Hu rilo labik caik harak oh brei adat piah pablei 

Kreh bilan 2 /2022  taom dar dom jalan bê tông meng palei ni tapa palei deih, jang yau jalan tapen jalan roya  dalam xã Phước Hữu, huyện Ninh Phước, tỉnh Ninh Thuận pak lei jeng mboh bảng hiệu pablei taneh  gam tui laik phone piah taom gaok. Angaok mạng xã hội, dom khaw tin pablei salih taneh hu ba tagok gam gam. Meyah yau dahlau deih,  rilo meng lac dom urang môi giới atau  công ty sang danaok taneh riya ba tin tagok, ye urak ni, rilo urang lac urang nong, urang jakar, công chức…jeng hu mbaok tame bruk môi giới sang danaok taneh riya.

Ong Huỳnh Ngọc Hành, Akaok palei Tân Đức, xã Phước Hữu, huyện Ninh Phước brei thau, yaom taneh hu jhul glong  meng thun  2018. Yaom taneh tagok glaong di pak ni, hu meng tuk rahra thau ka bruk salih dom taneh ngak nong tapa taneh dok song taneh pablei salih di  xã Phước Hữu, saong bruk caong padang ngak sang daok tagok glong di rahra pak ni. Meng nan, dom boh sang rahra jeng dom urang pablei salih taneh, hu dalam tangin jien tỷ, radaih jit jien. Ong Hành brei thau:

“ Bruk yaom taneh urak ni biak pandiak , abih di nyu nan lac…

Makna ngak ka taneh tagok glong di bhum palei pala xã Phước Hữu jeng yau dom puk palei dalam tỉnh Ninh Thuận tuk vak tapa, lac kayua dom puk palei ni dui pachreih hu urang buh jien tame padang ngak dom danak dak  điện hangin, điện ia harei… Langiu di nan, jalan palei jeng hu peih praong, lanieng lanoi, rilo urang mai duah blei piah caga dahlau song cang pablei duah laba tuk dom danak dak ni hu peih ngak. Tuk hu tangi sua ka bruk rilo rahra ba gauk pablei taneh yau urak ni, meda ba tal bruk abih quỹ taneh, kan kandah tal bruk sản xuất, rai duik di bol bhap rahra halei oh? Ong Huỳnh Kiều Minh, Akaok  ủy ban bhap bini xã Phước Hữu, huyện Ninh Phước ndom lac:

"Dom urang ngak mbang hu buh jien tame padang dom cơ sở hạ tầng, mik va jeng hu mbang tui biak prong, xã jeng ba tame pandar mblang taneh dok veik dalam dom danak dak jeng dok dalam bruk pandar taneh meng thun  2000 tal thun  2025 song pamong tal thun 2030. Mblang taneh nan, meyah, mik va khin salih bruk pandar, pablei salih ye mik va jeng dok khik hu quỹ taneh dok veik piah kuhria ka rai duik, bo oh gaok kan kandah hagait ”

Urak ni, yaom taneh ngak nong di palei pala huyện Thuận Nam hu ieu pablei ngan song yaom biak glong. Ong Nguyễn Sơn – Akaok palei Văn Lâm 4, xã Phước Nam, huyện Thuận Nam, daok brei thau lac:

“3 thun gilac ni mai, meng thun 2019, 2020, 2021 taneh ngak nong pablei hu yaom biak glong ”

Dalam thun 2021, tỉnh Ninh Thuận peih bruk to yaom hu 14 danak dak haong dom po ngak mbang prong yau : Kapul T&T, FLC, Trung Nam atau Cristal Bay, ieu yaom yaok  ribau tỷ đồng; njauk ndom tal di abih nan lac dom danakdak năng lượng tái tạo, labik đô thị bahrau song danak dak du lịch. Meda ndom lac, nan sa dalam dom bruk pachreih patagok di darak pasa sang danaok taneh riya, ba tal yaom taneh tagok glaong oh ka mboh padeih veik.

Piah ka drak pasa pablei salih taneh di tỉnh Ninh Thuận hu patagok siam mekre song khang kajap, oh ngak tayah bruk quy hoạch tuk taneh ngak nong njauk kaoh sit, pablei salih min oh hu adat padang ngak, njauk patagok jang gac bruk khik ramik di karja dalam gah taneh riya./.

Urang lang: Hanipha- 18/3