Dahlau di ini 10 thun, ông Lê Văn Phong, daok di xã Tân Thiềng, huyện Chợ Lách yaom lac sang hu 6 công darang min kayua yaom pablei oh hu karo, yaok thun mek tame hu dom pluh trieu dong min, nan ye sang biak kan kandah. Anak bruk kan hu labik pablei baoh darang, puac thun 2005 ông Phong salih tapa pala kruac bung kalik hijao. Lac janih phun kan pala nan ye tuk camereip ong Phong gaok rilo kan kandah, abih di nyu nan lac ilamu iek glang. Min meng hatai kham merat saong hu bruk daong ilamu ky thuat di jabat ngak nong huyen, tal urak ini ong pala hu siamjanih phun ini. Urak ini meng 6 công taneh pala kruac bung kalik hijao, brei baoh meng 6 tal 8 tấn, yaom pablei di bein meng 35 tal 50 ribau đồng sa kilo, ong Phong laba hu yaok rituh triệu đồng.

“Di bhum ini meng tuk salih tapa pala phun kruac bung hu kein laba biak. Meng tuk pala tal ini hu 7 thun min oh ka tuk halei laik yaom. Thun ini tui kuhria mboh dahlau mek tame hu meng 500 triệu tagok. Thun blaoh laba hu labaih 300 triệu, thun ini hu meng 500 triệu tagok”

Meng kruac bung pablei hu yaom glaong, tani tanat nan ye rilo urang ngak nong di Bến Tre yaok thun mek tame hu meng dom rituh triệu đồng tal sa tỷ đồng. Ong Đào Văn Minh, phaok kapul pambuak bruk pala kruac bung kalik hijao Phú Thành, huyện Châu Thành brei thau: Urak ini, kapul di ong hu 94 urang ngak nong pala kruac bung tui tanut VietGAP, raidiuk di dom urang dalam kapul jeng hu kaya meda. Abih di nyu nan lac, ngan saong bein kruac bung meng 6 thun tagok, brei baoh hu jaik 20 tấn sa hecta, urang pala mek jien tame hu jaik sa tỷ đồng.

“Biak sahanang hatai, drei oh kuria hagait kayua hu doanh nghiep blei abih saong yaom blei tani tanat. Daok meyah hu tanut VietGAP ye doanh nghiep blei yaom glaong jang. Mikva sahanang hatai kuhria  pala habar ka  baoh kruac bung di drei dak harei dak praong siam.

Tui ong Đàm Văn Hưng, po doanh nghiệp Hương Miền Tây, sa doanh nghiep nao dahlau dalm bruk duah darak pasar saong pablei kruac bung tabiak negar langiu, urak ini daok tut angan pambuak bruk saong 27 Tổ hợp tác saong HTX pala kruac bung kalik hijao di tỉnh Bến Tre brei thau: Kein laba di kruac bung biak praong, dak harei dak hu rilo urang negar langiu mai blei. Min khin urang pala kruac bung brei ngak njauk tui dom quy trình pala hacih sa-at, oh pandar jru pachreih baoh samar praong. Daok meyah pala tui quy trình VietGAP atau GlobalGAP, ong blei atong abih dom baoh nan, tui yaom glaong jang darak pasar.

“Dua tanut nan pablei hu di jaik abih darak negar langiu, eng negar Mỹ oh ka tame hu. Urak ini, drei hu biak rilo darak piah pablei, yaok thun khin hu labaih 1.500 tấn pablei tabiak negar langiu bo khol drei urak ini bahrau pabak hu 300 tấn. Biak damen.”

Dalam tỉnh Bến Tre hu labiah 5.500 hecta kruac bung kalik hijao, dalam nan hu 4.200 hecta daok brei baoh, kuhria hu jaik 48.000 tấn. Kruac bung klik hijao Bến Tre urak ini oh lac pablei hu ralo di darak pasar dalam taneh ia bo daok pablei tabiak ka darak pasar Đức, Canada, Hà Lan, Nga, Trung Quốc… Urak ini, hu rilo harak pambuak bruk blei meng Pháp saong Nhật. Langiu bruk peih praong taneh, gah ngak nong Bến Tre daok pataom tame ngak brei baoh kruac bung praong, siam, yamen bingi meng bruk pachreih urang ong pala tui jalan pambuak dom gah, pala tui sa jalan yau gauk, brei baoh hacih sa-at. Ong Nguyễn Văn Thượng, Phó akok Chi cục patagok palei pala tỉnh Bến Tre lac:

“Tukvak tapa ngak biak sit sot, yau nan ye gah ngak nong brei  ramik veik bruk pala, ngak nan, pambuak gauk ngak jeng dom kapul pambuak bruk, HTX kruac bung kalik hijao. Anak meta taduan mek ilamu ky thuat piah urang ngak njauk tui sa quy trình, piah ka baoh kruac bung hu praong, siam”

Tui yaom pablei glong saong tani tanat dalam tukvak tapa, kruac bung kalik hijao oh lac hu pala di tỉnh Bến Tre bo urak ini daok peih praong tal dom tỉnh jaik taphia, bhum Đông Nam bộ, Tây Nguyên…piah pablei tabiak negar langiu. Anak tal, bruk padang tanut chuẩn tui bruk ngak di kapul nyaom saong iek praong bruk pablei tabiak negar langiu, ye jia lac baoh kruac bung meda daok hu paglaong yaom jang./.