Khan brei thau ka bruk ba cà phê Viet tabiak grauk labik di dunya, doanh nhân Nguyễn Ngọc Luận, urang Việt Nam daok di Australia, CEO Meet More Coffee brei thau, nan lac sa jalan ngak biak cuang kandah, glaih glar.

Thun 2017, cà phê Meet More bahrau hu tabiak rai, bruk daok pamaong tal lac tame hu darak pasa kan tame, oh lac pablei vil val di dom taneh ia jaik taphia. Hadei di 4 thun glaih glar pablei tapa Australia, Mỹ…, tame tapak dom labik pablei sit, praong di dunya. Tui ong Luận, dom labik pablei praong lac urang di taneh ia nan, oh sangka tal pandap panda Viet Nam, abih di nyu nan lac dom angan je bahrau. “Kol dahlak brei salih jalan ngak, pilih dom labik pablei lac dom doanh nghiệp Việt Nam daok diukrai saong pablei salih di taneh ia nan. Dalam thun camriep, kol dahlak duah meng Úc, Mỹ, CH Séc, Nga, Hàn Quốc… Tal urak ini, dalam 10 taneh ia hu pandap di Meet More ye hu tal 80% lac dom labik pablei di Việt Nam saong biak jak jeng. Kol dahlak duah hu 1 labik pableidi châu Âu lac urang Việt Nam daok diukrai saong ngak bruk di pak nan, top 10 công ty châu Âu, doanh số biak praong, pablei dalam châu Âu”.

Jeng meng kham marat yaih khan pandap Việt, ong Trần Hải Linh – akaok Kapul VKBIA di Hàn Quốc brei thau, Kapul hu jalan pataom prein tame peih bruk pablei pandap Việt Nam di Hàn Quốc; pambuak haong po doanh nghiệp lac dom urang asal Việt di pak ini piah ba pandap Việt Nam tame dom siêu thị, nhà hàng kayua urang Viet ngak po atau siêu thị ASEAN bo Kapul hu pambuak bruk: “Kol dahlak lac dom urang daok di negar langiu lavik thun, tuk halei jeng caong lac gah tangin pambuak atah di dom doanh nghiep di TP.HCM saong Việt Nam dalam bruk pambuak haong dom kapul, doanh nghiep di Hàn Quốc piah daong ka pandap Việt Nam pabak hu tanut chuan. Praong abih lac pandap nan di Việt Nam, ba mai yaom glaong kinh tế siam ka Việt Nam saong ba mai dom yaom glaong di anak mata ka doanh nghiệp Việt”.

Dalam tukvak kan kandah meng blaoh, hu bruk salih bahrau biak praong di darak pasa, rilo urang Việt daok di negar langiu mai veik palei negar buh jien tame ngak mbang min bruk pambuak njauk klaih klaoh. Tui ong Trần Trọng Hùng – Akaok Kapul Doanh nhân urang Việt daok di Ba Lan, caong cak rok patagok pandap Việt Nam di châu Âu, doanh nghiệp Việt brei buh prein duah thau darak pasa, mẫu mã, chất lượng. Daok doanh nghiep urang Việt di negar langiu, biak caong hu bruk daong dalam pablei salih, hu pambuak gauk jang haong doanh nghiep dalam taneh ia. Ong Hùng caong lac: “Kol dahlak kurang thau biak praong ka dom pandap bo urak ini Việt Nam daok biak khang. Meng ilamo pablei salih 30 thun di Ba Lan, dahlak caong hu daong ka dom doanh nghiệp dalam taneh ia, saong meda taduan hu bruk daong taom gaok, duah jalan ngak buh jien tame. Kol dahlak meda pabak công ty roh duah darak pasa saong daong duah gah pambuak bruk”.

Tuk pandap Viet  tabiak negar langiu, oh daok lac bruk “urang Việt Nam pandar pandap Việt Nam”, kayua dom darak pasa kan tame yau ye Hàn Quốc, Nhật, Australia... atau dom taneh ia châu Âu, Mỹ jeng hu adat karei di drei, biak catang, njauk pabak hu dom tanut chuan nan meng meda daok hu suai lavik. Meng labaih 5 triệu urang Việt Nam daok di dom taneh di dunya, ini lac labik pambuak bruk, labik pablei pandap Việt siam lagaih di abih. Ngak bruk oh kayua kein laba bo meng hatung hatain brei ka palei negar, dom urang Việt Nam daok atah palei negar, oh caong maong hagait jang, lac caong ka taneh ia dak harei dak cak rok patagok, piah urang mboh hadah mbaok mata jang ka halau gha, tuk ndem tal dua baoh panuac “Việt Nam”./.