Meng hatai taring, naih gheih, dom thun jaik di ini, rilo urang ngak nong di  tỉnh Bạc Liêu hu ba sa janih phun hoang dại tame pala angaok mblang hamu di drei, nan lac phun năn bộp. Bruk ngak ini hu daong ka rilo sang yam tagok ngak kaya meda, ngak tabiak hu rilo njam hacih, khik siam kaya ikan, ba bruk ngak ka urang palei pala, saong daok lac jalan ngak piah pasiam dom bhum taneh dhaong, taneh, njom phèn di huyện. Kadha vak di Tấn Phong- urang vak di rayo sap ndom VN daok di bhum taneran kraong CL hu ndom tal bruk nan, da-a mikva saong taong abih gauk tui pang.

Sa-ai Trần Quốc Nghĩa daok di palei Mỹ Tường 1, xã Hưng Phú, huyện Phước Long, tỉnh Bạc Liêu brei thau: Sa-ai hu 6 công hamu, dahlau deih yaok thun ngak hu 2 vụ  padai min oh hu hadom kayua taneh daok di labik dhaong, njom phèn nan ye năng suất biak biar. Atah di ini 2 thun, meng khang hatai salih tapa pala phun năn bộp nan ye raidiuk di sang sa-ai hu tani tanat.

 “Pala tuk camereip 3 công, mboh hu mbang nan ye drei pala 3 cong tra, jeng  6 công. Meyah 6 công bo dahalk pah taneh, yaok bilan dahlak daok laba hu meng 30  triệu tagok”.

Dom urang ngak nong pala năn bộp di xã Hưng Phú jeng khan lac: Pala phun năn bộp duah hu jien rilo jang meng 6 tal 8 mbang dut haong ngak padai. Ini lac janih phun glai tamuh hu di taneh njom phèn nan ye biak mbuan pala. Năn bộp pala sa mbang min buac palei hu gam gam dalam thun, hadei di nan meng buac klaak piah pala bahrau. Daok bruk iek glang jeng biak mbuan, tok cang buh khak saong pataom hala ủ.  Sa-ai Trần Văn Kê daok di palei Mỹ Tường 1 xã Hưng Phú, huyện Phước Long brei thau:

“Tuk camereip drei jeng ngak taneh bloh buac tame pala, pala bloh buh khak u rê trun ka nyu siam, meng 50 tal 70 kg ka nyu tamuh siam piah drei buac, buac miat tal bilan 1, bilan 2 mboh năn nyu meriah ye ramik năn ủ tagok, bloh hadei di nan pluh dom harei drei buh khak sa mbang, glaih galr hasit ye nyu jeng”.

Urak ini di huyện Phước Long, tỉnh Bạc Liêu hu jaik 150 baoh sang urang pala năn bộp di angaok taneh praong labaih 50 ha. Phun năn bộp hu daong ka urang hu ginup meda bo daok ba bruk ngak ka rilo urang dalam palei. Mikva di labik ini tuk lahaiy meda tame buac năn bộp mbang pah tui yaom 2.000 đồng sa kg. Yaok harei, yaok urang meda buac hu meng 40 tal 50kg năn, duah hu meng 80 tal 100 ribau đồng.

Tui ong Hồ Văn Hây- akaok kapul urang ngak nong xã Hưng Phú, huyện Phước Long, tỉnh Bạc Liêu, tukvak jaik di ini, mikva pala năn bộp daok hu raong ikan dalam mblang hamu pala năn saong pala njam patam vil val takai hamu, meng nan jien duah hu rilo jang meng 15 tal 20 triệu đồng yaok thun.

“Angaok hamu drei pala năn, lingiu di nan mBan chấp hành Kapul urang ngak nong kol dahlak hu jak ba urang hội saong urang ngak nong dalam xã pablak tame raong ikan haong pala nan ye tuk pablei jeng hu kein laba rilo jang. Drei jeng hu jak ba mikva pala angaok nan dom janih njam patam karei tra piah hu jien mek tame sang rilo jang”.

Urak ini urang ngak nong di huyện Phước Long, tỉnh Bạc Liêu pabak ka darak pasar labaih 6 tấn năn bộp yaok harei. Mikva buac bloh, hu urang mai tal labik blei yaom meng 5.000 tal 6.000 đồng sa kg. Năn bộp hadei di blei mai, laok klaak tal khang gah lingiu ye daok tai meda patih limin gah dalam, mbang metah atau chao atau ngak ia bai, ngak jarok mesam… Kayua yau nan ye bo urak ini năn bộp daok jeng sa janih njam hu rilo menuac takre. Tui dom urang ngak praong pan akaok huyện Phước Long, lingiu bruk pachreih urang nong pala janih phun ini di angaok bhum taneh dhaong, traneh njom phèn piah patagok bruk ngak mbang kinh tế, huyện jeng daok roh duah dom bruk yau khik piah, pajeng ba, chế biến … piah duah jalan ba phun năn bộp nao pablei di dom tỉnh, ban atah jang./.