Dom thun dahlau di tukvak ini, nao tal palei mai kanyik Vĩnh Phú lac gaok biak rilo urang blei salih, doanh nghiệp mai tal bein pasang iek, kakei blei piah pablei, caik parang tết atau alin ka gauk. Min thun ini jaik abih dom po bein ka oh taduan hu panuac kakei blei. Piah khik takai tuai bhian randap, dom po bein oh tagok yaom, yaom lac phun jien buh tame, khak drak tagok glaong.

Ong Huỳnh Văn Tấn (daok di khu phố Tây, phường Vĩnh Phú) hu labaih 1.000 got phun mai brei thau, dom thun dahlau, tukvak ini urang mai blei biak rilo. Thun ini bruk ngak mbang kan kandah nan ye prein blei meda trun.

 “Yaok thun tukvak ini urang mai kakei blei tal Tết min thun ini biak joa. Bein mai di sang ong rilo meng pablei ka urang bhian randap, urang blei salih kak kajap rilo thun. Meng bhian randap, Tết tal dom urang ini mai blei. Thun ini, prein blei trun min jia lac jeng hu menuac blei, hu jien mek tame min oh glaong”

Dom piluh thun kak kajap haong bruk pala mai, min ka oh mboh tuk halei bo dom po bein di palei pala mai Vĩnh Phú daok mbang ndih oh hu yau urak ini. Thei jeng haduh hatai lac oh hu thei blei ye oh hu jien piah sangka iek glang ka phun saong jien cai pandar dalam tuk Tết. Po bein hu nao duah jalan pablei tabiak meng jalan ieu da-a, yaih khan di mangaok zalo, facebook di drei saong dom nyaom bingu mai, phun cảnh. Langiu di nan, urang daok sua tangi gauk ka Harei pataom bingu xuân dom tinh, ban jaik taphia piah tut angan hu mbaok tame. Ong Trương Vĩnh Tòng (daok di khu phố Đông, phường Vĩnh Phú), urak ini daok sangka iek glang 300 got phun mai khan lac : “Dom thun dahlau pablei 50-60 got, darak pasa thun ini tok caong pablei hu 30 got lac rilo paje. Tok caong hu yau nan piah pabak viek k ajien blei khak, jru halak, jien pah manuac ngak ye oh pabak hu phun jien dalam 1 thun buh tabiak. Min kayua mboh darak pasa oh joa kandang nan ye tok sahaneng pablei 30 phun piah pabak hu hasit phun jien buh tabiak”

Bruk darak pasa phun mai joa gindang, dom urang mai blei salih ndom lac, taphia di bruk kinh te gaok kan kandah ye daok kayua bingu, phun cảnh ja ngan haong rilo mẫu mã, kiểu dáng, maraik gauk haong phun biak. Anak bruk nan, urang blei salih jeng huac, oh khin caik jien takai bo daok cang jaik Tết maong iek bruk yau habar piah kuhria veik. Amuk Nguyễn Ngọc Hà, urang blei salih di ban Thủ Dầu Một, tỉnh Bình Dương brei thau lac:  “Prein blei meda trun dut saong yaok thun. Urak ini ka oh ndem hu tuk halei hu urang kakei blei atau mboh darak pasa chreih chrai hasit ye meng mek pandap, daok urak ini oh ka caik jien takai rilo”.

Thau hu dom kan kandah di urang nong, urak ini, Kapul urang ngak nong di ban Thuận An, tỉnh Bình Dương daok ba jalan ngak ka dom pakat, dom gah peih praong dom gian hàng di Harei pataom bingu Xuân dalam ban piah ka taong abih dom sang bein hu parang tabiak, yaih khan pandap bingu. Kapul jeng hu mayaih khan dom đầu mối mai rivang iek, blei bingu mai pak di bein.

Ong Nguyễn Thanh Giàu, Akaok Kapul urang ngak nong ban Thuận An brei thau, langiu di palei mai Vĩnh Phú, dalam ban daok hu rilo sang di 4 phường karei pala bingu mai pablei salih. Thun ini, takik đơn hàng, dom po bein gaok kan kandah, nan ye Kapul daok daong ka urang nong hu mesraiy phun jien piah sangka iek glang phun mai cang tal dom vụ hadei. Kapul jeng daok peih bruk pambuak gauk piah ka urang nong hu pabak ilamo pala mai.

 “Yaok thun, Kapul jeng hu peih dom tal pasram ilamo ka bingu mai, phun kiểng. Kapul jeng hu daong ka urang nong hu mbaok tame dom kalup, kapul bruk ngak, ba labik ma-in ka dom urang dalam kapul hu hatai takre ka phun cảnh, bingu mai; gam haong nan jeng peih bruk nao rivang dom bruk ngak hu nang suat glaong di dom tinh, ban jaik taphia piah hu pabak ilamo”.

Palei pala bingu mai Vĩnh Phú bhian hu tukvak danei angan tuk hu yaok ratuh baoh sang pala mai. Dom thun jaik di ini, mblang taneh ngak nong takik veik nan ye dom urang pala mai dalam palei tok daok dom piluh baoh sang. Pala mai urak ini oh hu laba rilo, min dom menuac luac rai kak kajap haong phun mai jeng oh klak bruk, kayua ini lac bruk bui sambai saong bruk daok tavak hatai hoang nyu. Piah lagaih haong bruk, rilo sang salih tapa pala mai bon sai di angaok mblang taneh mbiah di sang drei./.