Ruak pandiak pran: Langik salih bilan oh bhian, ngak ka prein pacang caga ruak di anek naih lamar lamuac mbuan tamuh ruak pandiak pran. Tuk njauk ruak, uranaih meda pandiak tagok katuak labaih 38 ndo C atau pandiak pagam tui haong yuh rup, chruh la-an, rup pabhap pandik camboh, biak glaih glar saong patuk thu. Hadei tuk rah tabiak dom bruk nan, uranaih meda pandik tarakaong, tadan idung saong patuk gam.

Pandiak pran kum bhian oh trak jeng ye meda abih ruak dalam 1 – 2 adit. Min, ruak bhian rah tabiak ngak kanjah jhak tal prein yava, mayah trak meda ba nao tal dom janih bala ruak karei huac jang.

Ruak barah jalan thuak yava angaok: Ruak barah jalan thuak yava angaok ieu lac ruak bhian gaok tuk langik salih karei, rilo meng lac mai meng bruk dị ứng atau kayua dom anek ruak, virus. Uranaih njauk barah jalan thuak yava bhian pandiak, patuk, haok ia idung, taglak.

Rilo uranaih njauk ruak jalan thuak yava angaok njual dui atah dom harei blaoh nyu abih ruak, yaom mada oh pandar jru daong pacang caga ruak, kayua jaik abih ruak nyu kayua virus mbang. Min, hu dom uranaih njauk barah jalan thuak yava trak min oh pandiak atau pandiak oh glaong, rilo meng lac uranaih lavang lavaih, oh hu ralo prein yava, gam tui pandiak lac uranaih patuk, bangal cauci dalam rup, takik ndih.

Amaik ame ngak hagait piah caga ruak ka uranaih tuk langik salih bilan?

Jaik abih ruak mboh bhian, takik ngak salih karei jeng bala meyah khol drei thau sangka saong pasang iek njauk kadha cara.

Piah caga dom ruak tuk langik salih bilan, jeng yau bruk sangka uranaih tuk njauk ruak, hadei ini lac dom bruk bo amaik ame brei hu thau.

Bruk 1: Caik hatai tal bruk mbang huak piah patagok prein yava pacang caga brei ka uranaih

Mbang huak lagaih tui ilamo ieu lac biak njauk brei ka uranaih. Ini lac asal kadha hu makna daong uranaih hu prein pacang ruak khang kajap. Amaik ame brei caik hatai sangka iek praong tal janih đạm saong dom sanih siam. Dalam nan, kaya mbang hu ia cavait saong ia pasei ieu lac dua janih siam biak hu makna hu di dalam ralo lamo, menuk, ikan, baoh menuk ada saong kaya ikan tasik.

Bruk 2: Brei salih bruk daok dang ka uranaih tuk langik salih bilan

Kayua langik oh bhian pagam tui tathah, angin hajan, bruk salih bruk daok dang di uranaih lac njauk ngak. Cambaih laih lac brei khik ganap pandiak ka uranaih, brei ka uranaih ndih hu ginup, takik bruk brei ka uranaih me-in haong athur raong…

Bruk 3: Meyah uranaih njauk ruak brei caik hatai sangka ka njauk

Tuk anek naih mabuh ruak bhian mboh pandiak rup, patuk, taglaoh tan aok saong aih chraoh. Langiu bruk brei ka uranaih nao pasang iek ruak, amaik ame brei iek glang ka njauk.

- Meyah uranaih pandiak: Amaik ame brei anek cuk ao tarapha laneing lanoi, menyum rilo ia, uak pasain la-an ka uranaih saong ba uranaih nao iek ruak di labik y te.

- Meyah uranaih patuk: Patuk oh lac sa bruk jhak, patuk ieu lac sa janih thau caga di dalam rup pabhap daong ba tabiak ia gahak, anek ruak tabiak truh tui jalan thuak yava.

Bruk 4: Brei klauk jru caga ka uranaih

Piah caga ruak brei ka uranaih njauk brei klauk jru caga njauk harei tukvak, ginup mbang klauk jru tui kakei di Mentri Y te. Njauk brei ka uranaih hu klauk jru caga ruak pran, dalam nan njauk caik hatai anek naih umo labaih 6 bilan saong menyum jru caga aih craoh kayua Rotavirus.

Ruak pran kum bhian njom mbak tapa jalan thuak yava, siam lagaih di bruk klauk caga jru mek hu meng 96 - 97%. Uranaih hu klauk jru caga meyah njauk ruak pran meda hanjol jang saong tukvak njauk ruak panak harei jang dut tui uranaih oh hu klauk jru caga./.