Di darak pasar urak ini hu rilo janih jru patrun kurang pandik, urang ruak meda ta-eng brei mai sang menyum. Min, bruk menyum jru pakurang pandik bhian tui hatai meda ba bala tal bruk kanjah jhak, njuel ye tame sang taong ruak samar chip, trak ye ngak kan kandah suai atah tal prein yava. Hadei ini lac dom bruk kanjah jhak di bruk menyum rilo jru patrun kurang pandik.

Meda tamuh bala atau ngak brei kan si thau ruak: Pagap yau ye ruak tagok darah, ruak talei akaok, lahik ndih bhian mboh pandik akaok. Meyah ta-eng drei menyum jru patrun pandik jeng ngak brei trun hu pandik akaok. Daok hu dom janih ruak kan si thau karei yau ye tung pruac labaih, tung pruac barah … ye bruk ta-eng menyum jru mad aba nao tal bala praong brei pacang mboh ruak, ngak ka ruak mabuh trak jang.

Pandik saong sahluah guel/guol: Jru patrun pandik yau ye ibuprofen, aspirin saong naproxen ngak drak klauk sahluak pandik kalik ian guel. Nyu meda ngak sahluah tian guol saong ngak ka nduac darah meng di dom inem laka dahlau.

Ruak baoh thận: Dom urang ruak me-iuk saradang, ruak baoh thận saong darah glaong meda ba nao tal ruak baoh thận saong ruak baoh thận hadei menyum jru patrun pakurang pandik yau ye jru ibuprofen saong jru naproxen.

Ruak laka hatai gan: Jru patrun pandik, yau ye jru paracetamol meda bala jhak ka hatai gan kayua hu janih peroxit tamuh di dalam nyu kayua bruk salih mayao mayit di jru paracetamol dalam rup pabhap. Kayua yau nan ye brei caik hatai sangka tal jru hu takik atau rilo tuk menyum paracetamol. Menyum 8 asar (500mg) dalam sa harei meda ngak ka hatai gan trak bala praong, dalam nan mboh ralo di nyu di dom urang bhian menyum alak tapai saong urang dahlau daih mada hu njauk ruak hatai gan.

Dom asal kadha brei ka hatai

Dom roh duah hu brei mboh cambaih laih bruk menyum jru pacang cakak barah viem oh steroid mbuan si tamuh ruak baoh hatai hadei di dua klau adit. Dom urang menyum dom janih jru ini mbuan tamuh ruak baoh hatai glaong jang meng 20 - 50% dut tui dom urang oh menyum nyu.

Panuac kakei di bac si brei ka bruk menyum jru patrun kurang pandik

Menyum jru trun pandik mada pakurang hu hasit barah pandaik di anak meta. Kayua yau nan ye, gauk drei njauk brei taong padam ruak truh piah klah pandik di dalam rup drei. Bruk menyum jru patrun pandik bhian oh hu njauk brei pachreih, meyah drei atau dom urang dalam baoh sang di drei dahlau daih hu pandar rilo janih ia padrut pachreih, kayua mbuan pambak tame jru cavao.

Drei brei sangka iek glang yaom rilo atau takik di jru patrun pakurang pandik daok menyum, kayua nyu mbuan ba bala jhak ka prein yava anek manuac mayah drei menyum oh njauk, hu gaok mai menyum rilo ha sit jeng meda tame jalan metai. Njauk caik hatai sangka, jru patrun pandik haong alak oh brei menyum haong gauk. Brei takik menyum alak tuk menyum jru patrun pandik kayua alak meda ngak trak jang dom kanjah jhak di jru patrun pandik saong jeng ngak kan kandah tal arak glo akaok di drei.

Dom bac si pakakei, rahra tuk mabuh ruak, njauk brei ba nao tal dom labik y te piah hu pasang iek ruak saong pato tacei ka bruk taong padam ruak. Juai ta-eng drei menyum jru. Bruk ta-eng menyum jru meda ngak ka pandik hatai gan, ruak baoh hatai thận, ruak jalan thuak yava… meyah oh brei capat samar nao tal sang iek ruak meda ngak kan kandah tal bruk matai diuk di drei. Brei menyum jru tuk biak njauk menyum saong brei menyum, rilo atau takik jru tui brei pato tacei di bac si./.