Di kreih pandiak, ia meng jalan ba ia atah labaih 1km kayua rahra di palei Long Láy 2 saong Ba Tu 2, xã Ngọc Yêu, huyện Tu Mơ rông ba gauk ngak jeng daok hu ia nduac mai pruh la-an ka mblang hamu padai ia Đăk Kring praong 8ha. Jalan ba ia sit nan mek ia meng baoh craoh dalam glai, hu kuac raok rah tapen mbuan ceik. Di dom labik biar atau labik caong khin ia nduac tui hatai drei, urang mek phun đùng đình blaoh blah dua, mek abih hatai kreh ngak jeng  máng pambuak veik haong gauk, ba ia nduac tapa. Sa-ai A Thoát, akaok palei Long Láy 2 biak chreih chrai tuk ndom biai ka jalan ba ia sit biak gheih saong ba mai kein laba glaong di rahra 2 palei:  “Dua palei taom gauk ginum biai, pataom gauk ngak sa adit. Ba gauk ngak dalam jum pataom. Mikva ieu pataom gauk ngak piah hu ia pruh ka mblang hamu ini. Hu jalan ia mikva biak uan tabuan”.

Xã Ngọc Yêu, huyện Tu Mơ Rông hu 7 palei saong hu abih tih 1.700 menuac, dalam nan 98% lac urang Xơ đăng. Kayua mbon ceik pacang cakak, nan ye yaom lac hu tal 104ha taneh ngak padai ia min dom mblang taneh rilo meng sit sot, nan ye karja oh buh jien tame ngak dom danak dak thủy lợi praong brei ka bruk pala drak. Anak bruk yau nan, rahra dalam xã jak gauk ngak 19 jalan ba ia sit caga hu ia pruh ka 70ha padai ia. Ong Lê Văn Hoàng, Chủ tịch UBND xã Ngọk Yêu brei thau, meng hu dom jalan ba ia sit di rahra eng drei ngak, dom thun jaik di ini, mblang taneh padai ia di xã tuk halei jeng hu năng suất yau hatai caong. Tapa nan, rilo thun ini mai rahra oh daok pok panuac likau karja daong brah mbang tuk cang bilan yuak. Gam haong nan, rahra jeng kakei gauk khik caga glai piah khik ia ka mblang hamu: “Hatai sahneng di mikva urak ini ka bruk khik glai akaok halau piah khik ia pruh ka phun pala saong patagok phun jru ye hu mikva ngak biak siam. Mikva bhian nao pasang iek, abih di nyu lac di dom mblang taneh dahlau daih ngak puh ye urak ini pataom gauk pala veik phun glai”.

Dalam huyện Tu Mơ Rông, tỉnh Kon Tum urak ini hu 1.270ha padai ia, jaik 40 danak dak thủy lợi di huyện kayua Karja buh jien tame ngak, khik ginup ia pruh ka 780ha. Daok jaik 500ha daok veik di mikva Xơ đăng di 11 xã dalam huyện eng drei ba gauk ngak dom jalan ia sit piah hu ia pala drak. Ong Phạm Xuân Quang, Phó Chủ tịch UBND huyện Tu Mơ Rông brei thau, nao gam haong bhap bini, yaok thun karja huyện hu tacei pato dom xã brei urang jakar nao pasang iek jalan ba ia kayua bhap bini eng drei ngak. Dom jalan ia glut jaleih atau klaoh máng ia ye daong patau haong nding katak ka bhap bini pasiam veik. Meng ieu pataom hu prein khang di bhap bini, huyện khik hu bruk pala drak saong khik ginup brah mbang: “Huyện Tu Mơ Rông mbon ceik pacang cakak dom danak dak thủy lợi praong, abih rilo jien ndo. Nan ye mikva eng drei ngak jalan ba ia ye huyện tuk halei jeng pachreih ba saong daong palagaih ka mikva. Bruk ngak jalan ba ia ye taong abih dom xã dalam huyện jeng hu ngak. Dom xã nao mai kan kandah, taneh riya pacang cakak ye mikva jeng hu peih dom jalan ba ia. Tuk mikva hu hamu ia tani tanat ye khik hu ginup brah mbang saong takik bruk jah glai ngak puh”.

Meng thau kuhria caga, eng drei ngak yaok pluh jalan ba ia sit tame hamu, taneh ngak phun padai ia di urang Xơ đăng daok di huyện Tu Mơ Rông, tỉnh Kon Tum dak harei dak hu peih praong saong paglaong năng suất. Khik kajap hu brah mbang, dom thun jaik ini, 7.000 sang urang Xơ đăng di huyện Tu Mơ Rông khang hatai pala dom janih phun hu yaom kinh tế glaong, yau ye: cà phê palei la-an, sâm Ngọc Linh, hồng đẳng sâm, mắc ca… Tal urak ini, gam haong bruk oh daok sang eik lapa, yaok thun, huyện Tu Mơ Rông trun hu meng 6-8% sang kathaot, glaong jang bruk patrun kathaot bo tỉnh Kon Tum ba tabiak./.