Yaok janih ruak kanse ung the brei hu dom bruk brei mboh karei karei di gauk. Dom bruk brei mboh oh yau bhian di dalam rup pabhap oh lac tuk halei jeng kayua ung the kanse min jeng oh klak tapa bruk ini. Hadei ini lac dom bruk brei mboh dahlau ka bruk tamuh tabiak meng akaok meti di ruak kanse ung thu.

Nduac darah oh yau bhian

Dom janih ruak kanse ung thu meda ngak brei nduac darah. Pagap ye yau: ung thu kanse tung pruac meda ngak ka khak urang ruak hu darah; kanse ung thu baoh thận atau paok ia ma-iuk bàng quang meda hu darah dalam ia me-ik.

Darah maraih bhong that ieu lac darah nduac dalam pruac, darah bhong juk bram meda nduac meng labik atah jang yau thực quản atau tung guen. Rilo bruk karei yau saluah pruac, mblo taok atau njom anek ruak jeng meda ngak ka bruk nao ruak tian tabiak darah, min mada ruak yau halei jeng brei nao taong ruak samar drah.

Glaih glar haong pandik

Meyah glaih glar dalam rup laman lamuac dalam tuk padeih padei ginup blaoh mada mbuan si tamuh ruak kanse ung thu. Dom te bao ralo darah gah ung thu mbuan si tamuh drah samar, oh hu chuc nang bo nyu njauk hu, min jeng pandar janih mbang huak ka hu prein.

Trun kilo oh yau bhian

Trun kilo oh thau kayua hagait mada ruak rak cường giáp, duh hatai atau ruak dalam hatian dalam pruac. Min ruak kanse ung thu bhian ngak rup pabhap mbuan si trun kilo drah samar. Ung thu jeng ngak ka manuac urang alah mbang huak jeng ye oh mboh thau lipa tian jang.

Patuk suai atah, hiak sap

Patuk kayua dalam rup pabhap njom anek ruak, dị ứng atau thak dhun. Patuk dui suai atah mada kayua ruak ung thu jantung, pagam tui dom bruk brei mboh karei yau ye patuk gahak hu darah, pandik tada, trun kilo, glaih glar haong kan suak yava. Patuk suai atah gaok mai jeng kayua mabuh ruak kanse ung thu tuyến giáp.

Kalik salih karei

Kalik salih karei sambo oh bhian mada pambuak tal kanse ung thu kalik saong gaok mai lac bruk brei thau dahlau di dom janih ung thu karei. Ung thu meda ngak tabiak dom salih karei di kalik yau ye: Tagok sambo bar di kalaik atau dom bangu juk. Bangu di kalik praong jang, meda praong jang asar tayah gai cih tamrak. Dom bangu hu sambo bar oh dreih yau gauk gauk, hu bar juk haong bar tariyueng. Bangu oh tapak gauk atau hu dom meta tagei. Dom inem saluah di kalaik oh lahik atau dhit paje min saluah gilac veik. Kanyik hitam kalik.

Mboh salih karei ka tasau

Baong di tasau brei mboh karei tasau mada tal ung thu kanse tasau, min oh njauk lac taong abih mboh baong tasau halei jeng ieu lac ung thu kanse tasau. Tantu njauk brei nao tal sang iek ruak piah pasang iek meyah mboh sa bruk halei salih atau tamuh cakrok di angaok tasau yau: Sa baoh baong meda pan pait iek hu. Kalik tasau barah, bhong, tamuh kakah, kalik oh njoh. Pandik tasau. Taong tasau salih karei yau taluk trun atau sambo bar vil taom dan taong tasau salih karei.

Jalan tung pruac oh yau bhian

Dom ruak kanse ung thu meda ba tal dom asal kadha ka pruac, pagap yau kan si luan, salih bruk mahu mbang atau pandik hadei tuk mbang. Ung thu jalan pruac taha pruac mada (tung guan, tá tràng, đại trực tràng) meda ngak tabiak dom bruk brei mboh yau ye kaya mbang tame oh halai, mabuk maphei, taglaoh tal aok saong garak tian. Dom bruk brei mboh ini bhian mbuan nda ka dom ruak jalan tung pruac karei.

Mboh di mata urak ini, rilo tuk ung thu oh hu bruk brei mboh dahlau halei. Kayua nan, piah duah mboh samar drah ka ung thu, khol drei brei nao pasang iek prein yava yaok bilan atau yaok mbang 3 bilan. Ini lac bruk siam di abih piah duah mboh saong taong ruak ung thu kanse samar drah tuk baoh katian baong oh ka tamuh praong, paglaong ka bruk mbuan taong lahik ruak./.