Nghệ nhân Cửu Lạc ndih tapui thun 1948 di palei Cam Châu Hanh, xã Phan Thanh, huyện Bắc Bình, tỉnh Bình Thuận. Umo 14 thun, ong tui nghệ nhân Văn Do nao tal dom palei Cam piah hu pang saong maong iek gru taong Ghinăng saong Paranưng. Hu sa mbang, Cửu Lạc likau gru taong iek. Sap ginang di Cửu Lạc bahrau paoh tagok ngak ka nghệ nhân Văn Do saong dom taha palei hu mbaok tuk nan mboh tatuak drei. Meng meta maong di drei, nghệ nhân Văn Do mboh, ini lac sa dalam dom urang taong ginang gheih. Ong palakhah anek kumei drei brei ka Cửu Lạc saong pato Cửu Lạc ilamu taong ginang. Umo 16 thun, Cửu Lạc taong hu dom ragu mbuan, mbiah tal umo 30 thun meng taong gheih hu 72 ragu di ginang.. Piah taong hu siam Ghinăng, Paranưng lac bruk oh mbuan. Nghệ nhân Cửu Lạc khan lac, dom thun bilan daok ranaih, ala ia bulan dalam palei Cam di ong, yaok thun tuk tame Katê, sap Paranưng atau sap Ghinăng nyu njom tame dalam ralo darah di ong.

Thun bilan tapa nao, meng kham merat bac megru, urak ini ong meda taong hu sa mbang bloh 2 baoh ginăng biak gheih bo takik urang halei meda ngak hu. Sap Ghinăng di nghệ nhân Cửu Lạc hu ba mai ka ong 4 huy chương ameh dalam dom mbang pataom daoh tamia khu vực saong dalam taneh ia. Meng rilo thun ini mai, nghệ nhân Cửu Lạc hu jeng sa dalam dom urang taong Ghinăng, Paranưng gheih di abih dalam tỉnh Bình Thuận. yaok thun nghệ nhân hu Phòng Văn hóa huyện Bắc Bình, kapul daoh tamia Biển Xanh Bình Thuận da-a mai pato tacei saong taong iek ka dom urang jakar ilamu, dom nghệ sỹ bac megru. Meng bruk rik daong di nghệ nhân Cửu Lạc, kapul daoh tamia Biển Xanh Bình Thuận hu yaok pluh kadha kandaong veik dalam hatai di urang maong iek dalam saong lingiu taneh ia.Lingiu di nan, ong daok hu pato ka rilo rai rah./.