Thun 2023 lac thun hu rilo srau kadau, kan kandah, yau nan min, rilo doanh nghiệp yu lit di TP.HCM jeng khik hu tanut tagok, ngak hu dom bruk ba tabiak. Ong Trần Thế Dũng, Taong Yam ndok Cty Cổ phần Lữ hành Vietluxtour khan lac, darak pasar tuai dunya di DN tagok hu labaih 300% duk haong tukvak ini thun 2022.

Patui jalan patagok ini, Vietluxtour ba tabiak bruk lac tagok meng 25 tal 30% dalam thun 2024, yaom lac hu rilo kan kandah tui kuhria mboh dahlau. Tui ong Dũng, gah yu lit biak mbuan gaok kan kandah tapak, meng yaom xăng menyek, dom srau kadau gah chính trị, KT di bhum taneh saong dunya. Ong Trần Thế Dũng, Taong Yam ndok Cty Cổ phần Lữ hành Vietluxtour, lac:“Kol dahlak caong lac thun 2024 abih janih hu tani tanat saong hadah hadai tagok. Dom bruk meriak gauk gah KT, chính trị di dom taneh ia hu langyah siam jang. Piah hu tagok dalam thun 2024, kol dahlak sahneng lac brei hu bruk sangka buh jien tame ngak rilo jang bruk yaih khan yu lit TP.HCM jeng yau yu lit Việt Nam. Taphia nan, yaok DN lữ hành, yu lit jeng brei kham merat piah ngak hu dom bruk drei ba tabiak”.

Bruk ngak mbang hu tagaok di dom DN hu rik daong tame bruk siam veik samar di gah yu lit TP.HCM, tuk daok dang akaok taneh ia ka yaom jien mek tame saong ka dom tuai yu lit. Yaom lac tuai yu lit mai TP.HCM dalam thun blaoh bahrau samu 60% dom tuai di thun 2019, min abih tih jien mek tame meng yu lit lac labaih 160.000 tỷ đồng, samu 24% yaom jien mek tame gah yu lit dalam taneh ia, yam tapa atah pok jien mek tame 140.000 tỷ đồng di thun 2019. 

Amuk Huỳnh Phan Phương Hoàng, Phaok Taong Yam ndok Cty Yu lit Vietravel mboh lac hadei di 3 thun gaok kan kandah di jit Covid-19, gah yu lit TP.HCM hu padang ngak biak ginup, biak siam, biak rilo pandap, rilo janih yu lit. Min amuk Phương Hoàng mboh lac, bruk kurang di gah “ngak kong oh thak” TP.HCM lac oh ka caga dahlau jalan yu lit bahrau – yu lit tự túc saong kurang menuac piah pato pakai:“Hadei di jit Covid-19, bruk yu lit nao tui kapul baoh sang, sit sot, oh tapa Cty yu lit halei daok tagok glaong. Anak tal, kol drei njauk kuhri kuhria ngak habar piah pataom hu dom tuai eng drei nao ini. Kol drei brei pataom tame pato pakai menuac ngak, abih di nyu lac pato pakai praong dalam gah yu lit saong pato pakai dom janih sap negar langiu. Urak ini hu dom sap negar langiu takik menuac thau, tui nan, duah hu menuac ba jalan, menuac duh bruk lac biak kan”.

Tui mata maong di urang khik ramik, ong Lê Trương Hiền Hoà, Phaok Yam ndok Sở Yu lit TP.HCM brei thau, dom janih dom pandap yu lit urak ini di TP hu biak rilo, yau ye: yu lit jalan ia, yu lit sinh thái, yu lit tâm linh, yu lit y tế, yu lit ilamu, yu lit sajarah… Dalam nan, rilo janih daok cakrok saong mboh siam lac tagok hu tuai di anak tal. Ong Lê Trương Hiền Hoà, Phaok Yam ndok Sở Yu lit TP.HCM jia lac meda mek hu dom bruk ba tabiak dalam thun 2024, saong meda glaong jang:“Urak ini, langiu dom bruk yaih khan di TP.HCM ye bruk yaih khan di taneh ia langiu jeng hu kol dahlak iek praong, pamaong tal dom darak pasar karei di gauk piah dui pachreih tuai. Taphia nan, bruk an ninh, sron mbon, salamat gah yu lit, kol dahlak jeng brei tapa dom ứng dụng bahrau piah khik siam mekre ka tuai damuai. Ngan saong dom bruk ba tabiak mbang ini, biak lac kol dahlak khang hatai jia lac meda mek hu, saong mada mek hu glaong jang. Kayua urak ini, Mintri Ilamu - Thể thao saong Yu lit hu ba tabiak bruk daok pamaong tal di thun 2024 lac hu jaik 20 triệu mbang tuai dunya, dalam tuk nan TP.HCM ba tabiak taka 6 triệu tuai lac biar”.

Lambaok rilo DN lữ hành mboh lac sarak visa bahrau di Việt Nam jeng oh ka ginup prein dui pachreih tuai damuai. Anak tal, gah yu lit TP. HCM njauk patui jalan peih ngak khang, sami samar, sahneng duah bahrau dom jalan daong, ba mbuan lagaih ka dom DN dui pachreih tuai, piah njauk haong bruk yu lit TP. HCM daok hu angan je di mangaok dunya./.