Pabah mbang negar pakat dunya Xa Mát lac sa dalam dua pabah mbang negar praong di tỉnh Tây Ninh hu rilo pandap panda tame tabiak negar yaok harei. Anak bruk pandap pakauk, pandap lậu hu ba tame dak harei dak rilo, gah chức năng hu ba tabiak dom jalan ngak piah pacang buôn lậu tapa pabah mbang negar hu khang kajap. Kadha vak di urang vak di rayo sap ndom VN ka Xa Mát – dang kajap di mangaok bhum taneh tapen negar.

Maong rah tapa meng akaok thun tal ini di pabah mbang negar pakat dunya Xa Mát oh ka hu bruk praong trak damak pambuak tal pandap lậu. Ong Nguyễn Nam Hồng Sơn, phaok akaok Chi cục Hải quan Xa Mát brei thau:

"Bruk buôn lậu daok hu mboh veik, abih di nyu lac di labik tapen negar Xa Mát, kayua jalan haluk tapen negar saong gah Cam Pu Chia lac bhum pala, ngak kaya nong. Nan ye bruk buôn lậu di bhum tapen negar Xa Mát tuk halei jeng mbuan rah tabiak khang. Min urak ini dom gah chức năng kham merat ba tabiak jalan pacang caga, nan ye bruk buôn lậu urak ini daok trun biar min jeng mbuan hu bruk pablei salih dom pandap pakauk tapa labik Xa Mát ini".

Jeng dreih yau dom đơn vị hải quan di pabah mbang negar karei karei, chi cục hải quan pabah mbang negar pakat dunya Xa Mát tuk halei jeng dang anak dom kan kandah dalam bruk pacang buôn lậu, pacang cakak pajeng ba suan hukum ma túy, pandap panda oh thau cambaih asal ba tame tapa jalan tapen negar bhian hu caik srau tame pandap pakauk haong pandap chính ngạch piah duah jalan tapa pabah mbang negar, dalam nan hu gam pandap pakauk. Kol nyu bhian salih jalan ngak, pandar rilo jalan bleik saleik karei di gauk, pambak tame dom jalan tiểu ngạch jalan haluk, jalan peih mangaok jalan tapen negar piah pajeng ba suan hukum pandap panda tapa jalan tapen negar piah plaih, piah nduac dauk bruk pasang iek di dom gah. Ong Nguyễn Văn Đạt, akaok kapul tổng hợp, Chi cục Hải quan pabah mbang negar Xa Mát brei thau:

Taong abih jalan tapen negar di Tân Lập atah jaik 35km, rilo jalan haluk, jalan peih, dom đầu nậu pataom pandap rah tui jalan tapen negar saong daok gah taneh Cam Pua Chia. Bhian pandap lậu di tuk melam, nan ye biak kan kandah dalam bruk pasang iek rah tui jalan tapen negar. Ka dua lac dalam Chi cục oh hu kapul pasang iek chuyên trách ka pacang buôn lậu nan ye bruk pacang buôn lậu lac kayua kapul tổng hợp dang tabiak ngak, menuac ngak bruk takik, labik praong nan ye biak kan kandah.

Thau cambaih dom mbuan lagaih saong kan kandah meng di akaok thun, đơn vị hu duah thau, padang danak dak bruk ngak praong saong ba tabiak dom jalan pasiam dom kan kandah, dalam nan pataom tame jhul khang salih bahrau adat ngak harak gar, pabak ginup pandap ka hải quan, salih bahrau bruk ngak, patagok dom jalan mesruh pacang caga buôn lậu, bleik saleik dalam pablei salih pak di tapen negar.

Langiu di nan, Chi cục Hải quan pabah mbang negar pakat dunya Xa Mát hu patagok bruk pambuak gauk klah rabha khau tin haong haong dom gah biên phòng, quản lý thị trường, công an saong tuk camereip mboh hu salih bahrau siam jang. Ong Nguyễn Nam Hồng Sơn – phaok akaok Chi cục Hải quan Xa Mát daok brei thau lac:

"Piah khik hu siam bruk pacang caga buôn lậu, gah hải quan brei ba tabiak dom jalan ngak bruk di drei. Langiu di nan, dom urang jakar tuk nao ngak bruk gah pasang iek pacang buôn lậu ye brei bhian ba dom khau tin tagok dom hệ thống phần mềm bruk ngak di hải quan piah thau dom khau tin."

Piah ngak hu jayah dom bruk bo dom pakat hu jao brei dalam thun 2022, Chi cục Hải quan pabah mbang negar Xa Mát daok peih ngak samu gauk, peih ngak khang dom jalan ngak, samar padang dom jalan pacang caga, mesruh pacang caga buôn lậu saong bleik saleik dalam pablei salih, rik daong pasang iek hu siam bruk pak di labik tapen negar, labik pabah mbang negar dak harei dak hu siam lagaih./.

Urang lang: M.Phuong