Oh lac anek di urang thau võ, min umo 30 thun, urang likei dam bangsa Chơ-ro  mek hu rilo baoh huy chương tapa dom mbang pakacah võ  thuật pakat negar saong dunya. Nan lac Điểu Văn Sang, daok di xã Suối Nho, huyện Định Quán, tỉnh Đồng Nai, urak ini daok ngak bruk di Pasak Thể dục – thể thao tỉnh Đồng Nai.

Bac tamat trung học phổ thông thun 2004, Điểu Văn Sang hu palih ruah tame ngak urang jakar quân sự xã Suối Nho, huyện Định Quán, tỉnh Đồng Nai. Kayua bruk ngak brei thau võ thuật, yau nan ye sa-ai nao megru. Tuk camereip, Sang nao bac võ meng kan (dhar Phi Long) di labik pato võ Phi Long, huyện Cẩm Mỹ. Di labik ini, yaok biar harei sa-ai juak radaih labaih 30 km jalan piah nao tal labik bac. Bac hu 3 bilan sa-ai hu tagok pakacah angaok võ đài. Thun 2007, Sang tame pakacah giải võ meng kan kayua tỉnh Đồng Nai peih tabiak saong mek hu huy chương ameh. Mboh Sang naih gheih môn võ, gru Nguyễn Võ Tấn Hùng – Akok bộ môn Wusu di Pasak Thể dục – Thể thao tỉnh Đồng Nai pachreih sa-ai megru môn Kick boxing. Thun 2007, Sang tame pakacah Kick boxing pakat negar di Đắc Lắc saong mek hu huy chương pariak. Jeng dalam thun 2007, sa-ai dang akaok giải võ meng kan pakat negar peih tabiak di Phú Yên. Thun 2008, sa-ai mek hu huy chương ameh  giải peih praong 6 tỉnh bhum Đông Nam bộ janih võ meng kan saong gam mek hu huy chương ameh môn boxing di Cần Thơ.

Meng dom bruk ngak hu yau nan, thun 2009, sa-ai hu palih ruah tame kapul Vovinam pakat negar piah caga pakacah Sea Game 25. Min kayua takre môn Muay (nan lac võ Thái) yau nan ye sa-ai loa tame pakacah giải Muay châu Á peih tabiak di Việt Nam hu mbaok di 14 taneh ia. Kayua bruk nan, Sang njauk kỷ luật saong brei padeih pakacah, oh brei tame kapul Vovinam tra. Nan lac bruk mebuk hatai oh var hu ngan saong Sang.

Bruk mebuk hatai nan oh ka tapa truh ye bruk mebuk hatai karei nyu mai tal saong Sang. Dalam mbang pakacah võ meng kan pakat negar pak tỉnh Khánh Hòa thun 2009, sa-ai njauk pacah talang akaok ta-uk. Nan lac sa kan kandah praong ngan saong urang me-in thể thao, nyu mbuan cakak klaoh bruk me-in the thao. Min meng hatai takre saong bruk kham merat di drei, Sang yam tapa hu taong abih piah patui veik bruk takre the thao di drei.Tuk adei pacah talang akaok ta-uk ye urang sahaneng lac adei oh daok pakacah hu tra, tuk nan adei biak kan kandah jien padai, min hu dom gru pataom jien brei saong pachreih ba adei, meng nan adei hu pabak pren yam tapa kan kandah, 10 harei hadei adei pasram veik saong juak radaih tal 8 bilan hadei adei tagok pakacah angaok võ đài saong mek hu siam mekre mbiah tal harei ini, kayua yau nan ye yaom lac kan kandah tal halei dahlak jeng oh klak tỉnh Đồng Nai.

Dua thun tapa, dalam dom giải pakacah dalam saong langiu negar, Sang mek hu rilo giải glaong, njauk ndem tal baoh Huy chương Bar môn Muay di giải pakat Dunya peih tabiak di Thái Lan, labik padang janih vo nan. Ong Nguyen Xuan Thanh, Akok  Pasak The duc – The thao tỉnh Đồng Nai taong yaom lac yau ini: Sang me-in rilo janih, akaok meti lac võ meng kan, hadei di nan lac Vovinam, bloh tal kick boxing, abih di nyu nan lac Muay Thái. Janih Muay Thái ye Sang mek hu giải ameh dahlau di tuk peih Indo Game. Patui di nan adei jeng hu mbaok dalam rilo giải cúp pakat Dunya peih tabiak di Thái Lan.  Vovinam ye Sang mek hu giải glaong di abih pakat negar, Boxing jeng hu yau nan saong adei hu eiw tame kapul pilih ruah pakat negar. Taong abih dom jak jeng  nan brei mboh Sang biak gheih ghang. Daok jalan diukrai ye adei biak siam, lac urang thau kham merat.

  Baoh sang haniem phol jeng lac sa prein khang piah ka Điểu Văn Sang kham merat yam tagok. Diuk di sa-ai lac urang pato Vovinam, dua urang bhian klah rabha ka gauk dalam bruk ngak, klah rabha ilamu dalam pakacah saong pato pasram, daong gauk iek glang raong pato anek kacua. Oh lac takre bruk taong võ, sa-ai daok thau ramik tukvak piah tame bac dom tal pasram megru paglaong ilamu bruk ngak saong bruk chính trị. Puac thun 2011, sa-ai hu bac tamat cử nhân hành chính. Ndem ka urang me-in võ naih joi nan, sa-ai Điểu Sầu, urak ini daok ngak bruk di Sang bac Trung cấp Ilamu Nghệ thuật tỉnh Đồng Nai brei thau: Dalam tuk pato drei jeng hu taom gaok Sang, mboh adei nyu bui sambai chreih chrai lô. Adei tuk halei jeng sangka tal bruk ngak, langiu tuk vak ngak bruk, adei daok patao gah langiu dom janih võ yau Muay, võ meng kan, Vovinam…Dalam bruk ngak, Sang biak sami samar, anit ranam dom adei sa-ai. Sang tuk halei jeng kham merat abih drei dalam bruk ngak. 

Urak ini, Sang lac gru pato Kick Boxing di Pasak Thể dục – thể thao tỉnh Đồng Nai. Caong khin di Sang nan lac hu tame veik kapul hu mbaok pakacah dalam Harei pataom The duc – The thao pakat negar mbang 7 thun 2014 hu peih tabiak di bilan 11 anak tal, rik daong ba mai hadah hadai ka gah võ thuật jeng yau ka thể thao Viet Nam./.