Nghệ sĩ cải lương Kim Phụng

  Hu sa saman cải lương lac janih oh kurang hu dalam raidiuk di bhap bini Nam bộ jeng yau bhap bini bhum taneran kraong CL. Min urak ini, cải lương daok gaok biak rilo kan kandah dalam bruk khik takai urang daoh, khik takai urang maong iek piah ka sân khấu hu miat miat hadah gom.

Mai veik haong baoh Mendai Ameh di mbang pakacah “Naih gheih urang daoh – me-in sân khấu Cải lương Trần Hữu Trang - 2020”, nghệ sĩ Kim Phụng, Phaok akaok kapul cải lương bhap bini Kiên Giang khan lac: 16 thun ngak bruk di Kapul, anai mboh hu cambaih bruk salih karei di sân khấu cải lương tapa yaok thun. Meda ndom lac, dom nghệ sĩ cải lương di bhum taneran kraong CL yaom lac daok dang anak rilo kan kandah min jeng daok abih hatai khik ramik saong yaih khan sân khấu meng kan di gah meraong negar: “Lac nghệ sĩ, drei brei hu rilo vai diễn, brei mboh rilo gheih mekre. Abih di nyu nan lac, nghệ sĩ khin patagok bruk ngak, brei bac megru tapa yaok vai diễn di drei. Dahlak daok nao tui jalan nghệ thuật drei pilih ruah, saong khin ieu pataom dom nghệ sĩ piah ba gauk khik ramik  cải lương.”

Urak ini dom tỉnh bhum taneran kraong CL daok kham merat duah jalan nao bahrau piah ba cải lương nao jaik jang haong urang maong iek, abih di nyu lac urang maong iek daok ranaih umo thun. Kapul Văn công Đồng Tháp, Kapul cải lương Bến Tre hu peih dom tal pato ca cổ, cải lương; Đại học Tây Đô, Đại học Cần Thơ peih ngak danak dak đờn ca tài tử, cải lương, pablak tame dom mbang taom gaok me-in sambai. Abih di nyu nan lac, dom thun jaik di ini, sân khấu cải lương hu pok meyaom angaok rayo papar binguk, tapa dom danak dak yau: “Chuông vàng vọng cổ”, “Jalan nao tal angan je vọng cổ”, “Tài tử pakacah gauk” saong bruk pakacah “Naih gheih urang daoh sân khấu Cải lương Trần Hữu Trang”. Tapa nan, daong ka dom nghệ sĩ cải lương patui hatai takre di drei, rik daong dui tagok veik sân khấu meng kan. Nghệ sĩ nhân dân - Đạo diễn Giang Mạnh Hà, Phaok akaok Kapul nghệ sĩ sân khấu Việt Nam khan lac: “Dom pok meyaom meng mendai ameh, mendai pariak di abih 3 bhum taneh hu mbaok tame pakacah dhi puac abih, ye dom adei jeng hu pasang iek piah pok brei angan NSƯT, NSND. Meng nan ngak jeng prein dui pachreih saong pambak praong piah ka dom văn nghệ sĩ, urang daoh – me-in hu labik pabak hatai takre cải lương saong daok hu prein yava, yaom lac umo 60, 70 thun jeng meda pataom mbaok hu, nan lac bruk chreih chrai saong salih bahrau”.

Taphia bruk duah jalan nao bahrau meng yaok nghệ sĩ, dom kapul cải lương di bhum taneran kraong CL daok dang hu meng hu bruk sangka di karja palei. Rilo kapul văn công, kapul daoh tamia hu peih rilo melam parang me-in dom vở tuổng, trích đoạn dahlau daih. Ong Hồng Quốc Khánh, Yam ndok sang daoh Tây Đô, lac: “Brei hu jalan peih ngak dom mbang parang me-in, daong ka dom nghệ sĩ, urang daoh tamia hu bac megru, paglaong ilamu. Kol drei njauk patagok bruk đầu tư, brei hu jalan ngak, caga menuac piah hu mbaok tame dom mbang pataom pakacah pakat bhum palei, pakat negar dom giải diễn gah cải lương. Ini lac labik piah ka dom nghệ sĩ brei mboh bruk naih gheih di drei.”  

Sân khấu cải lương daok dalam tuk salih khang, tuk trun tuk tagok min oh ka tuk halei njauk menuac sia var klaak. Meng hatung hatian di dom nghệ sĩ tal bruk ba tangin tame di dom pakat karja, dom janih daoh, tamia meng kan daok hu khik ramik, patagok. Piah ngak hu bruk nan, brei hu bruk salih bahrau, sahneng duah bahrau, meng asal kadha tal jalan yaih khan tal bhap bini./.

Urang lang: M. Phương – 19/12/2020