Kadha “Urang ngak hamu caong thau” adit ini, kol dahlak hulin hu kadha vak di mangaok mbao ngak nong Viet Nam ndem ka bruk patagok jien mek tame meng pala vú sữa parai tabiak tui bilan di Sóc Trăng.

Vú sữa lac phun pala ba mai kein laba kinh te glaong, tani tanat jien mek tame ka mikva urang nong di huyện Kế Sách, tỉnh Sóc Trăng. Pak ini daok lac bhum pala praong, pabak rilo janih baoh vú sữa brei ka bruk pablei tabiak negar langiu, yau ye Vú sữa tím Tứ Quý, vú sữa bơ hồng... Urak ini, taong abih mblang taneh pala vú sữa di dalam huyện Kế Sách mek hu labaih 2.200ha, baoh paik hu yaok thun labaih 30.000 tấn.

Tui Chi cục Pala drak saong khik caga phun pala tỉnh Sóc Trăng, vú sữa hu paik meng puac bilan 11 tal akaok bilan 4 thun hadei. Min, bruk paik rilo tui bilan pala haong gauk,  ba tal bruk pablei oh abih, yaom vú sữa laik trun khang. Dalam tuk nan, dom bilan daok veik baoh lac kurang. Kayua yau nan ye, taphia di bruk daong dom HTX peih praong mblang taneh pala vú sữa tím Tứ Quý, Chi cục Pala drak saong khik caga phun pala tỉnh jeng pambuak haong dom kapul pambuak tal roh duah, pato tacei mikva urang nong dom ilamo langyah bruk tabiak bingu rah tui bilan ka phun vú sữa piah patagok siam lagaih kinh tế di mangaok sa labik mblang taneh, abih di nyu nan lac patagok sản lượng pabak ka bruk pablei tabiak negar langiu.

Di HTX ngak nong Lộc Mãi, xã Trinh Phú, huyện Kế Sách, Chi cục hu mbaok tame bruk langyah pala rah tui bilan phun vú sữa ngan haong mblang taneh pala labaih 6ha. Ong Sử Quốc Lộc, yam ndok HTX brei thau lac, bruk langyah tabiak bingu suan bilan hu ba mai siam lagaih tuk oh ngak brei tagok phun jien, bo daok khik  kajap năng suất dut saong bruk pala njauk bilan (labaih 20 tấn/ha) saong yaom pablei tabiak glaong jang labaih 9.000 đồng/kg. Bruk pandar jalan langyah tabiak bingu rilo meng lac pambak tame bruk praong tagok siam di phun vú sữa, oh pruh jru hóa chất nan ye phun vú sữa tamuh siam, baoh hu hu salamat, pabak siam dom bruk ba tabiak darak pasa negar langiu.

Tui ong Lộc, peih bruk pala rah tui bilan ka phun vú sữa oh cang hu ilamo glaong, po bein tok caik hatai pasang iek saong bac magru lac meda ngak hu. Abih di nyu nan lac brei kham marat, tari tareng, kayua mayah tui jalan pala meng kan, di bilan 6, bilan 7 yaok thun phun vú sữa tabiak bingu njauk bilan, po bein caong langyah piah phun tabiak bingu, brei khang hatai cakak klaak dom dhar phun daok tabiak bingu piah tamuh caduk birau saong sangka iek glang siam dom caduk ini piah tabiak bingu di bilan 9, bilan 10. Kayua yau nan ye, baoh vú sữa meda hu paik di bilan 5, bilan 6 di thun hadei. Taphia di nan, piah langyah tabiak bingu suan bilan hu jak jeng, umo thun di phun vú sữa brei hu meng 5 – 10 thun hadei di tuk pala.

Chi cục Pala drak saong khik caga phun pala tỉnh Sóc Trăng saong po bein njauk gauk haong dom doanh nghiệp pataom blei vú sữa pablei tabiak negar langiu mayah pabak baoh tuk oh njauk bilan atau aval jang bilan pala, po bein hu tagok yaom jang 10.000 đồng/kg, ini lac prein pachreih ba ka po bein pala vú sữa di tỉnh pandar saong peih praong bruk pala rah tui bilan. Tapa nan padang ngak saong jhul khang talei pambuak gauk, pablei vú sữa di dom po bein, HTX saong doanh nghiệp hu khang kajap saong kein laba jang.

Yaok thun, tỉnh Sóc Trăng pablei meng 400 – 500 tấn vú sữa tapa darak pasa Mỹ, jalan pala parai tabiak tui bilan mayah hu pandar ngak gam gam ka dom po bein, ngan haong yaok tukvak cambaih laih meda daong ka mikva hu jien mek tame tani tanat saong patagok yaom glaong di pandap panda./.