Lac bhum taneh pala durian dane angan di Tây Nam bộ, rilo sang urang nong daok di cù lao Tân Phong - Ngũ Hiệp (huyện Cai Lậy, tỉnh Tiền Giang) brei thau, durain daok hu yaom biak glaong, meda lac ka oh tuk halei hu yaom glaong yau ini. Durain Ri-6 janih 1, pablei yaom 200 ribau đồng/kg. Rilo vựa di ban sit Cái Bè daok blei yaom 230 ribau đồng/kg, glaong jang jaik 4 mbang dut saong thun blaoh.

Hu maong lac Pasak baoh kayau di gah maraong negar, tui yaok pataom meng Sở ngak nong saong patagok palei pala tỉnh Tiền Giang, kuhria tal akaok thun 2023, tỉnh ini hu 33.000ha durain, jaik tal bilan paik baoh haong sản lượng tagok tal jaik 300.000 tấn. Langiu di bruk hu urang blei rilo, bruk Trung Quốc pabak mã số durain ka dom labik di Tiền Giang nyu ngak brei yaom baoh kayau ini tagok glaong, dui tui yaom durain di dom tinh karei jeng tagok tui.

Oh lac durain saoh, rilo janih baoh kayau karei di Tây Nam bộ jeng daok tagok yaom khang. Dalam nan, li-u jeng tagok rilo, ba jien tame rilo ka urang nong. Meng akaok thun tal ini, yaom li-u trun tagok meng 60-65 eibau đồng sa pluh (12 baoh), lac labaih 5.000 đồng sa baoh. Mayah dut saong 6 bilan dahlau, yaom li-u glaong jang 2 mbang mateh. Meng yaom tagok yau ini, li-u hu ba jien tame rilo ka urang nong, kayua di rilo tinh yau ye Tiền Giang, Trà Vinh, Vĩnh Long saong abih di nyu nan lac Bến Tre, li-u lac phun hu pala rilo.  

Dalam tuk nan, thanh long, sa janih phun pala palei tapa negar langiu di Tây Nam bộ (pataom rilo abih di tỉnh Long An saong Tiền Giang) jeng hu yaom biak glaong, labaih 30.000 đồng sa kg janih sa. Janih 2 jeng hu yaom meng 22.000 đồng tal 25.000 đồng sa kg.

Hu sản lượng praong ka 2 dalam taneh ia (hadei di tỉnh Bình Thuận), bhum thanh long di huyện Châu Thành (tỉnh Long An) saong Chợ Gạo (Tiền Giang) hu ba jien tame praong ka urang nong dalam tukvak tapa. Min, yaom thanh long bhian trun tagok khang ngak ka urang pala oh sanang hatai. Meng akaok thun 2023, yaom thanh long tagok saong daok di tanut glaong gam haong bruk daok tame bilan paik baoh lac bruk bui sambai ka rilo sang pala.

Ong Cao Tấn Hưởng - Phó akaok UBND huyện Chợ Gạo (Tiền Giang) brei thau, di pak ini hu jaik 7.000ha thanh long ngan haong labaih 80% daok tame mbang paik baoh. Dom bilan dahlau, hu rahtabiak bruk urang nong kaoh klaak bein thanh long kayua yaom biak bier nan ye urak ini, karja palei daok kham merat pathau khan ka urang nong khik veik saong patagok bein phun thanh long. Urak ini thanh long di Chợ Gạo hu Cục Sở hữu trí tuệ (Mintri Ilamo saong Công nghệ) pabak harak khik caga angan tập thể. Jaik abih dom bein pala thanh long di Chợ Gạo hu urang mai blei, parabha janih saong ba tame dom kho caik dahlau di tuk pablei tabiak negar langiu.

Huyện Châu Thành (tỉnh Long An) jeng lac bhum pala thanh long ngan haong mblang tame samu haong huyện Chợ Gạo. Yaom thanh long tagok, trun pambak tapak tal raidiuk di yaok rabau sang pala. Ong Nguyễn Quốc Trịnh – akaok Kapul thanh long Long An brei thau, yaom thanh long tagok meng 12.000 đồng sa kg tal 30.000 đồng sa kg ba mai rilo kein laba ka urang nong. Hadei di sa tukvak suai lavik gaok kan kandah kayua yaom bier, urang pala thanh long hu bui sambai saong taduan hu rilo jak jeng meng janih phun ini.

Tui ong Nguyễn Thiện Chí - Phó Yam ndok Sở Ngak nong saong patagok palei pala tỉnh Long An, sa tukvak suai lavik meng bloh, thanh long yaom bier ngak ka rilo sang urang nong khat lahik, hu sang kaoh klaak phun pala ini. Kayua yau nan ye, gah ngak nong di palei daok duah jalan daong ka urang pala thanh long meda cak rok patagok khang kajap. Dalam nan pataom tame khik kajap darak pasa pablei tabiak negar langiu, daong brei masaiy phun jien tuk urang nong caong hu saong pathau khan piah  urang nong khang hatai, pambuak haong phun thanh long, oh kaoh klaak tuk trun yaom./.