Dalam 7 paka piah hu pok brei angan lac “ban du lịch hacih di ASEAN” ye bruk khik ramik alam môi trường, jalan mbak hacih sa-at, siam mekre, karja saong rahra hu hatai sahaneng khik caga alam môi trường, khik ramik hacih saat jalan mbak lac 2 paka hu makna praong. Meng hatai kham marat dak padang ban hijao – hacih –  makre, Ban Vũng Tàu hu patabiak dom sarak patagok khik ramik trật tự, hacih saat alam môi trường. Meng hu yau nan, tal urak ini, di dalam ban hu abih tih rahra tut angan klaak nerak njauk labik, bruk pataom mek nerak dalam labik rahra hu labaih 98%. Amuk Nguyễn Thị Tiết Kiệm (umo 71 thun, daok di xã Long Sơn, ban Vũng Tàu) ndem lac: “Bruk neh rabha janih nerak yau ini lac biak siam. Dahlau daih rahra mek kadung nilon cuh, thak par tagok jhak ka prein yava lo. Meng harei neh rabha janih nerak tal urak ini, mikva thei jeng njauk hatai pachreih tui ye biak siam ka alam môi trường”.

 Piah paglaong bruk ngak di rahra dalam dak padang saong khik angan “ban du lịch hacih di ASEAN”, dom sang bac dalam ban Vũng Tàu jak ba anek saih paglaong hatai sahaneng ka bruk langyah, puh ramik nerak tachrauk tapa rilo jalan ngak, pagap yau bruk ngak “salih nerak mek pandap”, neh rabha nerak pak di tal bac saong di labik daoki. Adei Mai Hoàng Ngọc Trâm, anek saih sang bac Tiểu học Long Sơn, ban Vũng Tàu lac: “Khol adei mboh bruk neh rabha nerak tachrauk lac bruk ngak siam, daong ka sang bac, labik bac dak harei dak hijao – hacih – makre, abih gauk jeng hu prein yava siam jang. Tuk mai sang, khol adei jeng hu neh rabha nerak hữu cơ, nerak pandar gilac veik saong dom janih nerak karei”.

Tui ong Phạm Khắc Tộ, Yam ndok Mban khik ramik saong pato tacei du lịch ban Vũng Tàu, nerak tachrauk meng bruk du lịch di mblang tasik, abih di nyu nan lac di tukvak lễ, Tết biak rilo, ngak jeng dom thaot binguk oh mekre meta. Kayua yau nan ye, tukvak tapa, gah chức năng saong dom phường hu mblang manei hu peih rilo jalan ngak piah pasiam bruk klaak nerak yau ye pakauk manyum alak, mbia, klaak nerak di mblang tasik, gam haong nan jeng kham merat pathau khan ka rahra, tuai damuai… Meng bruk sa tangin saong gauk di tuai damuai saong rahra di pak ini, bruk klaak nerak bal glai ban glo trun khang, dom mblang tasik di Vũng Tàu urak ini tuk halei jeng hacih saat. Ong Phạm Khắc Tộ brei thau: “Dalam luac tukvak tapa, yaok harei kol dahlak hu pambuak haong gah công an, dom phường nao pasang iek, ieu kakei dom labik du lịch, sang pablei salih, tuai damuai ngak siam bruk pataom mek, puh ramik di mblang tasik. Hatai sahaneng di bhap bini jeng hu paglaong, urang jeng eng drei hu hatai saneng ngak hacih saat mblang tasik”.

Tal urak ini, di ban Vũng Tàu hu ma-om sambo hijao tal 12,3% mblang taneh, dalam nan hu phun hijao di jalan, dalam mblang bein di dom baoh sang saong labaih 400ha glai dalam ban. Di labik hu rilo manuac nao mai, labik ngak mbang pablei salih, nerak hu pataom mek dalam harei, oh huk bruk nerak pataom veik jeng mbuk. Amuk Nguyễn Thị Thu Hương, Phó akaok UBND ban Vũng Tàu brei thau, ban kham marat piah khik khang kajap angan “ban du lịch hacih di ASEAN”: “Kol dahlak pakauk bruk mbang manyum di mala mblang tasik, labik hu rilo manuac, pakauk bruk pablei salih di dom labik oh hu adat pablei salih, oh brei mek mbaok jalan, takai jalan piah pablei salih oh njauk adat. Gam haong nan, ban jeng bhian jak ba rahra, tuai damuai khik caga phun hijao, peih ngak Harei adit hijao yaok adit piah puh ramik dom kraong ribaong, mblang tasik”.

Ban Vũng Tàu ba tabiak jalan lac tal thun 2025, nerak tachrauk tabiak meng bruk pandar yaok harei, dom janih nerak kanjak jhak, nerak y tế hu pataom mek langyah taong abih; taneh pala phun hijao mek hu 7m² sa urang tagok; kham marat tal thun 2030, taneh pala phun hijao dalam đô thị mek hu 9m² sa urang tagok saong thun 2035 meda lac 10m² sa urang tagok. Jalan ba tabiak ini oh lac ngak jeng bruk cak rok patagok khang kajap ka ban bo daok brei mboh lac: ban Vũng Tàu njauk haong angan lac “ban du lịch hacih di ASEAN”./.