Bruk salih taneh ngak padai takik kein laba tapa pala durain pablak haong rilo janih baoh kayau karei di saai Phạm Chí Tâm (daok di puk Phú Thuận, xã Tây Phú, huyện Thoại Sơn) lac sa bruk njauk ndom tal. Saai Tâm khan lac, tuk camriep, saai eng drei bac ilamo pala ngak tapa harak mbao saong dom urang nao dahlau, gam haong nan, sa-ai khang hatai pandar ilamo - kỹ thuật tame bruk ngak. Nan ye, yaok bilan pala, saai Tâm jeng paik hu durain siam hu chat luong, ba mai kein lagaih kinh te glaong.

Jeng dreih yau rilo janih phun pala karei, yaom baoh durian nyu pagam pambak biak rilo tame darak pasar. Hadei di yaok mbang paik baoh, sa-ai Tâm pandar ia pruh, khak, jru khik caga phun pala njauk liều lượng. Langiu di nan, sa-ai daok eng drei bac megru saong thau cambaih dom ilamu pala durian, jalan iek glang phun durian yau ye: cakak dhar, kaoh bingu, langyah dom janih bimao ruak, ngak haci hacih phun, gha durian. Piah hu lagaih tuk iek glang, sa-ai Tâm daok brei ngak jalan nding pruh ia tự động. Jalan ngak ini gam patak pataom hu jien pah menuac ngak, gam khik ka phun pasah yau gauk, haong ia pruh mbiah ginup. Jak jeng mek hu dalam mbang pala ngak camereip di mangaok taneh praong 25 công, haong labaih 100 phun durian, lac paik hu jaik 8 tấn baoh sa vụ, yaom pablei 80.000 - 90.000 đồng/kg, mek jien tame hu labaih 500 triệu đồng.

Sang ong Dương Văn Chờ (daok di xã Tây Phú) jeng tabiak truh kan kathaot meng khang hatai salih janih phun pala, athur raong. Akaok thun 2021, ong Chờ hu pilih ruah bruk raong pabui glai, haong hatai caong ngak tabiak jalan nao bahrau ka bruk ngak mbang di sang. Diuk pasang ong Chờ brei ramik veik var ro saong blei 10 drei pabui glai pajaih mai raong. Gam ngak, gam bac megru ilamo meng dom urang nao dahlau, saong hu bruk daong ba di gah chức năng, hadei di jaik 10 bilan palao raong tui jalan salamat sinh học, mbang raong pabui glai camriep hu pablei tabiak dalam bui smabai chreih chrai di sang. Tal urak ini, tapon pabui glai di ong Chờ tagok hu labaih 100 drei. Meng paok jien mek hu meng bruk raong pabui glai, ong Chờ mek piah ramik pasiam veik sang danaok, peih praong var raong, raidiuk sang ong tani tanat jang dahlau deih biak rilo.

Pachreih tui bruk salih janih phun pala, athur raong, rilo urang nong di huyện Thoại Sơn hu ngak iek saong ba tame ngak, pala – pablei salih dom janih phun pala, athur raong hu yaom kinh tế glaong, rik tame bruk parilo janih pandap panda kaya nong, cak rok patagok dom bruk ngak, jit vu bahrau dalam kinh tế palei pala.

Akaok Kapul urang ngak nong huyện Thoại Sơn Nguyễn Đình Chưởng brei thau: Meng takre bac taa, rilo urang nong dalam huyện thau pilih ruah saong pambuak haong khau tin meng darak pasa, meng nan ba tabiak dom bruk ngak hu makna dalam bruk salih janih phun pala, athur raong lagaih, ba mai kein laba glaong.

Anak tal, Kapul urang ngak nong huyện Thoại Sơn meda pato tacei, daong ka urang nong paglaong kein laba dalam bruk ngak, pala – pablei salih tapa bruk pathau khan saong pambak praong bruk ngak hu kein laba; daong ka urang nong gah phun jien, ilamo, salih bruk ngak saong pandar ilamo - kỹ thuật tame bruk pala, ngak, peih praong dom jalan pambuak gauk ngak, padang ngak dom bruk tui jalan pambuak gauk, rik daong paglaong jang kein laba dalam bruk ngak, daong ka urang nong ngak kaya mada jang. Gam haong nan, daong ka urang salih số, salih jalan sahaneng meng bruk ngak nong tapa cak rok patagok kinh te ngak nong, pambuak haong hatai caong di darak pasa./.