Huyện Cẩm Mỹ hu rilo sang diuk meng bruk raong pabe. Dom harei ini, sang sa-ai Hồ Nàm Hỉnh (xã Lâm San) biak duh hatai kayua jien laba gilang pariak daok lac bruk kateik trak oh sit. Thun 2019, sang sa-ai Hỉnh padang sổ đỏ piah mesraiy 700 triệu đồng buh tame tapon pabe. Hadei di sa tukvak raong pabe, jaik di ini, sa-ai Hỉnh blei pabak tame 300 drei pabe tano haong yaom 160.000 đồng sa kg.

Oh yau hatai caong di sa-ai Hỉnh, yaom pabe diuk gam gam trun, urak ini daok 70.000 đồng sa kg min. Sa-ai Hỉnh ieu urang blei salih mai pablei khat saong patrun tapon pabe daok 100 con. Min urang blei salih oh mai blei, daok jien sraiy jeng daok bayar njauk harei, ngak ka sa-ai Hỉnh duh hatai lo: “Oh ka gaok bruk ini mbang halei, yaom lac dahlak raong hadom thun blaoh paje. Urak ini yau nan, lac mbong patih tangin, oh thau ngak habar. Mboh lac dahlak oh daok prein piah bayar sraiy”

Dreih yau nan, sang sa-ai Vòng Bành Xìn (xã Lâm San) jeng daok mbang ndih oh hu. Tapon pabe di sa-ai Xìn hu 400 drei. Thun 2022, sa-ai Xìn mesraiy di gilang pariak jaik 500 triệu đồng piah raong pabe. Kayua yaom dak harei dak trun, sa-ai Xìn dak raong dak khat. Meng bruk yau urak ini, yaok drei pabe pablei tabiak, sa-ai Xìn khat jaik 2 triệu đồng.

Raong pabe lac yau nan, raong pabui jeng oh siam jang. Meng yaom pandap mbang tagok glaong, piah hu laba, yaom pablei pabui brei mangaok 55.000 đồng sa  kg. Min urak ini, yaom pabui pablei tabiak tok hu 48.000 đồng sa kg. Tui yaom ini, urang raong khat meng 500 rabau tal 1 triệu đồng yaok drei pabui. Amuk Lý Tâm Dần, daok di xã Hưng Lộc, huyện Thống Nhất daok duh hatai haong bruk yaom pabui trun biar. Huac khat lahik, nan ye amuk Dần daok raong takik veik: “Sa mbao haleik brei ka pabui pasram mbang tagok tal 680.000 đồng. Urak ini pabui yaom yau ini dahlak oh raong veik, kham merat khik 5 drei pabui pajaih min”.

Dahlau daih pabe hu maong lac janih raong patruh eik patrun kathaot kayua mbuan raong, pandap mbang meng phun tamuh eng dalam palei. Min dalam dom thun tapa, urang ba gauk raong rilo, labik pablei oh tani tanat, ngak ka urang raong pabe bhian laik tame khat lahik.

Ndom ka bruk pandap mbang tagok yaom glaong ngak ka urang raong pabui gaok kan kandah, Hiệp hội Raong glang tỉnh Đồng Nai brei thau: Pandap tamo piah ngak pandap mbang raong glang dalam taneh ia urak ini bahrau pabak hu 35%, daok veik hadom lac blei meng negar langiu tame. Dalam tuk nan, yaom pandap tamo piah ngak hu blei meng negar langiu tame yau ye tangei, lúa mỳ, ratak…jeng tagok, jhul yaom pandap mbang raong glang tagok glaong. Anuk Nguyễn Thị Thanh Mai – Phaok akaok Chi cục raong glang saong Thú y tỉnh Đồng Nai lac: “Klaoh labik pabak, nan ye yaom pandap tamo piah ngak saong pandap mbang raong glang jeng tagok. Kayua yau nan ye bo yaom raong glang jeng tagok glaong”.

Ong Võ Văn Phi - Phaok akaok UB bhap bini tỉnh Đồng Nai mboh lac: Jalan ngak lac pambuak gauk piah pandap blei tame piah raong hu yaom biar di abih, pandap pablei tabiak hu yaom glaong di abih. Piah ngak hu bruk nan, karja palei, dom sở, ngành brei pambuak gauk ngak siam. Gam haong nan, yaok HTX, yaok urang ngak nong, yaok doanh nghiệp jeng brei kham merat.  Ong Võ Văn Phi lac: “Bruk ini brei tapa dom pakat Kapul urang nong, dom doanh nghiệp hu ginup prein, chất lượng siam ye pambuak gauk haong bhap bini, meda pablei dahlau, bayar jien hadei”.

Piah langyah bruk yaom kaom oh tani tanat ka gah raong glang, tỉnh Đồng Nai brei hu jalan ngak lagaih, hu jalan maong tah ka bhum raong praong. Meng nan, ba ilamu công nghệ bahrau tame dalam raong glang piah khik kajap chất lượng athur raong di tanut siam di abih saong samu gauk. Langiu di nan, bruk raong glang jeng brei pambuak haong gah chế biến saong darak pasar pablei pandap./.