Buôn Trinh 4 lac palei di urang bangsa takik meng kan mai. Raidiuk mikva labik ini daok rilo kan kandah. Dahlau diah, bilan hajan  jalan tame mbon palei bak gluh baok. Yaok mbang, tuk akok palei khin taom gaok mikva piah khan brei thau dom sarak di Đảng, hukum di karja, jeng gaok oh takik kan kandah. Kayua oh  hu labik taom gaok bhap bini, nan ye rilo mbang mbon palei njauk peih bruk taom gaok di sang bhap bini. Thun 2004, palei Trinh 4 hu karja buh tame 100 triệu đồng piah padang  sang ilmu bhap bini.  Meng hu bruk daong padang ngak sang ilamu, mikva dalam palei thei jeng uan tabuan. Min, palei Trinh 4 gaok kan kandah tra kayua oh hu taneh. Sa-ai H’Bin Niê hu ginum saong pasang, alin jaik 1.000 met vuong taneh di sang drei piah padang sang ilamu bhap bini, daong ka mbon Trinh 4 samar hu labik ka mikva taom mbaok, uranaih hu labik mein sambai. Meng bruk ngak di sa-ai H’Bin, hadei di labaih 1 bilan, palei Trinh 4 hu sang ilamu  bhap bini praong siam. Sa-ai H’ Bin Niê daok hu likau pasak ilamu tỉnh sa bộ kong chieng mai ka sang ilamu bhpa bini palei, bloh jak ba mikva mai pasram daoh, tamia taong kong chieng, khik ramik ilamu bangsa.

Taha palei Y Blun Niê brei thau: “Bruk ngak di H’Bin Niê biak hu yaom glaong, hu sang ilamu blaoh mikva bhian taom gaok gauk di harei sanecar yaok adit, urang taha pasram daoh Aray, yuk đinh năm, đinh tút, uranaih hu dom  nghệ  nhan dalam palei pato taong kong chieng. Mikva dalam palei takre ialmu meng kan di ong muk kei , taha ini mboh bui hatain ralo”

Dahlau diah kayua bruk pala drak tui jalan klak, kurang phun jien, kurang taneh pala drak yau nan ye mikva Ê đê di palei Trinh 4 biak kathaot. Lac urang akok mban mat trận, sa-ai H’ Bin Niê tuk halei jeng sahaneng duah jalan daong bhap bini dalam palei tapa truh kan kathaot. Yaok bilan, H’Bin Niê jeng hu mbaok tame dom tal pasram bruk ngak nong di Kapul urang nong xã, bac tapuk , iek mbao, duah thau ilamu tapa bruk ngak mbang di dom urang Kinh naih joi dalam bhum. Bac hu ilamu ngak mbang birau, sa-ai H’Bin Niê ba tame bruk ngak iek di drei  dahlau. Meng labik lac ngak padai ia yaok thun tok hu dua mbang, sa-ai H’Bin salih tapa pala caphe, amriak kalu, raong pabui. Meng tari tariang, urak ini sang sa-ai H’Bin Niê hu sa hecta caphe, paik hu 4 tấn baoh yaok thun; 2 sào hamu padai ia ngak dua mbang dalam thun, năng suất hu meng 8 tal 9 tạ. Abih di nyu nan lac, bein amriak kalu daok paik baoh. Yaok thun kaoh bloh phun jien buh tame ngak, sang sa-ai daok laba hu meng 200 tal 250 triệu đồng. Hu raidiuk trei sir, meng salih jalan ngak mbang, sa-ai H’Bin Niê hu ba ilamu bac hu di drei daong ka mikva palei Trinh ngak mbang, patruh kan kathaot. Baoh sang H’Sut dahlau diah lac sang kan kandah di abih dalam palei Trinh 4. Sang taik tahak, kurang taneh ngak mbang, pasang bhian ruak kik yau nan ye kathaot rambah ndam gam sang sa-ai labaih 10 thun ini mai. Thun 2011, sa-ai H’Bin Niê brei ka sang sa-ai H’Sut nyim phun jien piah ngak mbang, tacei pato sa-ai jalan  iek glang phun caphe, raong pabui saong pala pablak amriak kalu dalam bein caphe. Urak ini, dalam var ro sang sa-ai H’Sút tuk halei jeng hu 10 drei pabui binai pajaih, bein caphe hu iek glang nan ye siam năng suất glaong meng 2 tấn meteh tal 3 tấn, hu labaih jien ndo, drap ar. Bruk njauk biai nan lac, puac thun 2013, sang sa-ai H’Sút likau tabiak truh angan baoh sang kan kathaot. 

Meng bruk daong abih hatai di urang kumei jakar mặt trận, urak ini palei Trinh 4 oh daok sang  taiak tahak, rilo sang hu tabiak truh kan kathaot. Meng 16 baoh sang kan kathaot thun di 2005 tal urak ini trun daok 2 baoh sang, jaik abih dom baoh sang jeng blei hu radaih patuh, tivi, tủ lạnh hu labaih jien ndo, drap ar. Puk paga hu siam mekre, salamat, raidiuk bhap bini dak harei dak patagok.

Dua pluh thun ngak bruk kapul urang kumei, 6 thun ngak akok mban Mat tran, bruk halei sa-ai H’Bin Niê jeng ngak siam, hu dom pakat kaja ban sit Buon Ho alin brei rilo harak meyaom. Tui sa-ai H’Bin Niê, bruk ngak hu praong abih di sa-ai nan lac hu daong dom baoh sang urang bngsa takik salih hu jalan sahaneng, jalan ngak, yam tagok ngak kaya meda pak bhum palei di drei./.