Meng di tuk page mesup, yaok piluh urang ngak bruk cap mek hadang ba gauk trun labik hamu raong hadang – pala padai di sang amuk Mai Thúy Hằng daok di puk Thành Phụng Tây, xã Đông Hưng, huyện An Minh, Kiên Giang piah mek hadang ginraong hijao. Hadang ginraong hijao daok mala gha padai nan ye tuk mek njauk taoh ia tabiak thu di dalam hamu piah hadang pataom trun sa jalan ribaong vil val hamu. Urang ngak pandar mac pagam takai ada nduac piah ngak brei ralai gluh, tui nan, hadang pataom tame takai hamu, urang tok ba tangin tame mek buh tame kadung blaoh ba tagok mangaok thu.

Hu yaok pluh thun ngak bruk raong hadang saong pala padai, min ini lac thun camriep sang amuk Hằng hu Bilai pachreih nong huyện An Minh daong brei tame bruk ngak iek raong hadang gam pala padai pasiam veik, pambuak haong pandar dom pandap sinh học Bồ Đề, ba mai rilo siam lagaih.

Amuk Hằng brei thau lac, hu mbaok tame bruk ngak, dom sang hu gah pachreih nong haong urang jakar ilamo Công ty Cổ phần Tập đoàn Thủy sản Bồ Đề pato pasram ilamo raong hadang ginraong hijao tano pambuak haong pandar kong nghe sinh học Bồ Đề dalam raong hadang gam pala padai.

Pandap kong nghe sinh học Bồ Đề hu kakei brei pandar 80 lít/ha/vụ raong. Hu mbaok tame ngak iek, sang rahra hu Tap đoan Bồ Đề daong 50% yaom pablei pandap sinh học, daok veik gah ngak nong daong saong sang rahra tame bruk ngak pabak tame. Hadang pajaih giraong hijao abih tih jeng lac hadang tano kayua Pasak pajaih kaya ikan An Giang pabak brei saong daong 10% yaom, kanja daong mateh meng phun jien padang ngak xa palei pala bahrau, daok veik lac rahra pabak tame mateh.

Dahlau di tuk palao raong hadang, urang nong hu pato tacei pandar cur am pambuak haong buh pabak cur Dolomite abih tih lac labaih 200 kg/ha piah ngak hacih ia raong di akaok vụ. Hadei di nan, dalam 10 - 15 harei pandar pandap sinh học Bồ Đề piah ngak hacih saong tani tanat ia raong, daong ka dang praong siam, khang kadang.

Tapa cap mek hadang ginraong hijao raong pasiam veik, hu pabak pandap mbang brei nang suat glaong biak tatuak drei, urang nong mek hadang hu biak rilo.

Amuk Mai Thúy Hằng chreih chrai brei thau: “ia hu ngak haci meng pandap sinh học Bồ Đề biak siam, hadang pajaih praong siam hu rilo drei, raong salih bharau hu brei mbang nan ye hadang praong samar. Dalam tukvak raong labaih 5 bilan, labik mblang hamu praong 1ha, sang dahlak mek hu 450kg hadang ralaow, trak 15 drei sa kg. Hadang mekre, yaom pablei 100.000 đồng/kg, jien mek tame hu 45 triệu đồng, kaoh abih phun jien daok laba hu labaih 30 triệu đồng".

Langiu di nan, ia raong hu ngak hacih meng pandap sinh học Bồ Đề daong ka phun padai tamuh biak siam. Urak ini, padai daok caga yuak, tui kuhria padai di sang amuk Hằng mek hu labaih 6 tấn/ha. Tui yaom padai hu gah mai blei yaom 8.200 đồng/kg, jien mek tame labaih 50 triệu/ha, kaoh abih phun jien buh tame ngak, jien laba daok hu meng 35 - 40 triệu đồng/ha.

Tui panuac khan di amuk Nguyễn Thị Hồng Điệp, Akaok Bilai pachreih nong huyện An Minh, thun 2023 meng blaoh, dalam huyện ngak hu 500ha ngak iek raong hadang gam pala padai pasaim veik, pambuak bruk pandar pandap kong nghe sinh học Bồ Đề di 5 xã lac: Đông Hòa, Đông Thạnh, Đông Hưng, Vân Khánh Đông, Thuận Hoà.

Anak mata brei mboh, bruk rami ramik veik dom bruk ngak saong pandar ilamo bahrau tame raong hadang gam pala padai pasiam veik, rilo janih kaya ikan, pandar pandap sinh học Bồ Đề hu daong ka urang nong ngak mbang, pala drak hu kein laba jang dalam tuk njauk kan kandah di bruk bien doi khi hau, patagok jien mek tame, tani tanat raidiuk./.