Saai Nguyễn Hoàng Việt, Yam ndok Hợp tác xã Hươu sao Tây Nam Bộ brei thau, hatai sahaneng padang mbang ngui meng njuah bingu tabiak meng dom mbang nao duah thau darak pasa di dom tỉnh bhum kreh negar. Maong mboh dom tapon njuah bingu hu raong di dom baoh sang piah mek takaiy, saai duah thau kambuan di anek njuah, jalan iek glang, pandap mbang saong mboh janih athur glai ini meda diuk hu siam haong langik tasik saong taneh riya di dom tỉnh miền Tây.

Meng 10 drei njuah bingu raong tuk camereip di thun 2019, tal urak ini, tapon njuah bingu di saai Việt tagok hu labaih 50 drei duh ka bruk pabak anek pajaih saong takaiy piah ngak dom pandap yau ye takaiy tram ia hani danko, takaiy tram alak, dom janih cao njuah. Dom drei njuah pajaih saong dom pandap meng takaiy njuah di saai Việt hu pablei dalam saong langiu tỉnh. Jien mek tame meng tapon njuah bingu di saai hu labaih 500 triệu đồng sa thun.

Piah peih praong bruk ngak, daong ka rahra salih phun pala, athur raong, thun 2022, Hợp tác xã Hươu sao Tây Nam Bộ hu peih ngak danak dak “Pambuak gauk raong njuah bingu ngak jru di Bhum taneran kraong Cửu Long saong mek pandar dom yaom glaong jru tavao meng takaiy di njuah bingu”. Danak dak hu ba mai kein laba glaong, rik tame bruk salih janih phun pala, athur raong, padang ngak palei pala bahrau.   

Jalan ngak di danak dak lac piah dak harei dak salih dom bruk raong glang meng kan, langyah dom bruk oh lagaih bo bruk raong glang meng kan daok gaok, yau phun jien buh tame raong glang tagok glaong, jit ruak, tachrauk alam môi trường… Hadei di labaih 1 thun peih ngak, Hợp tác xã Hươu sao Tây Nam Bộ hu pambuak bruk haong 30 labik raong tui jalan khik ramik siam drei pajaih njuah hu chat luong, patagok kein laba gam haong nang suat raong glang saong duah jalan pablei tabiak tani tanat ka dom urang hu mbaok tame, tani tanat bruk pambuak gauk raong glang suai lavik. Tapa nan, ba bruk ngak  ka labaih 300 urang ngak dalam palei haong yaom jien mek tame lac 7 trieu dong sa urang sa bilan.

Meng phun jien mek tame meng takaiy hacih hu blei veik meng dom baoh sang raong njuah hu pambuak bruk, saong hu Hợp tác xã Hươu sao Tây Nam Bộ duah jalan pablei tabiak, takaiy hacih hu sơ chế saong ba tame ngak. 

Ong Võ Văn Hiệp, Phó Akaok Ủy ban bhap bini xã Phú Kiết, huyện Chợ Gạo brei thau, bruk jak jeng di danak dak “Pambuak gauk raong njuah bingu di bhum Taneran kraong Cửu Long saong mek pandar dom yaom glaong jru tavao meng takaiy njuah bingu” meda lac jalan ngak piah ka Hợp tác xã Hươu sao Tây Nam Bộ patui jalan pambak tabiak, peih praong bruk raong njuah bingu. Tapa nan, rik tame bruk salih janih phun pala athur raong tui jalan kein laba jang saong lac talei pambuak gauk khang kajap di 3 gah, lac gah ngak tabiak, urang raong njuah bingu saong urang blei pandar, ngak jeng dom yaom glaong ba mai kein laba glaong.

Urak ini, Ủy ban bhap bini xã Phú Kiết, huyện Chợ Gạo daok ba mbuan lagaih, daong ka Hợp tác xã Hươu sao Tây Nam Bộ hu pambuak haong dom sarak, phun jien mesraiy yaom laba lap dalam bruk peih praong, cak rok patagok HTX; yaih khan ka kein laba meng bruk raong njuah bingu di saai Nguyễn Hoàng Việt piah urang raong dalam saong langiu tỉnh rivang iek, bac megru ilamo,… Nan jeng lac jalan piah peih praong darak pasa pablei pandap meng takaiy njuah bingu piah jhul bruk raong njuah bingu cak rok patagok khang kajap, rik tame bruk patagok jien mek tame ka rahra dalam palei./.