Meng hadei Tết Nguyên đán, phun thanh trà daok tame bilan paik baoh saong brei baoh rilo tal abih bilan 3 saka ia bulan. Dahlau daih, rahra rilo meng pala phun thanh trà mesam, dom thun jaik ini, thanh trà yamen daok hu mikva pala rilo jang, ba jien tame glaong jang.

Thanh trà mesam urak ini yaom 20.000 - 30.000 đồng/kg, thanh trà yamen hu yaom tani tanat meng 120.000 - 130.000 đồng/kg. Tui kuhria, jien mek tame yaok thun meng 1.000 m2 thanh trà mesam hu 30 triệu đồng saong thanh trà yamen lac labaih 70 triệu đồng.

Ong Huỳnh Văn Cập, Yam ndok HTX pala ngak saong pablei phun pajaih – baoh thanh trà yamen Đông Thành, ban sit Bình Minh khan lac, thanh trà yamen baoh praong, asar sit, rilow kapal, yamen saong pahe. Phun mbuan pala saong paik hu baoh hadei di 3 thun pala. Meng 1.000m2 pala thanh trà yamen, yaok thun paik hu meng 50 - 70 kg baoh haong yaom pablei 120.000 đồng/kg, kaoh abih phun jien ye thanh trà yamen laba hu labaih 70 triệu đồng. Piah paglaong yaom phun thanh trà yamen, HTX Đông Thành hu daong tut angan độc quyền nhãn hiệu phun pajaih thanh trà, gam haong nan, daok padang jeng pandap di Danak dak yaok xã sa janih pandap (OCOP), daok pamaong tal bruk ba tame pablei di dom siêu thị.

Hu kak kajap rilo thun haong phun thanh trà mesam, urak ini ong Huỳnh Văn Hào, xã Đông Thành daok salih tapa thanh trà yamen saong tuk camereip mboh hu kein laba. Urak ini, meng 40.000 m2 thanh trà yamen, yaok thun, ong Hào paik hu jaik 3 tấn baoh.

Mboh hu prein khang saong kein laba di phun thanh trà yamen, rilo urang ngak nong di ban sit Bình Minh hu peih praong taneh pala. Pabak hatai caong di urang ngak bein, langiu di bruk pablei baoh thanh trà, HTX Đông Thành urak ini daok pabak rilo phun pajaih thanh trà yamen haong yaom tani tanat jaik 200.000 đồng/phun. Rilo tuai, menuac urang di dom palei karei jeng mai tal bein piah ravang iek, duah thau ka prein khang, kein laba di janih phun pala ini.

Ông Sơn Rưa, Phaok akaok UB bhap bini xã Đông Thành, ban sit Bình Minh brein thau, meng rilo thun tapa, phun thanh trà hu maong lac phun pala di palei, ba jien tame biak tani tanat. Bruk njauk biai nan lac, phun thanh trà yamen hu peih tabiak jalan ka janih phun pala ini hu pambak praong saong nao atah jang tuk baoh nyu mekre saong yamen. Anak tal, Vĩnh Long pataom tame ngak danak dak daong phun pajaih ka rahra, gam pathau khan ka rahra pasiam bein klak, sangka iek glang piah peih praong taneh pala, paglaong năng suất piah patagok jeng bhum pandap đặc sản ka palei.

Mboh hu prein khang di phun thanh trà, Jabat kinh tế ban sit Bình Minh hu daong padang nhãn hiệu thanh trà yamen, bảo hộ quyền phun pajaih, angan je pandap panda kapul nyaom, tui jalan patagok jeng pandap OCOP di palei. Daok gah suai lavik, Jabat Kinh tế daong bruk pato pasram, ba brei ilamu kỹ thuật saong khik ramik pajaih phun thanh trà, pambuak bruk roh duah saong patagok dom pandap ngak tabiak meng thanh trà piah paglaong yaom di phun pala ini, ba jien tame tani tanat ka menuac sia dalam palei./.