul urang nong palei 3, xã Phú Lập, huyện Tân Phú dang tabiak jak ba urang nong tame padang  HTX Dịch vụ rong pabe Văn Phong. HTX hu 27 urang, abih tih tapol pabe  hu labaih  1 ribau 700 drei  song  40 drei pabui glai pajaih menek, daok ngak hu tani tanat, ba mai kein laba siam ka dom urang dalam HTX.

Brei thau ka jak jeng di bruk pathau khan, jak ba urang nong, ong Nguyễn Đức Nước, Akaok kapul urang nong  xã Bảo Hòa, huyện Xuân Lộc brei thau, Bảo Hòa lac labik camereip abih di  huyện Xuân Lộc mek hu angan xã palei pala bhrau kiểu mẫu. Piah hu yau nan, meng hu karja palei patagok hu bruk ngak di urang nong. Dalam nan, kapul urang nong  hu ngak siam bruk jak ba, pathau khan lac bruk biak prong piah ka bhap bini rik prein tame, sa hatung hatai haong gauk dalam bruk padang ngak palei pala bahrau./.

Urang lang: Hanipha- 22/10