Ong Giàng Seo Pao, akaok mban mặt trận palei 5, xã Rô Men brei thau: thun 2006, ong hu mikva dalam palei pok ngak akaok mban mặt trận palei –  sa palei hu taong abih menuac lac urang bangsa H’mông meng dom tỉnh gah brak tame ini padang mbang ngui. Rai diuk di bhap bini daok gaok ralo kan kandah, kurang sap janih, dom adat cambat tanarakun klak dalam rai diuk, dalam bruk ngak mbang jeng daok kandaong veik. Lac sa urang jakar mặt trận, ong bhian sahneng lac: ngak habar piah ka bhap bini dalam palei abih kan kathaot, abih rambah rambup, anek bhik hu nao tal sang bac piah bac akhar. Meng hatai saneng yau nan, gaok tuk ong hu mbaok tame dom tal pasram megru ka bruk salih barau ilamu, taih klak adat cambat oh daok lagaih, peih bruk kế hoạch hóa gia đình… Hadei di nan, ong mai ieu pataom mikva dalam palei piah pathau khan, jak ba bhap bini mbang ndih hacih saat, klaak dom adat cambat oh siam dalam likhah caga, dalam ndam metai, rija roya. Taphia di nan, ong hu nao tal yaok baoh sang piah tacei mikva pala phun bei kayau, phun padai, phun pa-aok blit, phun cà phê saong raong kabau, pabui, menuk yau habar ka hu kein laba? Tui jalan ngak lac daok jaik bhap bini, labaih 8 thun dang akaok mban mặt trận palei – ong Pao hu rik daong biak rilo dalam bruk jak ba bhap bini dalam palei oh menyum alak, oh njuk pakao; jhul pakhang patagok bruk patruh eik patrun kathaot. Eng danak dak padang ngak palei pala barau, ong gam saong mban bhap bini palei hu jak ba bhap bini rik daong labaih 200 mbang harei ngak bruk, brei labaih 2 sào taneh piah ngak jalan palei, ngak tatua, pasiam veik ribaong dalam mblang hamu saong jak ba bhap bini rik daong hu jaik 20 triệu đồng piah caik điện truac hadah angaok jalan tame palei. Ong Giàng Seo Pao brei  thau: “Taong abih mban bhap bini dalam palei khin ngak hagait jeng hu khan brei mikva dalam palei thau, mboh njauk hatai ye ngak hu, ngak bruk halei jeng brei hu biên bản cambaih laih piah drei ngak bruk hagiah jeng oh sung. Hadei di ini mikva oh hu harak kiến nghị atau khiếu kiện”.

Meng dom kham merat yau nan, dalam dom thun tapa, ong Pao hu pakat ủy karja palei saong huyện Đam Rông pok menyaom saong alin brei ralo harak meyaom kayua ngak hu siam bruk dak padang talei jum pataom bangsa di puk, palei. Ong K’Siêng – akaok UBMT negar Việt Nam, huyện Đam Rông, brei thau: “Bruk di mban ngak bruk mặt trận palei biak praong dalam bruk pambuak gauk jak ba taong abih bhap bini jum pataom dak padang rai diuk ilamu di labik daok pambuak pagam haong danak dak padang ngak palei pala barau saong dom danak dak karei yau dân chủ di cơ sở. Ngan saong ong Giàng Seo Pao di mban ngak bruk mặt trận palei 5, xã Rô Men ye ngak biak siam, palei 5, xã Rô Men peih ngak dom sarak di đảng, hukum di karja biak siam, daok bruk patagok kinh tế, rai diuk di mikva jeng hu tani tanat”.

Meda lac, oh eng hagaih ong Pao bo dalam dom thun tapa, dalam huyện Đam Rông hu biak ralo urang jakar mặt trận palei, taha palei, urang pan bruk agama hu ralo rik daong dalam bruk dak padang talei jum pataom taong abih bhap bini, taih klaak dom adat cambat klak oh daok lagaih, padang rai diuk ilamu di puk, palei… Tapa nan, rik daong ka pakat ủy, karja palei jhul pakhang patagok kinh tế, patruh eik patrun kathaot – khik kajap quốc phòng, an ninh di puk palei./.