Urang kamei Thai tamia xoe biak gheih biak mekre 

  Xòe lac sa janih tamia di urang Thái ngan saong dom ragu tamia brei mboh ka dom bruk ngak di anek menuac saong hu ngak dalam adat cambat, ilamu, raidiuk saong bruk hit ngak mbang.

Nghệ nhân ưu tú Lò Văn Biến, umo jaik 90 thun, daok di bản Cang Nà, ban sit Nghĩa Lộ, tỉnh Yên Bái hu caik abih rai di drei ka bruk duah pataom, padang veik 6 ragu xòe meng kan, hu maong lac peih akaok ka dom ragu xòe karei. Ong Biến brei thau, dom ragu xòe hu nao tui urang Thái tapa dom rai mbiah tal harei ini. Tapa dom ragu xòe, daong brei mboh hatai khang oh huac kan kandah, rambah rambup, sahneng duah, tari taring, tacei ba dom rai urang Thái nao tal jalan diukrai khang kadang, hatung hatai siam mekre:

“Bruk jaik gauk hu rilo di abih meng pakat angaok pakat mala, urang taha, urang ranaih, khin jaik gauk ye brei hu xòe. Nyu brei mboh bruk samu gauk biak glaong, nan ye urang Thái hu bruk bui sambai yau ye ndam lakhah atau tagok sang bahrau, atau bruk bui sambai hagait nan, bo oh hu xỏe ye oh bui, oh sambai, oh jak jeng”.

Daok tui Nghệ nhân Điêu Thị Siêng daok di xã Nghĩa An, ban sit Nghĩa Lộ, urang Thái sahneng lac "oh xoè oh bui sambai, oh xoè padai oh siam, oh xòe likei kumei oh jeng diuk jeng pasang". Kayua yau nan ye, dalam dom bruk bui sambai halei, dom vòng xòe jeng hu peih praong tabiak. Talei rohim jum pataom bhap bini yau hu kak kajap jang, bruk hit hu siam mekre, mbuan lagaih jang:

“Dom ragu xòe jeng kayua ong muk drei caik veik, nan lac drap ar hu yaom glaong ngan saong dom rairah. Ragu  xòe yau lisei huak, yau ia menyum yaok harei”.

Tui Nghệ nhân Điêu Thị Siêng, xòe Thái hu rilo ragu, min jeng tabiak meng 6 ragu xòe meng kan. Dom ragu xòe meng kan oh njauk lac piah parang me-in bo daok ndung bak dalam nan taong abih  hatai sahneng ka jalan diukrai, jalan sahneng, ngak mbang ngak huak di urang Thái meng dom saman ini mai. Tuk tamia dom ragu xòe ini, urang kumei dara Thái ngui cuk tui meng kan, lac: khan, ao, cóm, khăn Piêu saong tuk nan, dom ragu xòe meng kan meng njauk, meng mekre saong hu suan yava di abih.

Bhum taneh Mường So daok dalam huyện Phong Thổ, tỉnh Lai Châu jeng hu thau tal lac labik tamuh tabiak dom  ragu xòe Thái meng kan. Tui panuac khan di ong Nông Văn Nảo, nghệ nhân palei Mường So, Xòe Thái hu thau tal haong 36 ragu, min hadah di abih, njauk ndom tal di abih lac dom ragu xòe du xuân yau: xòe nduan, xòe khăn, xòe kadhi, xòe nhạc, xòe vòng…

"Dahlau daih tamia xòe jeng biak mbuan, oh tui sa  jalan ngak halei, min lavik lavik harei, urang paglaong bruk tamia tagok. Ragu xòe bhian mboh saong jeng bhian randap, makna lac thei jeng thau xòe, nan ye jak gauk xòe, hadei di nan dui pachreih hu rilo menuac tame xòe".

Di tỉnh Điện Biên, dalam dom lễ Xên bản, Xên mường saong rilo bruk pataom mbaok rilo menuac yau ye payak praong, payak sit jeng hu tamia Xòe haong rilo janih yau ye: xòe vòng, xòe khăn, xòe kadhik… Kadha ini brei mboh bruk pambuak nao mai di ngak adat haong ngak Xòe Thái, abih 2 janih inem krung jeng daok hu mbaok saong daong pabak ka gauk. Alat ragam duh ka ragu Xòe bhian lac: tính tẩu, kèn loa, khèn bè, hagar, chiêng, chũm chọe, pí pặp, bẳng bu, mák hính... Dom alat ragam nan haong sap yava tabiak meng pariak cuk taom dar ka-ing di urang kumei Thái ngak jeng sap chreih chrai, rilo nhịp phách, yau ieu da-a menuac sia.

Tamia Xòe Thái brei mboh ka bruk mekre, ndung bak dom yaom glaong ilamu tamia, ragu ragam, daoh takơ, khan ao, pandap mbang huak saong praong jang lac ilamu di bhap bini urang Thái. Harei ini, tamia Xòe hu jeng bruk brei mboh hatai rap ar tuai, lac ilamu di urang Thái bhum Tây Bắc Việt Nam./.

Urang lang: Mousaphuong- 25/9