Yau ralo urang kamei daok di bhum glaong karei, dahlau daih rai diuk di baoh sang saai biak kan kandah, drap ar oh hu hagait langiu dom pandap klak di ong muk rabha brei; bruk ngak mbang oh tani tanat. Cambuai mbang dak harei dak ralo tuk 3 urang anek di sa-ai patui gauk tabiak rai. Saai Đặng Thị Sầu khan lac:

“Tuk  tok gauk tabiak daok karei sang kan lo, hagait jeng oh hu, bo daok hu anek sit tra, glaih glar luac thun saong hamu puh jeng tok ginup mbang min”.

Thun 2004, bruk du lịch cộng đồng hu patagok di ralo labik yau Mường Lò - Nghĩa Lộ; Sa Pa - Lào Cai… Mboh palei drei hu labik mekre siam meng danao Thác Bà, ralo tuai du lịch daok atah mai, nan ye diuk pasang saai kham merat duah thau saong bac megru jalan ngak du lịch cộng đồng. Hadei di tuk ruah duah, baoh sang glaong di saai hu ngak pasiam veik jeng dom duk phục vụ ka tuai damuai gam hu tiện nghi, hacih saat min daok khik hu ilamu meng kan di urang Dao Quần patih. Saai Sầu brei thau, tuk camereip oh ka randap jeng glaih glar, abih di nyu nan lac bruk taduan raok, ndom biai, duh tuai damuai, abih di nyu nan lac tuai negar lingiu. Min meng hatai kham merat di drei, livik livik harei taong abih bruk jeng mbuan, jeng sahang. Meng harei ngak DL cộng đồng pambuak saong raong ikan, pala glai, baoh sang saai hu jien mek tame labaih 12 triệu đồng sa bilan. Saai daok patak pataom phun jien ngak gilac sa baoh sang glaong meng kan tra piah phục vụ ka tuai damuai. Saai Đặng Thị Sầu chreih chrai khan lac:

“Meng harei gam bac, gam hu tacei pato ngak DL cộng đồng, pasiam sang danaok taduan rok tuai damuai jeng hu jien mek tame, dahlak mboh rai diuk cadu tapa yaok thun, anek bhik hu nao bac daa, duk saong dahlau urak ini bingi sahang lô  ye”. 

Urak ini, kuhria rah tapa, yaok adit baoh sang saai taduan labaih 2 kapul tuai, kapul takik meng 5 tal 7 urang; kapul ralo tal 20 urang, ralo meng lac tuai Châu Âu, Úc saong dom tuai damuai mai meng dom tỉnh bhum taneran. Meng nan hu ba bruk ngak ka ralo likei, kamei daok di xã Phúc An. Urak ini sang saai bhian hu meng 6 tal 7 urang daong bruk, ngan saong yaom jien mek tame yaok urang meng 100 tal 130 ribau đồng sa harei. Saai Đặng Văn Phúc, daok di palei Cầu Trắng, xã Phúc An – sa urang daong bruk ka baoh sang saai brei thau:

 “Di palei pala glaih glar lo, jien mek tame oh hu dom. Tuk hu tame phục vụ tuai damuai di labik ini dahlak mboh sambai lo, hu jien piah kuhria ka rai diuk”.

Bruk ngak DL cộng đồng di baoh sang saai jeng hu rik daong khik ramik ilamu bangsa. Ralo janih ilamu meng kan di urang Dao Quần patih hu saai padang ngak veik yau : tamia cấp sắc, likhah urang Dao, daoh dam dara… piah pamere tuai damuai hadei di dom mbang rivang iek danao Thác Bà ndih veik melam di labik ini. Oh lac yau nan saoh, baoh sang saai daok jak ba mikva dalam palei khik ramik sang glaong meng kan di urang Dao Quần patih. Kayua, tuk baoh sang saai kaya tagok meng jalan ngak DL cộng đồng, saai jeng tacei pato ka dom baoh sang karei ngak tui. Ong Nguyễn Công Nghĩa, phó akaok UB bhap bini xã Phúc An, huyện Yên Bình taong yaom: 

 “Ngan saong puk palei kol dahlak ye taong yaom ka baoh sang ini biak glaong, meng patagok kinh tế ngak du lịch cộng đồng pambuak saong bruk ngak glai nan ye baoh sang hu jien mek tame biak glaong duk saong dom baoh sang karei. Saong meng baoh sang amuk Đặng Thị Sầu ini ngak kinh tế patagok siam, nyu pachreih dom baoh sang jaik taphia ngak tui ”.

Meng bruk kham merat yam tapa kan kandah yam tagok ngak kaya meda di drei, diukrai siam mekre saong menuac sia dalam palei, nan ye baoh sang saai tuk halei jeng hu mikva dalam palei anit ranam. Pasang saai lac sa dalam dom urang hu angan je dalam aplei. Saong tui saai, bruk sambai jang nan lac baoh sang hu jeng labik mai tal di tuai damuai tuk mai rivang me-in Yên Bái. Bruk ini hu daong ka baoh sang saai hu jien mek tame tani tanat, ralo urang dalam palei hu bruk ngak./.