Uranaih bangsa takik hu iek glang biak siam dalam palei 

Tukvak tapa, oh lac langik pandiak atau hajan, labaih 10 urang di Kapul eng drei khik caga bhum hijao di palei 1, xã Đạ Sar, huyện Lạc Dương (tỉnh Lâm Đồng) jeng daok khik bruk ngak di drei saong ngak siam bruk pacang caga jit ruak Covid-19. Meng di labik akaok jalan bê tông vaih tame palei, tuk halei jeng hu menuac khik iek luac harei melam piah tui iek bruk tame tabiak, abih di nyu lac dom radaih haong menuac meng labik karei mai. Ong Păng Ting Doanh, akaok Kapul eng drei khik caga brei thau, yaom lac bruk glaih glar min dom urang dalam kapul jeng rami ramik tukvak, parabha gauk khik iek, piah khik kajap bhum hijao, bhum oh hu jit Covid-19 ka puk palei.

  “Tuk hu menuac meng labik karei mai, drei vak cambaih laik radaih, angan je, labik daok. Bruk khik iek hu peih tabiak meng lavik ye. Mikva pak ini ngak siam bruk khai báo y tế, ngak njauk tui 5 paka di Mintri Y tế, ini lac bruk njauk uan tabuan, daong ka bruk pacang caga Covid-19. Drei biak caong khin khik ramik saong pambak praong bruk ini piah khik bruk pacang caga jit hu siam mekre, salamat, yaok urang kayua abih menuac sia”.

Xã Đạ Sar, huyện Lạc Dương jaik taphia ban Đà Lạt, daok angaok jalan Roya 27C nan ye yaok harei hu biak rilo menuac tame tabiak xã. Ong Phạm Ngọc Giáo, daok di phường 9, ban Đà Lạt, urang bhian nao mai tapa bilai pasang iek jit ruak Covid-19 ini brei thau, kayua hu bein ngak pandap dalam bhum nan ye yaok harei ong haong rilo menuac meng labik karei mai ini. Yaok mbang nao mai jeng brei khai báo y tế ginup abih, yaom lac abih tukvak hasit min ini lac bruk biak siam, njauk ngak. Ong Giáo, lac:

"Bruk ini ngak, lac biak siam, drei kayua bhap bini, jhui caik ka bhap bini kayua drei. Ngan haong dahlak, nan lac sa sahneng duah biak gheih dalam bilan jit ini kayua nyu lagaih. Jit urak ini oh daok thaot binguk, sambo màu, thei thau nyu daok pak halei brei caga lac siam ye”.

Oh lac xã Đạ Sar, bo dom puk, palei di dom xã, ban sit dalam huyện Lạc Dương jeng padang kapul eng drei khik caga bhum hijao, bhum oh hu jit Covid-19 saong hu bhap bini njauk hatai, pachreih tui. Tui sa-ai Kơ Să Ka Liêm, Bí thư Đoàn xã Đạ Nhim, dahlau daih mikva dalam palei oh ka thau paglaong hatai sahneng dalam bruk peih ngak dom jalan pacang caga jit Covid-19. Meng harei padang kapul eng drei khik caga bhum hijao, dom urang dalam kapul jhul khang bruk pathau khan nan ye urak ini thei jeng ngak siam bruk cuk pataih pacang mbaok, khai báo y tế tuk tame tabiak palei.

“Padang bilai khik iek ye harei camereip kan kandah min hadei di nan pathau khan bhap bini paglaong hatai sahneng pacang caga jit jeng oh daok kan kandah hadom. Urak ini bhap bini ngak siam bruk pacang caga jit. Tuk halei jeng cuk pataih pacang mbaok saong ngak njauk tui 5 paka di Mintri Y tế tuk tabiak jalan”.

Lạc Dương lac huyện hu menuac sia rilo meng lac urang bangsa K’ho. Yaom lac daok jaik taphia ban Đà Lạt, labik hu dom menuac njauk Covid-19 glaong abih dalam tỉnh min Lạc Dương urak ini jeng daok lac labik oh ka hu urang halei njauk Covid-19. Piah hu yau nan, langiu bruk kham merat di gah chức năng haong karja palei, ye dom kapul eng drei khik caga bhum hijao di dom puk palei hu labik dang biak praong, rik daong oh sit tame bruk pacang caga Covid-19 di Lạc Dương jeng yau di tỉnh Lâm Đồng./.

Urang lang : Mosaphuong -3/10