Palei Lương Trực, xã Vĩnh Phú, huyện Giồng Riềng hu taneh ngak nong jaik 300ha, dalam nan hu 186 ha taneh njaom likhun ngak padai takik hu laba. Mikva urang ngak nong palei Lương Trực pilih ruah phun menaih lac janih phun pala praong kayua menaih lagaih haong bhum taneh lakhun, taneh dhaong. Menaih mbuan pala, takik ruak kik halak halin, takik abih jien sahui, khik caga  prein yava ka urang ngak nong pala manaih. Langiu di nan, manaih hu labik pablei tani tanat, yaom kinh tế glaong.

Ong Lương Quốc Tri, akaok kapul urang nghak nong xã Vĩnh Phú  chreih chrai khan lac: "Tapa ilamu pala saong klah rabha ilamu pala manaih, urang ngak nong palei Lương Trực pala menaih hu baoh luac thun, abih di nyu lac pala manaih karei bilan, daong ka urang ngak nong hu jien mek tame rilo”.

Ong Nguyễn Văn Minh – akaok kapul pambuak gauk pala menaih palei Lương Trực lac menuac camereip abih peih bruk pala menaih brei thau, thun 2016, ong salih 1,5ha taneh pala padai takik laba tapa pala menaih. Hadei di sa thun mboh hu kein jang 3-4 mbang duk haong ngak padai. Tal urak ini, taneh manaih di sang ong Minh labaih 4ha, mek hu 4.000-5.000 baoh yaok ha sa bilan. Yaom menaih meng 7.000-12.000 đồng sa baoh, laba hu jaik 500 triệu đồng yaok thun. Ong chreih chrai lo saong jak ba mikva dalam palei ba gauk pala menaih.

Ong Nguyễn Hồng Nam, daok di palei Lương Trực lac urang dalam kapul pambuak gauk pala menaih khan lac: “Dahlak mboh pala menaih hu laba rilo, jhung thun 2022 dahlak pok ro pala 6 công menaih. Dahlak bac megru ilamu pala meng dom urang dalam kapul yau ye bruk pok ro, palih ruah pajaih saong iek glang njauk ilamu kỹ thuật. Tal urak ini, menaih sang dahlak hu 1 thun, daok tamuh siam, dahlak chreih chrai lo”. 

Kapul pambuak gauk pala manaih palei Lương Trực padang tabiak meng thun 2021, tuk camereip hu 5 sang tame pala haong taneh praong 11ha. Tal thun 2022 tagok hu 10 sang, dom sang hu mesraiy phun jien meng kadung jien daong urang ngak nong tỉnh haong yaom jien abih tih 300 triệu đồng piah buh tame pala menaih. Urak ini kapul hu 34 urang haong taneh pala 50ha. Mikva urang ngak nong laba hu meng 85-100 triệu đồng yaok ha. 

Kapul pambuak gauk pala manaih palei Lương Trực pambuak bruk haong dom pakat, dom gah peih dom tal pato pasram, ba brei ilamu, kỹ thuật; daong brei mesraiy phun jien haong yaom laba lap, duah labik pablei, mbaoh tangin pambuak bruk pablei abih baoh menaih, trun jien sahui, tagok jien mek tame ka urang dalam kapul saong mikva urang ngak nong.

Ong Trần Văn Đực, daok di palei Lương Trực brei thau: “dahlak pala 5ha menaih, laba hu 120 triệu đồng sa ha, dahlak chreih chrai lo tuk bruk pala menaih di palei hu laba glaong. Abih di nyu lac oh duh hatai ka labik pablei, oh huac urang kateik yaom, daong ka mikva dalam kapul sahnang hatai pala, caokrok kinh tế sang”.     

Manaih Vĩnh Phú hu Hội đồng taong yaom, dak angan pandap OCOP huyện Giồng Riềng mbang I thun 2023 brei angan lac OCOP 3 patuk. Bruk pala manaih hu peih tabiak jalan nao bahrau ka urang ngak nong xã Vĩnh Phú, daong ngak brei hu rilo janih kaya nong di palei. Ini lac jalan patagok khang kajap, xã pachreih urang ngak nong pambak praong di anak tal saong tacei pato urang ngak nong pandar khak hữu cơ daong abih takik phun jien, tagok jien mek tame, cakrok kinh tế, rik daong padang ngak palei pala bahrau./.