Huyện An Phú, tỉnh An Giang hu jalan tapen negar atah labaih 40km, jaik dom huyen: Angkor Bourei, Bourei Cholsar, Koh Thum di 2 tỉnh Kandal saong Takeo, Negar Campuchia. Anak bruk jit ruak Covid-19 daok rah tabik sraw kadau, An Phú hu maong lac labik rah tabiak rilo bruk ngak suan adat tapen negar. Kuhria meng akok thun tal ini, dom gah chức năng hu mboh saong pacang cakak labaih 700 urang tame negar suan hukum. Tui jalan ngak pamong tal bruk oh caik luai ka urang tame negar suan hukum, rah tui jalan tapen negar, gah chức năng jeng daok khik iek catang jalan radaih haong jalan jalan kraong. Ong  Trần Hòa Hợp- Akok UB bhap bini huyện An Phú, tỉnh An Giang brei thau:       

“Khol dahlak peih bruk jak ba taong abih bhap bini pacang jit. Tapa nan bhap bini hu thau ka bruk ngak di drei dalam pacang, caga jit ruak, sumu duah mboh, pacang cakak, khan brei thau dom urang tame negar suan hukum meng Capuchia mai tame.”

Piah pacang caga urang tame negar suan hukum, gam ngak siam bruk pacang caga jit, langiu di bruk khik catang jalan tapen negar, tukvak jiak di ini, huyen An Phú hu peih bruk jak ba taong abhih bhap bini tame pacang caga jit ruak Covid-19, daong karja palei mboh dom urang tame tabiak negar suan hkum, pacang caga jit ruak Covid-19 pambak tal bhap bini. Sa-ai Nguyễn Minh Trí, daok di xã xã Vĩnh Hội Đông, huyện An Phú brei thau:

  “Dahlak lac bhap bini brei thau bruk di drei…Dahlak hu mbaok tame kapol khik iek di palei hu labaih sa bilan paje, piah khik caga prein yawa bhap bini, mikva jeng yau rup drei.”

Brei thau dom bruk kan kandah di kapol urang pasang iek, Đại úy Chau Ône, Phaok akok  Blai Biên phòng Vĩnh Hội Đông, Bol lin Biên phòng tỉnh  An Giang brei thau:

“ Langik sup melam ngak brei dom gah khik iek kan pasang iek hu abih…ka dua tra gaok tuk langik hajan hu hangin khang biak kan kandah. Min meng bruk kham merat glong abih di gah khik iek, khol dahlak pachreih gauk nao pasang iek di dom labik khik iek”.

Tỉnh Đồng Tháp hu labaih 50 km jalan tapen negar saong tỉnh Pray-veng, negar Campuchia,  2 pabah mbang negar dunya lac Thường Phước saong Dinh Bà. Jalan nao mai biak srau kadau haong rilo kraong ribaong, rilo labik sit nan ye biak lagaih ka kol nyu dauk kandauk piah tapa mbaok gah chức năng.     

  Ong  Nguyễn Văn Cọp, Akok UB bhap bini xã Thông Bình, huyện Tân Hồng brei thau, tukvak jaik di ini, karja palei gam haong dom gah ngak bruk pacang caga jit di jalan tapen negar, jhul khang bruk pathau khan, jak ba bhap bini ngak tui dom  jalan pacang caga jit Covid-19, oh pambuak bruk ba urang tame negar suan hukum, khang hatai khan brei thau tuk mboh dom urang ngak suan hukum tapen negar  hu karja palei saong dom gah chức năng bhian peih ngak.

  "Tal tukvak ini tapa bruk pathau khan meda ndom lac rahra dalam palei hu hatai sahneng biak glaong ka bruk pacang caga jit. Abih di nyu lac, ngan haong urang meng labik karei tame palei ye langiu di karaj palei mboh, ye bhap bini jeng hu mboh saong khan brei thau chip”.

Dom tỉnh karei yau Kiên Giang saong Cà Mau jeng hu peih ngak siam bruk pambuak gauk pasang iek urang tame tabiak; piah mboh saong langyah  sumu dom mbang urang tame negar suan hukum rah tabiak dalam tukvak ini.

Yaom lac jit ruak urak ini daok rah tabiak srau kadau, kan thau dahlau, min tuk ung lin saong bhap bini ba gauk tame ngak ye kan kandah halei jeng yam tapa. Dalam mbang pacang caga jit praong rilo glaih glar ini, bruk jum pataom nan sa mbang tra hu patagok./.

Urang lang: Ai Nghiem -7/12/2021