Ong Nguyễn Trường Quang, urang taong ikan daok di xã Phước Hưng, huyện Long Điền hu dua sruh gilai tauk pasei tui Sarak 67 ba trun ia saong ba tame pandar di puac thun 2016 haong yaom jien jien mesre di gilang pariak abih tih labaih 35 tỷ đồng. Yau nan min, hadei di dom mbang tabiak tasik ong brei gilai ndih ngaok taneh. Ong Quang khan lac, tal thun 2022, ong njauk pablei jaik abih taneh riya blaoh oh ginup jien bayar sre. Tal urak ini, ong tabiak Hà Nội peih radaih taxi duah jien ka rai diuk.

Daok sa-ai Châu Văn Nhỏ, daok di xã Phước Tỉnh, huyện Long Điền jeng hu sa gilai hu ngak tui Sarak 67 piah duh ka bruk pajeng ba, pablei salih xăng menyek, ba tame pandar meng thun 2017. Tal puac thun 2019, jabat chức năng oh brei adat ka gilai di sa-ai Nhỏ pajeng ba xăng menyek, bo tok hu pajeng ba  ia khan mbaik saong kaya ikan, nan ye bruk ngak mbang gam gam khat lahik. Sa-ai brei gilai tagok angaok ar kayua oh hu jien buh tame ka bruk tabiak tasik. Urak ini, sang sa-ai daok tavak sre di gilang pariak 19 tỷ đồng.

  “Gilai di dahlak lac gilai duh ka bruk nao taong chap ikan, gilai atah 55 mét, pajeng hu 2.000 tấn pandap bo brei harak adat taong chap ikan habar hu? Ngak  gilai piah pajeng pandap bo brei pajeng manuac, gilai peih hu 2 thun ye brei ndih angaok ar kayua tok brei pajeng ia khan. Dahlak lac urang njauk bala di Sarak 67, klau thun ini gilai padeih, min sre njuak bayar ginup.”

Tui ong Nguyễn Đức Hoàng, Phaok  Akok Chi cục kaya ikan dalam ia tỉnh Bà Rịa- Vũng Tàu, bruk ba tal gilai hu ngak tui Sarak 67 ngak bruk oh hu laba lac kayua jien buh tabiak ka sa mbang tabiak tasik dak harei dak tagok, langik dak harei dak oh lagaih, kaya ikan dalam ia daok takik, bruk taong chap ikan oh daok lagaih…ba tal rilo gilai ndih angaok  ar, oh bayar hu sre gilang pariak.

Tui Gilang pariak Karja Dhar Bà Rịa – Vũng Tàu, kuhria tal harei 30/4/2022 dalam tỉnh hu 69 gilai mesraiy phun jien ngak tui Sarak 67 saong yaom jien abih tih labaih 1.017 tỷ đồng. Tal urak ini, dom gilang pariak birau mek veik hu labaih 210 tỷ đồng. Urak ini hu 4 gilang pariak dalam tỉnh hu pathau 8 po gilai 67 piah mek veik sraiy.

Ong Trần Thiên Trí, Phaok Yam ndoc Gilang pariak dhar  tỉnh Bà Rịa- Vũng Tàu brei thau, Rajaei njauk ramik pasiam veik Sarak 67 ngan haong gilai duk ka bruk taong chap ikan:  “Anak meta meyah lang talaih ye brei talaih ka gilai duh ka bruk ngak ikan. Urak ini, gilai duh ka bruk taong ikan oh pabak hu xăng menyek brei ka gilai 67 bo meda pabak ka taong abih dom gilai taong ikan. Kayua yau nan ye, caong khin Rajaei pasiam veik Sarak 67. Gilai nao taong ikan hu meng duah hu jien, bayar sre ka gilang pariak, tui jien mek tame gah gilang pariak  meda ramik veik sa mbang gilac brei ka urang taong ikan, meda dui atah tuk vak bayar sre”.

Piah daong ka urang taong ikan yam tapa kan kandah, daok hu tabiak tasik, tỉnh Bà Rịa- Vũng Tàu njauk pambuak bruk saong dom gilang pariak hu mbaok tame danak dak Sarak 67 duah jalan langyah ka urang taong ikan. Langiu di nan, Mentri Ngak nong  saong Patagok palei pala njauk pambuak bruk haong Mentri Công thương saong dom mentri, dom gah pambuak tal samar lang lataik dom kan kandah ka gilai duh ka bruk ngak ikan hu ngak birau tui Sarak 67./.

Urang lang: Ai Nghiem – 03/06/2022