Kadha mek hu jien tik yaok thun di ong Phan Văn Bịt, umo 62 thun daok di phuong Long Hưng, quan Ô Môn, Ban Cần Thơ oh daok hagait barau haong mikva di dalam bhum palei. Taneih pala baoh kandiuk Siem di ong Bịt yaok thun brei baoh sumu gauk saong mek kein laba yaok thun labaih 4 ty ndong, ngan haong nan peih hu ralo bruk ngak ka mikva kuhria rah tapa meng 7 - 8 urang ngak taom thun, yaok bilan jien mek tame meng 12 - 15 trieu ndong.

Ong Bịt khan brei thau lac, baoh kandiuk Siem mbuan si pala, takik halak mbang, mbuan diuk tui taneh, sa thun brei 2 baoh ka 2 mbang pala, siam baoh karaoh, yaom pablei biar abih di nyu hu 30.000 kg, mada hu tuk yaom meng 50.000 – 60.000 ndong sa kik, tuk kurang baoh karaoh ye yaom kaom di nyu mada tagok glaong jang. Thun ni, mboh baoh kandiuk Siem di sang ong Bịt hu jaik 200 tan, masa tuk wak paik baoh pablei hadei di Tet mbiah tal abih bilan 4.

“Taneh pala di dahlak hulin praong 90.000 m2, dalam nan jaik 70.000 m2 daok tabiak baoh. Caong khin di hulin dahlak lac hu darak pasar siam piah ka mikva hu kein laba tani tanat. Thun blaoh yaom pablei karo kayua yau nan ye dahlak hulin ngak hu labaih kurang 250 tan, pablei hu meng  7 - 8 ty ndong”.

Tui bhian thau di ong Phan Văn Bịt, piah pala baoh kandiuk Siem hu baoh siam makre njauk caik hatai sangka maong iek phun pala, njauk caik hatai di abih di nyu tuk phun kandiuk tabiak bingu. Phun kandiuk Siem meng di tuk nyu tabiak baoh mbiah tal tuk paih baoh dui atah labaih 3 bilan min tal tuk baoh hu jaik 60 harei njauk brei papaok baoh piah baoh praong yau gauk, thaik thaot gheih ghang, pablei hu yaom glaong. Gam tui di nan hu bruk buh khak, pruh jru caga halak haling njauk janih kadha masa tukvak meng taduan hu siam makre ralo.

Phun kandiuk Siem brei baoh 2 mbang dalam sa thun, yaok sa baoh di nyu trak meng 500 gram tal 700 gram. Urakni, baoh kandiuk Siem hu pablei ralo abih nyu di dalam nagar gam tui yaom meng 50.000 - 60.000 ndong sa kilo. Kayua yau nan ye, ong Bịt caong hatai khi  hu daong brei padang angan je saong peih praong darak pasar, dalam nan hu pablei tabiak langiu nagar.

Phun kandiuk Siem yau njauk hatai janji saong bhum taneh Ô Môn mboh hu ralo baoh sang di bhum ngak nong Song Hau di xa Thới Hưng, huyen Cờ Đỏ jeng daok pala saong mek hu kein laba glaong yaok pluh mbang pachoh dut tui ngak padai. Ong Nguyễn Thành Hải, xã Thới Hưng khan brei thau lac, urakni baoh sang ong daok pala 4 ha phun kandiuk Siem, tapa mbang pala mbang ka dua ong hu laba dan saong masa tukwak meng anak tal si mada jalan ngak praong tagok meng 5 - 7 ha. Tui ong Hải, jien buh tame piah maong iek phun kandiuk Siem biak mada glaih glar, min tapi mboh siam brei ka jien mek tame kein glaong jang pachoh dut tui pala phun karei. Urakni, dom baoh sang caong hatai khin hu daong brei padang angan jie piah sanang pambuak saong darak praong sit pasar raya, daong jaik taphia saong urang blei.

“Dahlak pala dui atah 18 bilan mek baoh, barau blaoh tame mbang ka dua, mbang ka dua mbiah hu laba paje, taneh sa ha drei jang mek hu sapluh dom tan. Yaom 30 rabau drei baoh hu raba ralo paje, kein siam jang pachoh dut tui ngak hamu mboh glaong jang ralo yaok 10 mbang. Caong hu angan je baoh karaoh, mada pablei tabiak langiu nagar drei meng baoh chreih si ngak”.

Jalan binguk thaik thaok pala baoh kandiuk Siem brei hu kein laba glaong ka mikva di Can Tho. Min, piah pachreih hu prein khang glaong abih di nyu brei ka jalan binguk thaik thaok pala phun kandiuk Siem njauk brei hu dom jabat karja daong ka urang ngak nong peih praong taneh ngak mbang, padang angan je jeng ye duah dom janih labik dhua pambuak saong urang blei salih, duah jalan pablei tapa darak Trung Quoc, Nhat Ban piah daong mikva sanang hatai ngak mbang pala phun kandiuk Siem.