Gah pakat hội khaol dahlak biak hadah mbaok meta tuk hu sa urang hội hu hatung hatian siam mekre, thau ranam manuac urang kan kandah atau dom bruk jak ba kayua Đảng saong Karja ba tabiak ye sa-ai Mùi tuk halei jeng ba akaok nao dahlau. Langiu di nan sa-ai daok jak ba gauk gar, urang Việt daok pak negar langiu rik daong ka xã padang ngak jalan mbak nao mai dalam palei, atau kadung jien bayar dhal phol, kadung jien brei ka urang kathoat ye sa-ai jeng lac urang ba akaok nao dahlau. Nan lac panuac khan di sa-ai Nguyễn Thị Bắc – Akaok Kapul urang kamei xã Hải Ninh, huyện Bắc Bình, tỉnh Bình Thuận tuk pang khaol dahlak ndom tal sa-ai Cún Say Mùi daok di palei Hải Lạc.

Dalam baoh sang siam mekre di drei, blah binguk sa-ai Cún Say Mùi hu thaot haong akaok negar Trương Tấn Sang tuk tabiak nao pataom mbaok dalam Nyaom biai Pok meyaom urang kamei ngak mbang naih jioi di bilan 10 thun 2013 meng blaoh, hu tuan di labik glaong gam haong Harak pok meyaom di Thủ tướng Rajaei. Oh padauk hu hatai bui sambai di drei, sa-ai tuk halei jeng peih cambuai lac, lac sa urang nong luac thun ndam gam haong taneh, haong palei thei thau lac drei hu tabiak Hà Nội saong taom gaok hu  Akaok negar. Sa-ai Mùi chreih chrai khan lac: Drei ieu phon mai ka pasang yaih lac drei hu taom gaok akaok negar. Drei sambai lo, gaok akaok negar drei mboh ranam palei negar jang.

Meng dom thun 90, baoh sang sa-ai hu blei tame sa mac chai padai sit piah chai padai mbang pah ka mikva dalam palei, ginup jien piah mbang cai dalam sang.. Min tuk 4 urang anek di sa-ai patui gauk tabiak rai saong tal umo mbang, umo bac, rai diuk di baoh sang sa-ai Mùi tuk halei jeng kurang anak, kurang likuk. Meng hatai kham merat saong caong khin brei ka anek bhik di drei hu mbang bac tal labik tal dhua, hatai saneng ngak meda tuk halei jeng tamuh tagok dalam sa-ai. Oh huac kan kandah, sa-ai Mùi hu nao ralo labik, tal ralo palei piah bac megru jalan ngak mbang meng ayut sahabat saong dom urang hu ilamu nao dahlau. Kuhria nao kuhria mai, puac abih, meng sa mac chai padai sit, sa-ai kham merat patagok jeng sa sang mac chai padai, peih prong bruk ngak mbang. Blaoh meng sa sang mac chai padai sit, tuk ngak mbang hu, sa-ai buh jien tame patagok jeng 2 sang mac chai padai prong dang dhi sa dhi dua dalam tỉnh, yaok harei chai hu 200 tấn brah. Oh padeih di bruk mbang pah chai padai ka mikva, sa-ai daok khang hatai buh tabiak yaok tỷ đồng piah blei dây chuyền san xuat bahrau, paglaong chất lượng brah saong padang angan sang mac Ba Cao. Langiu di nan, sa-ai daok mboh tangin pambuak bruk haong dom labik ngak padai pajaih chất lượng piah pabak pajaih ka mikva urang nong, hadei di nan blei tame abih dom kaya nong di mikva ngak tabiak. Urak ini, angan brah Ba Cao di sa-ai oh lac hu dom labik dalam tỉnh khin takre bo daok hu mbaok di dom tỉnh, ban karei yau: Thái Nguyên, Lào Cai, Yên Bái, Thanh Hóa, Nghệ An, Khánh Hòa, Lâm Đồng, Đồng Nai,… Sang mac di sa-ai hu ba bruk ngak tani tanat ka 80 urang ngak, tame bilan yuak kuak tagok tal 100 urang ngak. Langiu di nan, sa-ai daok buh jien tabiak blei 12 baoh mac ép kam jeng dhang piah pablei ka dom sang mac ngak tapung ikan, ngak kiak, ngak cà phê… daong khik caga siam alam môi trường. Sa-ai Mùi khan lac: Tuk mereip ngak mbang prong, gaok ralo kan kandah ka jien ndo, njauk nao njim mesre grauk labik saong padang abih drap ar di drei. Gam haong bruk oh ka hu ilamu iek glang dây chuyền chai padai bahrau nan ye biak having akaok saong kuhria ralo di abih nan lac bruk duah labik pablei pandap panda. Saong harei ini, tuk angan brah Ba Cao di sa-ai hu labik dang kajap di angaok darak pasa, ye jien mek tame di sang sa-ai jeng patagok meng 2 tal 3 rituh triệu đồng yaok thun.

Tuk rai diuk hu ginup meda, sa-ai Mùi tuk halei jeng saneng tal manuac urang oh patuah jamo, dom urang kamei kan kathaot. Yaok thun, sa-ai hu daong 500 kg brah saong 2 triệu đồng padang ngak “Baoh sang anit ranam” ka urang kamei kathaot; daong 10 triệu đồng brei Kadung jien gam sa baoh hatai; daong kadung jien brei ka urang kathaot meng 2 tal 4 triệu đồng. Dalam bruk ieu pataom pren yava bhap bini daong ngak jalan mbak nao mai dalam palei, sa-ai Mùi hu rik tame 200 triệu đồng. Dahlau diah drei jeng kathaot rambah ralo, juak radaih nao tal yaok baoh sang di dom puk palei atah bayah piah blei ve chai saong pajeng jaik dom pluh  ký angaok jalan bak sruh menuk sruh ada, labuh trun labuh tagok saneng veik mboh biak drut drui. Urak ini, drei ngak mbang hu,  mboh urang kathaot drei jeng ranam nan ye drei daong brei, oh hu ralo jeng hu takik, tui pren di drei. Nan lac panuac khan di sa-ai Mùi.

Ndom ka sa-ai Cún Say Mùi, amuk Trần Thị Thanh Hương – Phaok Akaok Kapul urang kamei tỉnh Bình Thuận khan lac: Sa-ai Mùi nan lac sa urang ngak mbang naih jioi, sa-ai daok ngak siam dom sarak jang yau nghĩa vụ di puk palei nan biak siam. Langiu di bruk  daong jien piah padang ngak jalan mbak nao mai dalam palei, sa-ai daok daong brei ka dom baoh sang karei. Sa-ai nan lac kareih camin urang kamei gam ngak mbang naih joi gam siam hatai, thau anit ranam dom adei sa-ai hu rai diuk kan kandah saong samar daong ka dom adei sa-ai gaok kan kandah dalam rai diuk../.