Tagei luac daok ieu lac tagei yang ka 8, ieu lac sa baoh tagei praong ka 3, daok di labik puac abih di yaok tachaok kieng kang. Yaok urang praong meda hu rilo abih 4 baoh tagei jak - di dua kang angaok saong di dua kang ala. Nyu bhian tamuh meng dalam umo 17 tal 25 thun, nan daok hu ieu lac “tagei luac” kayua tukvak ini urang menuac hu yam tame tukvak praong dam praong dara praong di rup pabhap jeng ye thau sahaneng.

Tagei jak oh ngak bruk hu makna halei dalam bruk mameh, tagei luac bhian kan si ngak hacih sa-at nyu, mbuan ngak ka halak mbang tagei, barah ling atau tamuh blieng, tamuh dalam ling. Nan lac bruk bo dak harei dak hu rilo urang hu bac si kakei ghak brei buac klak tagei jak meyah khol nyu ngak pandik tagei.

Oh takik urang praong oh tamuh sa baoh tagei jak halei, atau tok tamuh sa banah. Bruk ini biak bhian mboh saong dak harei dak hu rilo urang. Tui Kapul gah Tagei Amirik (ADA), hu meng 5% tal 37% manuac urang oh tamuh tagei jak, saong hu meng bruk tui pajaih di amaik ame. Meyah amaik ame atau ong muk oh hu tagei jak, ye anek taco di nyu meda jeng oh hu tagei jak.

Dom urang meda hu:

4 baoh tagei jak (ginup); 2 atau 3 baoh tagei jak (oh tapak gauk); Atau oh hu baoh tagei jak halei (takik hu min oh ngak kanjah jhak njauk huac)

Bruk kurang tagei jak oh ngak kan kandah tal bruk mameh atau bruk ngak gheih, kayua ini lac tagei “labaih” dalam dom baoh tagei di menuac urang jaman bahrau.

Dom urang biak nao hu takai tagei jak, min kayua talang kang ganik atau tagei tamuh chung gah, nyu oh meda hu mblo tabiak truh di ling. Ini hu ieu lac tagei jak tamuh dalam ling atau gar dalam talang kang.

Dom baoh tagei jak tamuh dalam ling meda rah tabiak kandauk dalam rilo thun blaoh oh brei thau brei mboh hagait. Min, dalam dom bruk, nyu meda ngak tabiak:

Pandik di dalam atau biak pandik; Barah ling, njom nerak tagei; Ngak halak mbeng baoh tagei yang ka 7 di tapen taphia; barah ling vil taom dar tagei jak. Kayua yau nan, meyah medil ka tagei jak tamuh kandauk, bac si bhian thaot X-quang kang tagei piah thau labik saong gah tamuh di nyu.

Kuhria taong abih lac: Meyah mikva oh tamuh baoh tagei jak, brei sahnang hatai lac rup pabhap drei randap tui jalan siam lagaih jang, njuel njac jang haong bruk mameh saong tung pruac bahrau. Min, meyah drei medil hu tagei jak tamuh kandauk, brei nao taom gru jru ngak tagei piah hu pasang iek saong langyah drah samar meyah njauk ngak./.