Tuk vak tapa, Trung Quoc bhian ba gilai taong ikan mai bhum tasik di Viet Nam, chap ikan saong mek dom pandap taong ikan di urang ngak ikan Viet Nam;  abih di nyu nan lac  tuk Trung Quoc padang gian khoan Hai Duong 981 suan hukum dalam bhum tasik di Viet Nam, ngak  kan kandah oh lac takik ka miva urang nao taong ikan. Min, meng dom sarak daong chip di Karja, hu daong ka urang nao tasik sanang hatai tabiak tasik, taong ikan saong khik caga bruk ngak po tasik palei negar drei.  

Thau lac bhum tasik kaoh pulao Hoàng Sa saong Trườg Sa nan lac labik tasik taong chap ikan meng kan mai, thun 2013, ong Nguyễn Ngọc Liêm daok di xã Phước Diêm, huyện Thuận Nam, tỉnh Ninh Thuận buh tame labaih 3 tỷ đồng, ngak birau gilai taong ikan hu prein khang 350 mã lực, piah nao taong ikan di labik tasik Hoàng Sa saong Hoàng Sa. Meng tuk salih tapa gilai praong hu prein khang, bruk tabiak tasik hu mbuan lagaih jang, taong chap ikan hadang hu rilo jang saong  jien mek tame jeng hu tani tanat jang, bilan 2 thun 2014 meng blaoh, ong Nguyễn Ngọc Liêm buh tame veik labaih 3 tỷ 5 rituh triệu đồng piah ngak sa sruh gilai birau hu prein khang 350 mã lực tra, piah ba gauk tabiak tasik, chap ikan. Ong Nguyen Ngoc Liem brei thau: 

 Bang : Urak ini, dahlak ngak gilai praong piah tabiak tasik, kayua caong khin nao tasik atah ye brei hu mac jamriah gilai praong birau, halam njol jeng brei ka nyu siam birau, piah nao taong iakn di labik tasik atah, hu yau nan ka meng drei ngak mbang hu jang.

          Hu hatai sahaneng dreih yau ong Liem, nan ye yaom lac daok ngak pô 5 sruh gilai chap ikan, dalam nan, gilai hu prein khang di abih nan lac 570 mã lực, sit di abih 350 mã lực, min adei sa-ai ong Phan Văn Hải saong Phan Văn Trung daok di palei Lạc Tân I, xã Phước Diêm, huyện Thuận Nam jeng daok buh tame labaih 4 tỷ đồng tra piah ngak birau gilai ikan hu prein khang 500 mã lực saong puac bilan 6 ini ba trun ia, tabiak tasik atah piah taong ikan hadang. Tui ong Hải, bruk ngak rilo gilai ikan praong prein khang nao chap ikan labik tasik Hoàng Sa saong Trường Sa oh lac ngak mbang hu kein laba bo daok rik tame bruk brei mboh quyền ngak po tasik di palei negar. Ong Phan Văn Hải lac: "Adei sa-ai khol dahlak hu 3 sruh ye, thun blaoh ngak gilai praong atah 21 met meteh, ngak mbang hu kein laba kayua hu tabiak di lingiu tasik atah, gilai praong biak lagaih, oh huac riyak khang hangin praong. Gilai praong ye pajeng hu rilo ikan hadang jang, daok gilai sit pajeng oh hu hadom. Gilai praong jamraik praong hu siam lagaih jang. 

          Piah ngak gilai ikan praong prein khang, urang nao tasik brei buh tame meng 4 tal 5 tỷ đồng,  nan ye mikva gaok oh lac takik kan kandah. Kayua yau nan ye, meng dom sarak daong jien jhung mesre ngak gilai, daong jien pato megru ngak thuyền trưởng, mac trưởng tui sarak di Rajaei hu pachreih mikva urang nao tasik kham merat buh jien tame ngak birau gilai, salih tapa gilai praong hu prein khang jsaong daong ka mikva sahanang hatai tabiak tasik. Ong Nguyen Van Bong, xã Phước Diêm, huyện Thuận Nam khan lac: "Rajaei daong urang nao tasik 10 ribau tỷ đồng khol dahlak biak bui sambai, kayua ini lac sarak di Rajaei daong urang ngak ikan khol dahlak ngak gilai birau praong hu prein khang jang piah nao taong ikan di labik tasik atah, gam ngak mbang di tasik gam khik caga bhum tasik di taneh ia drei".

Daok ong Nguyễn Hữu Ái, Pho akaok Kapul Ngak ikan tinh Ninh Thuận sahaneng yau ini:

" Danak dak daong urang ngak ikan tabiak atah hu yaom jien buh tame biak rilo yau nan, ngan saong urang nao tasik khol dahlak biak khin hu kayua tapa nan nyu daong ka mikva urang ngak ikan hu jien piah ngak birau gilai praong jang, hu pren khang jang piah tabiak tasik hu livik harei jang, abih di nyu nan lac tuk tasik Bien Dong yau urak ini. Caong khin di urang ngak ikan nan lac bruk daong nan samar hu peih tabiak piah urang ngak ikan khol dahlak hu jien ngak dom sruh gilai birau oh lac meng kayau bo daok lac meng pasei piah tabiak tasik  di Trường Sa saong Hoàng Sa hu lavik harei."

Bruk hu mbaok nao gam di gah khik iek ikan tasik, cảnh sát tasik dalam dom harei tapa saong dom sarak daong sumu di Karja, di dom gah, dom pakat nan lac prein khang daong urang nao tasik di tỉnh Ninh Thuan khang hatai tabiak taong chap ikan di labik tasik Hoàng Sa, Trường Sa piah gam chap mek iakn gam rik daong khik caga bruk ngak po tasik di palei negar./.