Sa-ai Nguyễn Thị Chương (daok di phường 9, ban Vĩnh Long) chreih chrai lo tuk hu daong blah ao tah mekre, mbiah haong rup, lagaih haong umo thun di drei. Kayua sang kan kandah nan ye meng dahlau mai, sa-ai oh jhik blah ao tah bahrau halei. Tuk hu bruk nao halei sa-ai jeng oh hu ao tah piah cuk. Tuk nao tal "Tu ao tah zero đồng", sa-ai pilih ruah hu ka drei sa blah ao tah biak njauk hatai.

Amuk Lê Bạch Yến (daok di phường 9, ban Vĩnh Long) khan lac: “Dahlak trun puk palei jeng thau lac rilo adei sa-ai kumei kan kandah, biak takre ao tah min oh hu jien blei. Meng bruk ngak ini, dahlak caong rik prein daong ka rilo adei sa-ai kumei kan kandah hu blah ao tah ka rup drei. Yaok urang mai tal ini hu pilih ruah blah ao lagaih haong thait thaok di drei. Mboh dom sa-ai bui sambai saong iek praong pandap alin ini, dahlak chreih chrai lo tuk hu yam takai nao gam saong daong ka bruk ini”.

Meng hatai klah rabha saong anit ranam blah ao tah, rilo urang kumei hội viên kham merat rik daong, khik ramik bruk di "Tu ao tah zero đồng". Langiu di rik daong saong jak ba ao tah ka tu ao, dom sa-ai kumei daok bhian parabha janih, papah, ủi, jhik ngak pasiam veik saong pilih ruah dom blah ao tah piah alin hadiah ka dom menuac caong khin. Tal urak ini, Kapul urang kamei Phường 9 taduan hu labaih 3.000 blah ao tah, ba tal tangin hội viên, urang kumei kan kandah labaih 2.000 blah..

Urak ini, "Tu ao tah zero đồng" hu daong ka rilo hội viên, urang kamei hu blah ao tah mekre. Bahrau di abih, Kapul urang kamei huyện Vũng Liêm hu tabiak mbaok "Tu ao tah zero đồng" haong labaih 600 blah ao tah. Taong abih jeng hu ủi, parabha janih saong hu parang tabiak ka dom adei sa-ai kumei pilih mek.

Pan blah ao tah angaok tangin, dom urang kamei puk palei uan tabuan tuk mbang camereip hu ka drei sa blah ao tah. Amuk Phạm Thị Hoa (daok di ban sit Vũng Liêm) lac: “Dahlak thun ini umo 68 thun paje, sang kan kandah nan ye oh ka mbang halei jhik sa blah ao tah bahrau. Tuk nao mbang lakhah, dahlak nao nyim ao tah di dom adei sa-ai dalam palei. Harei ini, dahlak mai ini pilih ruah ka drei sa blah ao tah. Dahlak praong thun, thait thaok jeng kan cuk ao tah, min bui sambai lo kayua hu urang jakar Kapul daong pilih ruah hu sa blah ao tah sambo màu hijao, biak njauk hatai”.

Amuk Nguyễn Thị Hồng Thắm, Akaok Kapul urang kamei huyện Vũng Liêm brei thau, anak tal, Kapul urang kamei huyện Vũng Liêm kham merat jak ba, piah hu rilo ao tah jang, pambak praong bruk ngak tal dom chi, tổ, hội. Gam haong nan, Kapul patagok pathau khan tal yaok hội viên, urang kamei di puk palei piah rik daong, klah rabha brei ka gauk, urang halei hu labaih ye alin hadiah brei, daok urang halei kurang ye mai mek. Abih di nyu nan lac, Kapul bhian peih dom bruk dom danak dak ka dom hội viên, urang kamei cuk ao tah dalam dom tuk lễ, Tết, dom mbang pataom mbaok.

Amuk Nguyễn Thị Thắm, Phaok akaok Kapul urang kamei tỉnh Vĩnh Long brei thau, meng hatai caong pambak tabiak thaot binguk blah ao tah dalam bhap bini, abih di nyu lac dalam hội viên, urang kumei, Kapul hu peih rilo danak dak, daong palagaih ka dom hội viên, urang kamei hu mbaok tame. Gam haong nan, Kapul sangka tal dom adei sa-ai kumei daok di puk palei, bhum atah bayah, piah khang hatai cuk tagok rup blah ao tah tuk hu mbaok tame dom bruk praong, dalam nan, lac mai meng "Tu ao tah zero đồng". Tapa pathau khan, tal urak ini, hội viên, urang kamei dalam tỉnh abih drei pachreih tui, alin hadiah dom blah ao tah di drei, daong klah rabha piah ka dom hội viên, urang kamei kan kandah jang drei, hu cuk tagok rup blah ao tah./.