Pran ieu lac sa janih ruak mbuan njom mbak kayua virus mbang, rabha jeng 3 typ A, B saong C. Pran bhian rah tabiak meng bilan 10 tal bilan 3 tui saka ia harei yaok thun tame tuk salih bilan bhang – la-an atau la-an – bilan akaok thun, ruak tamuh tabiak jeng njuel, min dom bruk salih tapa ruak trak karei jeng meda rah tabiak di uranaih mala umo 5 thun, urang angaok umo 65 thun, urang kamei matian …

Pran ieu lac sa di dalam dom janih ruak kan si plaih tui kamei daok metian. Ruak pran biasa bhian njuel, min nyu jeng mbuan salih jeng ruak trak karei rah tabiak di urang kurang prein caga ruak. Tuk metian bo njauk ruak pran, mboh ralo abih di nyu di dalam 13 adit akaok di tukvak metian ye anek dalam tian meda mbuan njauk ruak oh yau bhian. Min, oh njauk urang kamei metian halei njauk ruak pran jeng ngak kanjah jhak tal anek dalam tian. Piah khik kajap salamat, urang metian brei nao pasang iek samar drah tuk hu mboh barau tamuh dom ruak pran.

Ruak pran di urang kamei metian mboh patuk thu, pandiak dalam rup meng gap mbiah tal pandiak khang, yaom mada lac oh njauk thei njauk ruak pran jeng pandiak dalam rup – barah pandik tarakaong – lagah la-an min ruak pran meda ngak ka urang kamei metian pandik arak ralo atau rup pabhap, pandik akaok, gan idung saong haok ia idung, glaih glar trak dui atah tal dua adit. Dom bruk brei mboh ruak pran rah tabiak samar chip saong meda khang trak jang. Bruk brei mboh ruak pran dak harei dak trak jang saong dui atah jang, bhian dui atah meng 1 tal 2 adit.

Piah caga njauk ruak pran ka anek dalam tian njauk brei ngak dom bruk yau ini ye:

Caga oh gaok urang njauk ruak pran, jeng ye menuk ada daok diuk.

Biak takik tame phon labik rilo menuac urang, labik njauk njom ruak.

Mbang rilo baoh kayau piah pabak vitamin C, patagok prein caga ruak ka rup pabhap.

Menyum rilo ia.

Brei menyum ia dalko buh laya atau ia pandao saong baoh kruac aik piah pahacih tarakaong, ngak acih sa-at rup pabhap.

Caga oh brei ndih tapak anak angin yuk tame mbaok jeng ye mek tanyak lapih kak pabang kakuai. Khik pandiak rup pabhap.

Meyah urang metian njauk ruak pran ye oh brei menyum dom jru cavao oh hu angan je pato tacei.

Tuk njauk ruak pran, urang metian brei ngak dom jalan yau: Brei patrun pandiak meng mek tayak pandiak uak rup, pama-om tayak tagok rup. Menyum rilo ia pandiak. Padeih padei hu ginup, khik pandiak dalam rup pabhap. Manyum jru njauk tui janih kakei di bac si kayua hu rilo jru taong ruak pran meda ngak kamei matian mabuh druh kaman dalam tian, njom ia mek ka anek kaman dalam tian; oh yau bhian siam brei ka paman.

Dalam tuk daok metian, prein yava di amaik pambuak biak praong tapak tal anek kaman di dalam tian. Kayua yau nan ye, urang metian nao pasang iek hu ginup saong caga ngak njauk siam mekre, siam purna khik caga rup saik.

Urang metian brei njauk sua tangi piah thau panuac kakei di bac si tuk caong khin pandar dom janih jru cavao piah caga bala jhak meng ruak hakik ka anek kaman dalam metian. Tuk hu sa bruk brei mboh halei karei, urang metian brei mai tal sang iek ruak piah pasang iek saong taong iek ruak samar drah./.