Tinh Gia Lai hu sa baoh mblang ilamo praong lavik mai, hu ralo janih kadha saong ndung mbak ilamo bangsa saong dom adat cambat bhap bini yau ye adat ngak padhi, adat mbang uan akaok padai bahrau, adat likau hajan… Adat likau hajan ieu lac sa janih ilamo bhap bini hu angan praong glaong di urang bangsa Jrai, bhian hu peih ngak di dalam bilan 4,5 dalam yaok thun gam saong bruk likau hajan siam angin lagaih, ngak hagait hu di nan, likau ka rahra bhap bini hu prein yava khang, raidiuk dak harei dak trei sir haniem phol selamat…

 Urang bangsa Jrai ieu panuac “mưa” di sap bangsa Viet lac “Hơ Jan” saong biak iek praong “Hơ Jan” kayua hajan daong rahra manuac urang bhap bini patrun hu pandiak khang ngak barah gandung, hajan ngak ka phun kayau, njam patam di apuh glai siam that saong rahra hu trei tung trei tian. Kayua yau nan ye yaok thun urang bangsa Jrai tuk halei jeng jal val srap gap brei ka adat likau hajan. Piah iek glang rami ramik ka adat likau hajan, dahlau di abih urang bangsa Jrai padang sa baoh kajang piah ngak yang tapen ia dahlau. Patui di nan urang Jrai brei duh paling dom yang phun lo o, krein, la-a. Hadei di nan urang Jrai mai palei padang bambang jang saong ngak sa rajam kajang di jalan trun tapen ia, tuel tagok kalik di asau, caik sa mbaik to ndao, kak sa talei mrai juk. Bruk nan lac piah pacang cakak dom kamalai jhak tachauk mai ngak kan kandah tal bhap bini di dalam palei. Adat likau hajan oh dreih yau taong abih dom adat ngak yang karei kayua lac urang dang ieu yang oh njauk lac ong Taha palei, bo lac urang hu sang danaok di akaok halau tapen ia brei palih ruah urang sa gah talei sang di drei piah lambaok vakil brei ka bhap bini palei dang tabiak ieu yang. Tui urang Jrai, oh lac tok hu bruk likau hajan ka palei la-an langaoh blaoh daok di tuk angaok apuh jeng brei likau hajan ka phun tangei tamuh tagok glaong, phun padai choh bangu, ngak hagait hu ralo di nan.

Hadei di adat ngak yang likau hajan, alak tapai hu peih pabah, pahe tangei yamein pambak tabiak sang roong. Dam dara lac dom urang akaok meti peih caih peih pakak bruk menyum tapai. Dom urang menyum ia tapai dalam hatai chreih sambai. Di langiu, sap kong caing, sap hagar mboh biak sameng, blaoh dom urang kamei tamia tui ragam xoang gam saong caik tapai mbau biak pahe bangi. Hadei di dam dara tal dom urang taha. Taong abih urang jeng hu nao tal harei raya adat, hu sa mbang menyum tapai bui sambai meng abih hatai iek praong. Tapa di nan, kak kajap hatai gul pataom saong hu makna jang lac kakei ka anek taco tuk halei jeng kanal hadar saong khik ramik, patagok dom ilamo bhap bini siam gheih di urang bangsa drei.

Dom urang hu ruah brei dang ngak Adat ieu yang likau hajan hu lac urang naih gheih, oh laik mabuh tame bruk pakauk tui hukum halei di dalam palei, hu ngak bruk siam naih gheih dalam bhap bini. Dalam dom harei palei ngak adat ieu yang likau hajan, bhap bini dalam palei brei plaih dom bruk kadha, oh nao ngak, oh pan jalen, pan mra. Ndap nda Kaya ngak yang dalam adat hu sa drei pabui tano juk oh hu pangu patih di angaok rup, trak labaih 20 kg; 3 baoh caih tapai…

Di gah Pur Maraong hu ieu lac labik pala padai praong abih di tinh Gia Lai, ini jeng ieu lac bhum taneh pagam haong dom damnei ka Yang Patao Apui, Yang Patao Ia… Kayua yau nan ye adat likau hajan daok ieu lac sa di dalam dom adat hu angan makna di dalam raidiuk duh yang mebang di urang bangsa Jrai, pataom ginup ilamo hu angan di sa bangsa, di sa adat ieu yang likau hajan daok khik tamo. Tuk mai tame adat likau hajan di urang Jrai, tuai damuai hu mboh bruk ginreih, praong glaong dalam tuk vak pambuak haong yang mebang dalam baoh sang atah yao klak./.