Urang Đoàn dam dara ba ia hacih ka urang bangsa S’Tiêng xã Xuân Hòa

Puk Ba Buông lac sa palei di urang bangsa S’Tiêng daok di xã Xuân Hòa, huyen Xuân Lộc, tỉnh Đồng Nai, daok meng thun 1995 tal ini. Dalam tuk daok pak ini, mikva hu karja xã Xuân Hòa ngak binek pacang ia craoh tapa palei piah ba ia pandar, ia pala drak. Yau nan min, meng thun 2014 mbiah tal ini, halau ia nan njom nerak kayua dom baoh sang raong glang peih tathuak ia nerak tame, nan ye mikva njauk salih tapa pandar ia bingun.

Ong Điểu Phê urang taha palei 2, xã Xuân Hòa, huyện Xuân Lộc brei thau, bingun kuac roh di labik ini tok hu ia di bilan hajan, tal bilan pandiak ye ia thu abih kayua ia ala taneh oh hu. Nan ye, bhap bini tok njuk hu hasit ia tame kuang bê tông, piah hlang blaoh mek menei, papah khan ao, daok ia menyum nao blei di gah langiu.

Taha Điểu Phê khan lac lac: “Bilan pandiak, ia pajeng meng gah langiu tame pablei ka khol dahlak yaom biak glaong, bhian meng 100.000 - 120.000 đồng sa met khoi ia. Raidiuk bhap bini di taneh thu lagu biak kan kandah ye dak glaih glar jang tuk tame bilan thu, ia pandar kurang biak  trak”.

Mboh hu dom glaih glar bo mikva bangsa S’Tiêng labik ini daok ndoa naong, thun 2014, sa-ai Đặng Quốc Lộc, Bí thư Đoàn xã Xuân Hòa, huyện Xuân Lộc likau urang ngak praong di xã brei Kapul Dam dara peih ngak danak dak ba ia hacih ka puk Ba Buông.

  Tui nan, sa-ai Đặng Quốc Lộc haong dom urang đoàn, dam dara dalam xã peih ngak danak dak meng di bilan thu thun 2014, yaok harei pajeng labaih 10 mbang, yaok mbang 500 lít ia ka bhap bini. Ia hu pajeng meng radaih rơ-moóc saong pandar radaih patuh salih gauk ba tame puk ka mikva.

Yau nan min, kayua bruk pandar ia di bhap bini biak praong, nan ye bruk pabak ia oh ka sumu haong bruk kurang ia hacih dalam bilan pandiak bhang ka bhap bini S’Tiêng di puk Ba Buông. Thun 2015, UB bhap bini xã Xuân Hòa iew Kapul Dam dara xã patui bruk peih ngak danak dak pabak ia hacih praong jang. Ia hu pajeng meng radiah tải  di dom harei some, harei but, saong harei suk  yaok adit. Yaok harei hu 7 mbang radaih pajeng ia, yaok sa mbang pajeng 3 met khoi ia. Jien peih ngak Danak dak kayua UB bhap bini xã likau di huyện saong jak ba urang ngak pahala rik tame, daok menuac piah ngak lac dom urang Đoàn, dam dara dalam xã salih gauk nao tui radaih pajeng ia tame yaok harei.

Sa-ai Đặng Quốc Lộc brei thau, tame danak dak ini, yaok urang đoàn, dam dara mboh bui sambai kayua prein yawa drei buh tame ngak hu rik daong ka mikva tani tanat raidiuk. Yaok radaih pajeng ia tame puk Ba Buông, mikva bui sambai, pataom abih thon, xô, phein…ba tabiak jalan cang mek ia. Abih di nyu lac, dom baoh sang hu urang kumei, uranaih atau ong muk taha hu dom urang đòan dam, dara daong, ba ia tame sang. Meng tuk hu radaih pajeng ia tame puk, raidiuk mikva labik ini hu salih birau mboh di anak meta. Tui nan meng thun 2014 tal ini, di bilan thu bhap bini bangsa S’Tiêng di puk Ba Buông oh daok nao blei ia hacih yaom glaong piah pandar .

          Ong Huỳnh Ngọc Tùng, Akok Ủy ban bhap bini xã Xuân Hòa brei thau, xã hu caga jien piah kuac bingun meng mac ka dom baoh sang min oh peih ngak hu, kayua ia ala taneh di labik ini nyu thu di bilan pandiak bhang. Kayua yau nan ye, gam saong bruk pambuak haong kapul Dam dara dalam xã khik bruk pabak ia pandar ka bhap bini S’Tiêng di puk Ba Buông, UB bhap bini xã jeng iew daong buh jien tame ngak jalan ba ia hacih meng dom pakat saong urang ngak pahala. Tuk hu jien daong, karja palei brei pambuak jalan ba ia hu blaoh ye bhap bini S’Tiêng puk Ba Buông meda hu ia hacih pandar luac thun./.

Urang lang: Aí Nghiêm - 31/3/2021