Yaom xang menyek trun, urang taong ikan srap gap tabiak tasik

Dom harei akaok bilan 8, di dom cảng ikan praong di tỉnh Bình Thuận, labik hu taong yaom lac sa dalam 3 labik taong ikan praong di taneh ia, dom sruh gilai tame tabiak pabah lamnge biak parilo. Ong Trần Thanh Nhàn (daok di ban Phan Thiết) haong jaik 20 urang nao gilai haong gauk daok jar var caga xang manyek, pandap mbang menyum piah tabiak tasik atah taong ikan, brei thau: “Ngan haong urang taong ikan, xang manyek meblah meng 60%-70% yaom jien buh tame di yaok mbang nao tasik, nan ye bruk yaom xang manyek trun khang, jeng hu makna lac meda patak pataom hu dom piluh triệu đồng”.

Tỉnh Bình Thuận urak ini hu labaih 7.500 gilai taong ikan, dalam nan hu jaik 2.000 gilai atah meng 15m tagok daok taong ikan di tasik atah. Tui Sở Ngak nong saong patagok palei pala tỉnh Bình Thuận, tukvak yaom xang manyek rilo mbang tagok glaong, labaih 1.200 gilai taong ikan di pak ini njauk daok di ar, ngak kan kandah tal raidiuk di mikva taong ikan.  

Ong Huỳnh Quang Huy, Akaok Chi cục Kaya ikan tỉnh Bình Thuận brei thau: “langik di tasik lagaih, kaya ikan jeng hu rilo, gam haong bruk yaom xang manyek trun njauk tukvak tame vụ ikan Nam, lac bilan taong praong dalam thun, nan ye mikva urang taong ikan tabiak tasik jeng hu jien mek tame tani tanat”.

Di cảng ikan Đông Hải (ban Phan Rang - Tháp Chàm) saong cảng ikan Đông Hải (huyện Thuận Nam, tỉnh Ninh Thuận), yaok rituh urang taong ikan chreih chrai tabiak tasik kayua vụ ikan Nam daok tame tabung glaong, bruk taong mek ikan nguik saong ikan ngừ đại dương daok biak lagaih. Ong Nguyễn Thế Anh (daok di ban Phan Rang - Tháp Chàm) chreih chrai khan lac: “bahrau blaoh, dom harei tabiak tasik, dahlak haong saabat nao tasik taong mek hu jaik piluh tấn ikan nguik, kaoh abih phun jien buh tame jeng daok laba hu jaik 60 triệu đồng. Duk haong tuk yaom xang manyek tagok glaong ye oh hu laba yau ini”.
Di cảng ikan Cát Lở (phường 11, TP Vũng Tàu), lac sa dalam dom cảng ikan praong abih di tỉnh Bà Rịa - Vũng Tàu saong bhum Đông Nam bộ, meng yaok rituh sruh gilai taong ikan dalam saong langiu tỉnh pataok di pabah lamnge dalam tukvak tapa, urak ini daok pataok dom pluh sruh min. Urang taong ikan angan Lê Hoàng Thủy, po di gu sruh gilac lưới vây labaih 600CV khan lac, thun dahlau, yaok mbang tabiak tasik dui atah meng 2 tal 3 bilan tok abih meng 550 tal 700 triệu đồng jien xang manyek, ye thun ini yaom jien xang manjek tagok jang meng 40%-50%, ngak ka gilai ong saong rilo urang taong ikan karei njauk daok di ar labaih 2 bilan paje. Urak ini gilai di ong daok samar drah tabiak tasik piah samu haong vụ cá Nam.

Daok di cảng ikan Tân Phước (xã Phước Tỉnh, huyện Long Điền), labik pataom rilo sruh gilai di urang taong ikan Bà Rịa - Vũng Tàu, pak ini jeng oh daok joa gidang. Ong Nguyễn Bá Lộc, po di gu gilai lưới rê labaih 580CV, brei thau, meng akaok thun tal ini, gilai di ong tok tabiak tasik hu 2 mbang blaoh daok di ar jaik 4 bilan kayua yaom xang manyek tagok. Min jaik di ini, yaom xang manyek trun, ong daok kuhria brei gilai tabiak tasik.

Di pabah lamnge Lộc An (xã Lộc An, huyện Đất Đỏ), tuk yaom xang manyek tagok, hu tuk tagok tal 80%-90% gilai taong ikan njauk daok di ar. Min labaih piluh harei jaik di ini, bruk ini oh daok tra. Lambaok ka gah khik ramik pabah lamnge brei thau, yaok harei hu 10%-15% gilai taong ikan tabiak tasik. Urak ini dom sruh gilai daok di ar tok daok jaik sa rituh sruh kayua daok ramik ngak pasiam jamraik, pandap panda taong ikan. Jeng tui ong ini brei thau, yaom lac xang manyek hu trun rilo min jeng daok di tanut glaong dut saong dom thun dahlau, nan ye bruk taong mek kaya ikan jeng daok caong hu bruk daong meng dom gah chức năng piah ka urang taong ikan sanang hatai tabiak tasik.

Ong Nguyễn Đức Hoàng, Phó akaok Chi cục kaya ikan tỉnh Bà Rịa - Vũng Tàu, brei thau, dalam tinh hu labaih 5.400 gilai taong ikan, dalam nan dom sruh gilai tabiak tasik veik tal urak ini, lac labaih 60% saong pataom tame dom sruh gilai lưới vây, rê saong vah ikan. Dom sruh gilai daok veik di ar rilo meng lac gilai giã cào, kayua yaok mbang tabiak tasik di janih gilai ini abih biak rilo xang manyek.

Kiên Giang lac labik hu labaih 9.800 gilai taong ikan, dalam nan hu labaih 3.890 sruh gilai atah labaih 15m. Ong Kim Hoàng Thanh, Akaok Chi cục Kaya ikan tỉnh Kiên Giang, brei thau: “Dalam tỉnh hu rilo gilai “lưới kéo” nan ye abih rilo xang manyek”. Tui dom urang taong ikan, yaom lac xang manyek hu trun min jeng daok glaong, yaom pandap panda taong ikan jeng tagok, labik taong ikan jeng dak harei dak takik nao, yaom kaya ikan tukvak tapa oh tagok rilo, kayua yau nan ye bruk taong mek ikan jeng daok gaok biak rilo kan kandah, urang taong ikan caong yaom xang manyek hu trun rilo jang./.

Urang lang: Thu Thảo – 15/08