Jalan Yên Ninh atah labaih 100m, daok dalam phường Yên Ninh, ban Yên Bái, hu rilo jabat, labik ngak bruk di karja saong sang bac, nan ye bhian gar jalan saong hu bala radaih paoh, ginuh gauk. Công an phường Yên Ninh, hu panuac ieu karja palei padang “kapul eng drei khik caga salamat jalan mbak di pabah mbang sang bac Tiểu học saong Trung học cơ sở Yên Ninh", haong menuac dalam kapul lac: dân quân tự vệ, khik caga dân phố, khik iek sang bac saong dang akaok lac gah cong an. Trung tá Phạm Việt Đức, Phaok akaok Công an phường Yên Ninh, ban Yên Bái brei thau: “Kapul eng drei khik caga hu 8 urang. Yaok harei hu mbaok ngak bruk di labik pabah mbang sang bac dahlau di tuk dom anek saih tame bac jaik 1 mon saong dahlau di tuk dom anek saih peih bac 1 mon, kayua ini lac tukvak amaik ame mai rilo piah ba - raok anek, lac tukvak gar jalan, mbuan hu bala.”

Sang bac Trung học cơ sở Quang Trung daok angaok jalan Quang Trung, ban Yên Bái hu labaih 1.400 anek saih. Yaok harei tal mon peih bac, yaok rabau anek saih nduac tabiak haong yaok ratuh amaik ame cang raok anek, gam haong dom radaih bhian nao mai nan ye bhian rah tabiak bruk gar jalan. Piah khik kajap siam mekre salamat jalan mbak, langiu di pathau khan tal dom amaik ame, anek saih saong brei ka anek saih, gru pato mbaoh tangin sanya khik kajap salamat jalan mbak meng di tuk tame thun bac bahrau, yaok harei, sang bac daok brei menuac hu mbaok khik iek 2 var khik kajap salamat jalan mbak di labik pabah mbang sang bac. Anai gru Nguyễn Thị Thúy Nga, Phaok Hiệu trưởng sang bac brei thau: “Sang bac hu parabha jalan ka anek saih trun, tagok di pabah mbang sang bac tui 2 jalan, sa lac ka anek saih nao takai, dua lac brei ka anek saih nao radaih saong hu panuac ieu amaik ame ba, raok anek dang atah pabah mbang sang bac 20 mét. Khik kajap salamat jalan mbak di pabah mbang sang bac, dah mesup hu mbaok mBan Giám hiệu, gru pato, bảo vệ saong anek saih lambaok tal bac, jala hu mBan Giám hiệu, gru pato, bảo vệ piah ba anek saih nao tapa jalan tui jalan gah hanuak, tuk anek saih nao sang abih, dom gru pato meng nao sang hadei.”

Dalam ban Yên Bái urak ini hu 35 sang bac, gam haong labih 22 rabau anek saih, dalam nan hu rilo sang bac jalan tame tabiak sit, dốc glaong… Nan ye, gah pato megru bhian hu harak tacei pato, pachreih ba dom sang bac patagok bruk khik caga siam mekre, salamat jalan mbak ka anek saih. Ong Hà Yên Thái, Phaok akaok jabat Pato Megru ban Yên Bái, tỉnh Yên Bái brei thau: “Jabat Pato Megru ban Yên Bái bhian pambuak bruk khang kajap haong mBan Salamt jalan mbak tỉnh piah pathau khan Hukum jalan mbak tal anek saih; tacei pato dom sang bac lac tal mon tabung glaong brei hu gru pato, anek saih dalam kapul cờ đỏ dang di dom pabah mbang sang bac piah tacei jalan, ieu kakei anek saih tame tabiak pabah mbang sang bac, abih di nyu lac di dom pabah mbang sang bac hu dốc glaong, ieu anek saih dui radaih trun – tagok, oh kuhria radaih juak atau radaih juak điện.”

Tui yaok pataom, meng akaok thun bac 2023 -2024 tal harei ini, oh ka hu bala radaih paoh ginuh gauk khang di pabah mbang sang bac di ban Yên Bái. Min anak bruk radaih patuh di menuac urang dak harei dak rilo tagok, dalam tuk jalan mbak di rilo labik pabah mbang sang bac oh ka pabak hu bruk di anak mata, daok hu bruk anek saih ngak suan hukum salamat jalan mbak, nan ye langiu di bruk kham merat di sang bac, dom gah chức năng, yaok amaik ame di anek saih brei paglaong hatai sahneng ngak njauk tui hukum salamat jalan mbak, bhian caik hatai kakei anek bhik ngak njauk tui dom adat hukum salamat jalan mbak, piah patrun patakik di abih dom bala meda rah tabiak./.