Mai tal xã Phước Đại harei ini, dom jalan haluk bak dhur mun pambuak dom xã, dom palei dahlau daih urak ini jeng hu ngak bahrau abih, mbaok mata di puk palei dak harei dak siam makre, hadah hadai. 

Saai Chamalea Thuần- Phó akaok UBND xã Phước Đại, huyện Bác Ái khan lac, 15 thun dahlau, urang Raglai daok di pak ini gaok biak rilo kan kandah kayua pala drak tui jalan meng kan oh lagaih, gam haong kraong ribaong sit sot jeng oh lagaih. Dom thun jaik di ini, kraong ribaong hu ngak pasiam, jabat chức năng gam daong phun jien gam pato tacei mikva ngak mbang nan ye raidiuk hu tagok jang: “Raidiuk di mikva mangaok ini hu salih bahrau. Dahlau deih mikva rilo meng pala drak piah mbang dalam sang. Urak ini mikva ngak mbang hu tagok, thau nao darak, thau pablei salih pandap panda, piah mek jien cai pandar dalam sang. Di pak ini jeng hu mikva Raglai pablei salih sit sot.”

Pagap yau sang diuk pasang saai K’tơ Suối saong saai Chamalea Thị Chung daok di palei Tà Lú 2, xã Phước Đại, biak jak jeng haong bruk ngak mek katut raong atah. Dahlau deih, sang saai Suối ngak padai, pala njam patam min oh ginup mbang kayua langik thu lagu, jit ruak. Hu urang jakar pato tacei, saai Suối khang hatai masaiy jien di gilang paraik piah blei pabui mai raong, bloh hadei di nan blei limo saong salih tapa pala phun bei plom. Jien laba meng raong pabui piah cai pandar dalam sang saong buh tame tapon limo, bein bei plom. Tui nan, mek katut raong atah, thun 2022, sang saai Suối hu jien mek tame labaih 200 triệu đồng. Saai Suối lac: “Pala dom phun bei plom, phun tangei, raong limo, pabui blaoh pablei salih. Phun bei plom yaok thun sa vụ, daok yaom kaom tui Cty blei, yaom glaong ye mikva hu laba hasit. Tuk camriep drei jeng masaiy meng Kanja, urak ini drei hu takai ngak mbang blaoh drei biyar veik phun jien ka Kanja, blaoh drei mek nan drei ngak mbang. Tuk nan drei masaiy 50 triệu di gah ngak nong.”

Tui saai K’tơ Phân – akaok palei Tà Lú 3, xã Phước Đại, hu tal labaih 95% baoh sang urang Raglai daok pak ini cak rok patagok bruk ngak mbang  meng raong limo. Sang hu takik jeng hu tapon meng 10-20 drei, sang rilo jeng hu tal labaih 50 drei. Bruk eik lipa di dahlau deih urak ini oh daok. Dom rai ranaih urang Raglai urak ini thei jeng kham marat ngak mbang, raidiuk hu siam makre jang: “Karja palei sangka daong palagaih brei masaiy jien piah raong glang, jao bruk khik glai, jeng ba jien tame ka baoh sang kuhria tal tukvak ini. Tal harei Tết, sang caga pabui, manuk piah sik ralaow blaoh parabha ka sang amaik, ame saong adei saai dalam sang mbang dalam 3 harei Tết.”

Dalam tukvak 2010- 2020, meng phun jien Trung ương saong puk palei, huyện Bác Ái hu buh tame labaih 570 tỷ đồng ngak 168 danak dak jalan mbak atah labaih 260 km. Dalam nan hu labaih 35 km jalan meng pasak huyện tal dom xã, tuh bê tông jaik 90 km jalan praong dalam palei saong tapa palei karei, ngak pakhang labaih 115 km jalan  tame hamu, tani tanat bruk pajeng ba pandap panda luac thun. Urak ini, dalam huyện hu taong abih 9 xã mek hu kadha jalan mbak palei pala bahrau.

 Huyện jeng hu ngak dom sarak an sinh xã hội yau ye: Danak dak daong sang daok tui Sarak 167 ka sang kan kathaot, Danak dak daong cak rok patagok bruk ngak mbang tui Danak dak bruk ngak negar ka patrun kathaot, palei pala bahrau, daong tapak ka rahra nao ngak bruk di negar langiu, pato bruk ngak, brei masaiy laba lap…

Ong Phạm Phùng Bảo Châu, Akaok UBND xã Phước Bình, huyện Bác Ái brei thau, meng dom danak dak daong di Kanja gam haong bruk tari tareng, kham marat di mikva Raglai, yaok thun xã trun hu labaih 5% sang kan kathaot. Dalam tukvak anak tal, palei daok daong ka mikva salih janih phun pala, daong phun jien piah mikva ngak mbang, pala drak: “Dalam xã prein khang rilo abih lac cak rok patagok bruk ngak nong, dahlau deih pala patei, pala đào, dom thun jaik di ini mboh lac phun mbang baoh lagaih haong langik tasik di pak ini. Abih di nyu nan lac janih phun hu baoh hu pasiu yau baoh kruac bhung kanduh hijao jeng hu labaih 200ha saong tuk camriep jeng ba mai kein laba kinh tế glaong.”

Amuk Cấn Thị Hà, Phó akaok UBND huyện Bác Ái brei thau, tal tukvak ini di dalam huyện hu 5 danak dak padang ngak kraong ribaong praong, pabak hu ia ka bruk pala drak dalam palei. Huyện hu rilo bruk ngak ka phun mbang baoh, raong limo, pabe, pabo, pabui meda hu pambak praong piah paglaong raidiuk di bhap bini: “Kol dahlak daok pambak praong dom bruk ngak hu kein laba bo bhap bini daok ngak, ka 2 lac pambuak haong dom yaom glaong di bruk ngak mbang, pala drak, ka 3 lac pataom tame pato bruk ngak saong ba bruk ngak. Daok bruk buh jien tame cơ sở vật chất ye buh jien tame dom danak dak bo rahra hu kein laba rilo abih yau ye danak dak kraong ribaong, dom sang bac piah paglaong hatai saneng di rahra. Kham marat tal thun 2025 dom baoh sang kathaot di dalam huyện daok labaih 20%, daok jien mek tame kuhria tui akaok menuac hu labaih 30 triệu đồng sa urang.”

Kuhria tal puac thun 2022, dom baoh sang kathaot dalam huyện Bác Ái daok labaih 40%, sang jaik kathaot daok labaih 8%. Huyện kham marat daong bhap bini salih bruk ngak mbang, pilih janih phun pala, athur raong lagaih, ba kein laba kinh te glaong piah patrun dom baoh sang kathaot daok labaih 20% di thun 2025.  

Dom jak jeng di Anh hùng Pi Năng Tắc haong dom ayut sahabat di thun 1961 mangaok bhum palei Bác Ái jeng daok miat dalam hatai di rahra pak ini. Urak ini, meng hatai kham marat, oh huak kan kandah, glaih glar, dom rai urang Raglai Bác Ái jeng yau rahra Ninh Thuận meda vak veik dom blah sajarah bahrau dalam zaman saron mbon, gam haong dom bangsa adei saai yam tagok dak padang raidiuk bahrau./.