Sang sa-ai Đặng Thị Hoa daok di xã Long Thạnh, huyện Giồng Riềng hu labaih 25 thun ngak mbang hu haong bruk raong ikan pathoc dalam paga halam jeng lac kreih camin ka bruk tari taring, kham merat yam tapa kan kandah, yam tabiak truh kan kathaot.

Sa-ai Hoa khan lac, thun 1996, sang gaok biak rilo kan kandah. Oh thau ngak hagait piah duah jien, sa-ai Hoa raong iek 1.000 drei ikan pathoc. Hadei di 6 bilan raong, pablei hu 3 triệu. Lavik lavik harei, tapa dom thun, sa-ai raong rilo jang. Urak ini, sa-ai daok hu 15.000 drei ikan pathoc, kuhria pablei di tuk tết nguyên đán.

Paga halam hu ngak hình chữ nhật, glaong meng 2 mét meteh tagok. Sa-ai Hoa brei thau: raong ikan dalam paga halam hu rilo kein lagaih, yau ye raong hu rilo, pandap mbang hu pataom veik, ikan oh gaok gluh baok, nan ye nyu praong samar saong samu gauk.

Dalam 3 bilan camereip ikan daok sit brei mbang pandap mbang asar, hadei di nan, sang nao pataom akaok ikan di darak saong nao mek baoh bao darang, ikan sit di mblang hamu. Ngak yau nan, patak pataom hu jien blei pandap mbang ka ikan, bo daok daong ka ikan hu ralow khang, bingi jang, urang blei biak takre

Hadei di 6 bilan raong, meng 10.000 drei ikan pajaih, pablei hu jaik 3 tấn. yaok thun mek pablei hu 2 mbang, sa-ai Hoa mek jien tame hu labaih sa ratuh triệu bo oh abih rilo prein iek glang  saong daok hu tukvak ngak bruk karei.

Meng tari taring, thau kuhri kuhria, sa-ai Hoa tabiak truh kan kathaot saong yam tagok ngak kaya meda, padang hu sang, blei hu hamu, taneh. Urak ini, rilo mikva dalam palei mai duah thau, bac megru bruk raong ikan ini. Sa-ai Hoa halan hatian daong ka mikva blei ikan pajaih saong tacei jalan raong piah hu laba rilo.

Sa-ai Hoa hu kakei lac, piah ka ikan khang kadang, urang raong brei caik meta tal ia raong, paga halam, piah plaih ikan nduac tabiak. Tuk raong rilo, brei hu phun jien saong hu menuac dalam sang nao duah pandap mbang ka ikan tui jalan yau Yuan lac “lấy công làm lời” ye bruk raong ikan dalam paga halam meng ba mai kein laba glaong di abih. Taphia bruk tui iek pandap mbang, brei khik iek siam ia raong ikan, bhian buh tame ia sara pametai anek ruak saong ngak dom jalan pacang caga ruak di ikan.

Sa-ai Lê Thị Kim Phượng – Akaok kapul urang ngak nong xã Long Thạnh, huyện Giồng Riềng ndom lac: Bruk raong ikan pathoc dalam paga halam oh cang hu taneh praong, tok hu mbaok ia di kraong, ribaong lac raong hu. Sang sa-ai Hoa raong meng labaih 25 thun ini mai saong tal urak ini jeng daok raong biak hu. Palei jeng pambak paraong bruk raong ikan ini piah ka dom sang peih bruk raong meng hu mbaok ia di kraong anak sang. Palei jeng pachreih dom sang, abih di nyu lac dom dam dara peih bruk ngak mbang, padang mbang ngui, piah meda ngak kaya meda meng mblang taneh di palei, oh cang nao ngak mbang atah./.