Rilo mblang taneh brei klaak saoh cang urang mai blei 

Hadei di bruk to yaom taneh labik  đô thị bahrau Thủ Thiêm, yaom sang danaok, taneh riya labik gah timun  ban raya .HCM nyu pandiak tagok. Mbaok jalan Tam Đa, phường Trường Thạnh, ban .Thủ Đức hu ieu pablei yaom labaih 100 triệu đồng/sa m2. Taneh dalam dom  jalan sit jeng hu yaom meng  40 tal  55 triệu đồng sa m2. Yaom ni glong jang jiak  10 mbang dut song 3 thun dahlau

Sang saai Lê Hoàng Nam, daok dalam hẻm 200 jalan  Dương Đình Hội, phường Phước Long, ban raya .HCM (Quận 9 klak)  dok ieu pablei mblang taneh  500m2 haong yaom  65 triệu đồng sa m2. Saai Nam brei thau: 

Drei dok pablei yaom 65 triệu sa m2, pablei yaom ni hu sua abih ye. Urang halei blei ye caik jien takai, hadei di tuk ngak harak gar bloh meng yar abih jien . Ni lac dalam hẻm, dok gah langiu jalan  Dương Đình Hội yaom labaih  100 triệu, tagok biak glong. Urak ni, meyah yaom trun jeng daok di yaom nan, oh trun tra

Tapa duah thau, yaom taneh di ban.Thủ Đức hu jhul tagok glong jang dut song yaom biak di nyu, min bruk pablei salih oh hu rilo  yaom lac “cò taneh ” ba tabiak dom jalan jak ieu tuai yau : ngak mbang oh hu phun jien, nan ye khin pablei chip, trun yaom pablei dut song yaom urak ni. …

Tui kuhria mboh di dom chuyên gia, tuk padang ban.Thủ Đức yaom taneh labik ni hu ba tagok tanut glong, bruk to yaom taneh di  Thủ Thiêm ngak ka yaom taneh di rilo  labik dalam ban Thủ Đức hu jhul tagok jang meng 10-15%, ngak jeng yaom oh njauk. Yaom lac tal urak ni hu 2  doanh nghiệp klaak jien caik takai song likau padeih danak dak, min jeng kan dui hu yaom taneh labik ni mai veik yau dahlau. Chuyên gia kinh tế Trần Nguyên Đán – Đại học Kinh tế ban raya .HCM ndom lac:

Tuk urang tagok yaom ye oh thei khin trun veik. Tok hu dom doanh nghiệp hu dom mblang taneh padang ka gilang pariak piah mersaiy jien meng pablei piah bayar sre piah plaih sre jhak atau dom urang gar jien meng trun yaom piah pablei. Min, dom taneh nan nyu takik, oh ngak khut yaom rilo taneh dok veik. Nan ye, yaom taneh jeng dok di tanut glong min kan pablei hu.

Meda lac, bruk to yaom taneh Thủ Thiêm tuk puac thun 2021 nyu pambak khang tal drak pasa sang danaok, taneh riya di ban  Thủ Đức, abih di nyu nan lac labik vil val dom danak dak. Tui ong Trần Khánh Quang, Tổng Yam ndoc Công ty CP sang danaok Việt An Hòa, meyah yaom taneh oh mai veik haong yaom biak di nyu, meda ngak brei suh sah hatai urang buh jien tame ngak mbang gah sang danaok, taneh riya. Nyu ngak jeng bruk oh cambaih laih ka drak pasa di ban raya HCM. Ong Trần Khánh Quang  sahneng lac, yaom taneh di labik ini hu tani tanat veik, tuk bruk to yaom taneh  di Thủ Thiêm tamat bloh. Min, di tong abih dom  labik, yaom taneh daok hu jalan tagok:

Yaom lac doanh nghiệp klaak jien caik takai, min drak pasa sang danaok taneh riya jeng tui nan piah sahneng kuhria patagok  dom danak dak bahrau. Hu dom labik yaom tagok tal 300-400 triệu/sa m2, dalam tuk to yaom jeng 2,4 tỷ sa m2 , ye yaom kaom dok biak atah di gauk. Tui dahlak hulin dok hu bruk tagok yaom di darak pasa Thủ Đức. Tui kuhria mboh dahlau, dalam 6 bilan akaok thun ni, yaom taneh Thủ Đức dok tagok meng  10 tal 15%.

Tui dom chuyên gia kinh tế, bruk tani tanat veik yaom taneh di Thủ Thiêm lac bruk njauk hu. Min, tapa bruk to yaom taneh  piah mboh lac, ban .Thủ Đức song labik Thủ Thiêm tuk halei jeng lac labik dui pachreih dom urang buh jien tame ngak mbang./.

Urang lang: Hanipha- 17/2